小傳

Sió-toān

文獻資訊

項目	資料
作者	無lo̍h名
卷期	台南府城教會報
卷期	第343卷
日期	1913/10
頁數	8

白話字（原文數位化）

Sió-toān

1913.10 P.8-9

Chhoà Sam-hí sio̍k Báng-kah ê kàu-hoē, tī 1900 nî 12 ge̍h 31 ji̍t ū niá soé-lé. Lūn ho̍k-sāi Siōng-tè put-chí jia̍t-sim, tuì Siā-hoē ia̍h hô-bo̍k, só͘-í hoē-lāi kap hoē-goā ê lâng put-chí o-ló i. Tī 1905 nî 1 ge̍h 8 ji̍t ū seng-tsoè chip-sū. I tng chip-sū ê chit m̄ nā liāu-lí siàu-hāng, ia̍h ū tàu pang-tsān thoân tō-lí. Kàu kin-nî 3 ge̍h chip-sū ū moá-jīm, hit-tia̍p chèng hiaⁿ-tī chí-bē ū kéng i tio̍h tsoè tiúⁿ-ló. Tok-hoē ia̍h hoaⁿ-hí, tsóng-sī iáu-bē siat-li̍p bô phah-sǹg i tī 7 ge̍h 29 ji̍t chiū kè-óng, phoà-pīⁿ thâu kàu bé 11 ji̍t kú nā-tiāⁿ.

Tân Siah ia̍h sī sio̍k Báng-kah ê kàu-hoē. I tī 20 goā nî chêng chiū sìn tō-lí, ia̍h bat khì Tamsui Sîn ha̍k-hāu tha̍k-chheh, ia̍h ū thoân tō-lí 10 goā nî kú. āu-lâi ū hioh-khùn tī Báng-kah tsoè i-seng. Lūn ho̍k-sāi Siōng-tè ia̍h chin jia̍t-sim. Tī 1908 nî 5 ge̍h 24 ji̍t ū seng tsoè tiúⁿ-ló, i m̄ nā tàu liāu-lí kàu-hoē ê sū-bū ia̍h siông-siông tàu pang-tsān thoân tō-lí. Bô phah-sǹg tī kin-nî 6 ge̍h 17 ji̍t ū jiám-tio̍h tiông-chek hû-su ê pīⁿ, ji̍p tī Tâi-pak I-īⁿ tī-liâu. Khó-sioh lóng bô èng-hāu, kàu 8 ge̍h 2 ji̍t ū kè-óng tī-hia, 4 ji̍t ū kng lâi lé-pài-tn̂g tsòng-sek. Hit ji̍t lâi hoē-tsòng ê lâng hoē-goā kap hoē-lāi tsóng-kiōng ū 450 lâng, chē chhia ū oá 200 lâng, lâi sàng-tsòng ê Bo̍k-su ū 4 lâng, Thoân-tō su ū 5 lâng. Báng-kah ê kàu-hoē sit-lo̍h chit nn̄g lâng sit-tsāi ū khiàm-la̍t.

漢羅（Ùi原文改寫）

小傳

1913.10 P.8-9

蔡三喜屬艋舺ê教會，tī 1900年12月31日有領洗禮。論服事上帝不止熱心，對社會亦和睦，所以會內kap 會外 ê人不止o-ló 伊。 Tī 1905年1月8日有先做執事。伊當執事ê 職 m̄-nā料理數項，亦有鬥幫贊傳道理。到今年3月執事有滿任， hit-霎眾兄弟姊妹有揀伊著做長老。督會亦歡喜，總是iáu未設立無拍算伊 tī 7月29日就過往，破病頭到尾11日久nā-tiāⁿ.

陳Siah亦是屬艋舺ê教會。伊 tī 20 外年前就信道理，亦bat去Tamsui神學校讀冊，亦有傳道理10 外年久。後來有歇睏tī艋舺做醫生。論服事上帝亦真熱心。Tī 1908年5月24日有先做長老，伊m̄若鬥料理教會ê事務亦常常鬥幫贊傳道理。無拍算tī今年6月17日有染著 tiông-chek hû-su ê病，入tī台北醫院治療。可惜攏無應效， 到 8月2日有過往tī-hia， 4日有kng來禮拜堂葬式。 Hit日來會葬 ê人會外 kap 會內總共有450人，坐車有oá 200人，來送葬 ê牧師有4人，傳道師有5人。艋舺 ê教會失落這兩人實在有欠力。