公禁罷工
Kong-kìm Pā-kang
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第325卷 |
| 日期 | 1912/4 |
| 頁數 | 3 |
白話字（原文數位化）
Kong-kìm Pā-kang
1912.04 P.3
Tāi Eng-kok só͘ chhut ê mi̍h tiong-kan thô͘-thoàⁿ iā sī toā tuì-tiōng, nî-nî só͘-chhut ū nn̄g bān-bān tun, (chi̍t-tun chha-put-to 16 tàⁿ), lóng sī tuì tē-khòng ku̍t-khí-lâi. Chò chit-hō kang ê lâng chám-jiân kan-khó͘, khiok iā sī hó-thàn; chi̍t-ê lâng muí-ji̍t ū-sî thàn saⁿ-sì ê gîn-chîⁿ. In-uī ū kin ū chîⁿ ku̍t ū khah-chē--ê sī thàn khah-chē. M̄-kú ū só͘-chāi chin pháiⁿ ku̍t, lâng hiâm ku̍t chió soà thàn bô oā. Hiah-ê chò kang ê lâng ū siat kong-hoē, thong-kok ku̍t thô͘-thoàⁿ ê lâng chha-put-to lóng ū ji̍p-hoē; nā tú-tio̍h sím-mi̍h kong-sū in-ê kàn-sū-oân thang chū-chi̍p gī-lūn tāi-chì, hō͘ in tāi-ke saⁿ chiàu-kò͘, bē sit-liáu tāi-kio̍k.
Hiān-kim kàu-sū-oân tuì thâu-ke kóng, nā gū-tio̍h pháiⁿ ku̍t ê só͘-chāi bē pí-tit hó ku̍t--ê sǹg ū kin ū chîⁿ; chóng tio̍h ū chi̍t-ê kài-ān, chi̍t-ji̍t siāng-chió tiāⁿ-tio̍h sī kuí-ê îⁿ, sui-jiân ku̍t bô hit-ê gia̍h, nā jīn-chin chò kang iû-goân chiū kóng kàu tó chi̍t-ji̍t in lóng hoē-chê m̄ chò kang.
Kàu 3 goe̍h chhe it kó-jiân ū pah goā bān lâng hoē-chê lóng m̄ khì chò, hiān-kim bô lâng ku̍t thô͘-thoàⁿ, tì-kàu toā khiàm-khoeh, thô͘-thoàⁿ iā toā khí-kè. Tì-kàu sì-uī ê hoé-chhia kiám kiâⁿ kuí-nā pang; hoé-chûn iā sī kiám kiâⁿ kuí-nā pang; hoé-chûn iā sī kiám kiâⁿ. Kî-û ū ēng ki-khì ê só͘-chāi iā chē-chē tio̍h thêng-kang, ché m̄-sī in-uī lâng m̄-khéng chò, sī in-uī khiàm thô͘-thoàⁿ ê iân-kò͘, sīm-chì jī-saⁿ-cha̍p bān lâng hō͘ i liân-luī--tio̍h, tì-kàu bô thang chò kang. Liân Goā-kok iā hō͘ in liân-luī--tio̍h, in-uī in ê ki-khì-chhiúⁿ chē-chē sī oá-khò Eng-kok ê thô͘-thoàⁿ.
漢羅（Ùi原文改寫）
公禁罷工
1912.04 p.3
大英國所出ê物中間土炭也是大對重，年年所出有兩萬萬tun， (一tun差不多16擔)，攏是對地礦掘起來。做這號工 ê人嶄然艱苦，卻也是好-趁；一個人每日有時趁三四個銀錢。因為有kin有錢掘有khah 濟--ê是趁 khah濟。M̄-kú有所在真歹掘，人嫌掘少soà 趁無oā。 Hiah ê 做工 ê人有設公會，通國掘土炭ê人差不多攏有入會；若tú-著甚麼公事in ê 幹事員thang聚集議論代誌，hō͘ in大家相照顧，bē 失了大局.
現今幹事員對頭家講：若遇著歹掘 ê所在bē 比得好掘--ê算有kin有錢，總著有一個kài-ān，一日siāng-少定著是幾個圓，雖然掘無hit個額，若認真做工猶原就講到tó一日in攏會齊 m̄ 做工。
到 3月初一果然有百外萬人會齊攏m̄去做，現今無人掘土炭，致到大欠缺，土炭也大起價。致到四位ê 火車減行幾-nā班； 火船也是減行。其餘有用機器ê所在也濟濟著停工， ché m̄是因為人m̄肯做，是因為欠土炭ê緣故，甚至二三十萬人hō͘ 伊連累--著，致到無thang 做工，連外國也hō͘ in連累--著，因為in ê機器廠濟濟是oá靠英國ê土炭。