中國ê政事
Tiong-kok ê Chèng-sū
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第325卷 |
| 日期 | 1912/4 |
| 頁數 | 5 |
白話字（原文數位化）
Tiong-kok ê Chèng-sū
1912.04 P.5
Oân Sè-khái chham-siông beh pó-hō͘ Hông-tè bē-tit-thang in-uī chèng-lâng chú-gī beh siat-li̍p Bîn-chú. Hông-tè iā chai bô hoat-tit i ta-oâ, chiū-tī 2 goe̍h tē 12 hō ū chhut-chiàu kam-goān thè-uī, lâi sūn peh-sìⁿ ê ì-sù. Tāi-ke goān chún i ū hông-tè ê bêng-sek nā-tiāⁿ, chèng-sū bô chhap, iā bē koh thoân-uī hō͘ i-ê kiáⁿ-sun tit, iû-goân toà tī Kiaⁿ-siâⁿ thang kò͘ i ê chong-biō, muí-nî sì-pah-bān gîn hō͘ Hông-tè chò só͘-huì. Hit-sî soà hō͘ Oân Sè-khái kap Lê Goân-hông chò chiàⁿ-hù ê Thóng-léng; kî-û ê toā-koaⁿ iā lóng sī kek-bēng ê lâng. Chông-tiong Sng ia̍t-sian bô chò koaⁿ, i m̄-sī ho͘N3-bēng ê lâng, nā ē-tit-thang kok-ka heng-ōng, i chiū hoaⁿ-hí chò peh-sìⁿ.
Khó-sioh tī 2 goe̍h 29 mê Pak-kiaⁿ ū kiáu-jiáu; sī kun-peng sim-koaⁿ m̄-goān soà chhut-lâi chhiúⁿ peh-sìⁿ, chám-jiân ū kuí-nā ji̍t ê hoán-loān. Tī Thian-chin kap pa̍t só͘-chāi iā sī án-ni. āu-lâi khiok khah an-chēng, m̄-kú sit-lo̍h mi̍h chin-chē; iā goā-kok ê Kong-sài khoàⁿ chit-hō sè-bīn, ū teh chham-siông tio̍h khí ka-tī ê peng lâi Kiaⁿ-siâⁿ pó-hō͘.
Tāi-ke tio̍h kiû Siōng-tè lîn-bín Tiong-kok cha̍p-peh séng ê peh-sìⁿ, hō͘ in-ê sī-toā gâu siat-hoat lī-ek peh-sìⁿ, bián-tit in siū-tio̍h jiáu-loān ê kan-khó͘. Tn̂g-soaⁿ chit-tia̍p ū ké-oāⁿ sin-le̍k chhin-chhiūⁿ lâng tī chia ê khoán, kin-nî hō-chò Tiong-hoa Bîn-kok ê goân--nî.
Ū chi̍t-hāng thang hoaⁿ-hí chiū-sī hiah-ê toā-koaⁿ chē-chē lâng chai-iáⁿ lán Sèng-kàu ê lī-ek, bô chhin-chhiūⁿ Chheng-tiâu ê koaⁿ teh giâu-gî. Ū-ê sī thàu tō-lí ê lâng, bat siū sé-lé; ū-ê sui-jiân sī boē siū sé-lé, iā chai Sèng-kàu sī hó-sū. Chhin-chhiūⁿ Oân Sè-khài i-ê kiáⁿ kap i-ê sun ū khì tī Thian-chin Iâ-so͘ Sèng-kàu ê Tiong Se o̍h-tn̂g tha̍k-chheh; khó-kiàn i-ê thé-thiap lán Sèng-kàu ê ì-sù.
漢羅（Ùi原文改寫）
中國ê 政事
1912.04 p.5
袁世凱參詳beh保護皇帝bē-得-thang因為眾人主義beh設立民主。皇帝也知無法得伊 ta-oâ，就tī 2月第12號有出詔甘願退位，來順百姓ê意思。大家願 准伊有皇帝ê 名色nā-tiāⁿ，政事無chhap，也bē koh傳位 hō͘ 伊ê 囝孫得，猶原toà tī 京城thang kò͘伊ê 宗廟，每年四百萬銀hō͘皇帝做所費。hit時soà hō͘袁世凱 kap 黎元洪 做 正副 ê 統領；其餘ê大官也攏是革命 ê人。從中孫逸仙無做官，伊m̄是好命 ê人，若會得-thang國家興旺，伊就歡喜做百姓。
可惜tī 2月29 暝北京有攪擾；是軍兵心肝m̄願soà出來搶百姓，嶄然有幾-nā日ê 反亂。Tī 天津kap別所在也是án-ni。後來卻khah安靜，m̄-kú失落物真濟；也外國ê 公使看這號勢面，有teh參詳著起家治ê 兵來京城保護。
大家著 求上帝憐憫中國十八省 ê百姓，hō͘ in ê序大gâu設法利益百姓，免得in受著擾亂ê艱苦。長山這霎有假換新曆親像人tī chia ê款，今年號做中華民國 ê 元--年。
有一項thang歡喜就是hiah ê大官濟濟人知影咱聖教 ê利益，無親像清朝 ê 官 teh僥疑。有ê是透道理ê人，bat受洗禮；有ê雖然是boē受洗禮，也知聖教是好事。親像袁世凱伊ê 囝 kap 伊ê 孫有去tī 天津耶穌聖教 ê中西學堂讀冊；可見伊ê體貼咱聖教 ê意思。