黃嘉智ê小傳

N̂g Ka-tì ê Sió-toān

文獻資訊

項目	資料
作者	無lo̍h名
卷期	台南府城教會報
卷期	第316卷
日期	1911/7
頁數	64

白話字（原文數位化）

N̂g Ka-tì ê Sió-toān

1911.07 P.64

Sì-cha̍p-la̍k nî chêng, tī Chú-āu 1865 nî, Má I-seng kap Tō͘ Bo̍k-su tuì Ē-mn̂g koè-lâi Tâi-oân thoân-tō siat-kàu. Hit-sî ū chi̍t-ê siàu-liân lâng sìⁿ N̂g miâ Ka-tì kap in lâi; i pún sī Chiang-chiu Chio̍h-bé ê lâng, tuì Táⁿ-má-jī Bo̍k-su siū sé-lé. Hit-tia̍p ê sî-chūn, Tâi-oân ê lâng iáu-boē ū lâng pài Siōng-tè.

uī-tio̍h hit-sî Má I-seng pī lâng kek-tio̍k soá khì Táⁿ-káu siat I-koán, N̂g sian-siⁿ iā kap i khì, iú-goân chò i ê chō͘-chhiú, lé-pài-ji̍t soà kóng tō-lí hō͘ lâng thiaⁿ. Saⁿ-sì nî āu Má I-seng koh tò-tńg lâi Tâi-lâm-hú, Táⁿ-káu hâng--ni̍h ê lâng chiū iang-thok i chhiáⁿ chi̍t-ê Bān I-seng lâi Táⁿ-káu thè i-ê khoeh. Bān I-seng hoaⁿ-hí lâi lán-ê I-koán hêng-i; m̄-kú I-koán lāi ê tāi-chì lóng sī N̂g Sian-siⁿ liāu-lí. Bô loā-kú Bān I-seng khì Ē-mn̂g, kah i ê sió-tī lâi chiap i ê khoeh; ū lâng chheng-ho͘ i chò sió Bān. Hō͘-lâi sió Bān sian-siⁿ khì Hok-chiu, koh oāⁿ chi̍t-ê Liân I-seng lâi. Hit kuí nî ê tiong-kan oāⁿ kuí-nā ê I-seng, m̄-kú I-koán lāi ê tāi-chì iû-goân sī N̂g sian-siⁿ teh chiàu-èng.

āu-lâi oāⁿ muî I-seng lâi, iā hit-ê I-koán tó-hoāi, N̂g sian-siⁿ soà khì Pi-thâu, tī pak-mn̂g goā ka-tī khui Se-io̍h-tiàm. Hit-tah kàu-hoē ê hiaⁿ-tī kéng i chò tiúⁿ-ló, ta̍uh-ta̍uh lâu-jīm, chò kuí-nā cha̍p nî ê kú. Ū chi̍t-ê cha-bó͘-kiáⁿ kè hō͘ Hú-siâⁿ En̂g-an-tông ê Sian-siⁿ Gô͘ Sûn-jîn; kàu kū-nî ê tiong-kan i chiū lâi toà Hú-siâⁿ. Hit-sî í-keng chhit-cha̍p-goā hoè. Kīn-lâi i-ê sin-thé ū khah nó͘-mō͘; kàu 6 goe̍h 14 hō pêng-an koè-óng. Tī 6 goe̍h 18 hō chhut-chòng, ū chē-chē lâng lâi sàng; thang kiò chò hok-siū lióng-choân.

漢羅（Ùi原文改寫）

黃嘉智ê 小傳

四十六年前，tī主後1865年，馬醫生kap 杜牧師對廈門過來台灣傳道設教。 hit時有一個少年人姓黃名嘉智kap in來； 伊本是漳州石馬 ê人，對打馬字牧師受洗禮。 Hit-霎 ê時陣，台灣ê人iáu-boē有人拜上帝。

為著 hit時馬醫生被人革逐soá去打狗設醫館， 黃先生也kap伊去，iú-goân 做伊ê 助手，禮拜日續講道理hō͘人聽。三四年後馬醫生koh 倒轉來台南府， 打狗行--裡 ê人就央託伊請一個萬醫生來打狗替伊ê缺。 萬醫生歡喜來咱ê 醫館行醫； m̄-kú 醫館內ê代誌攏是黃先生料理。無loā-久萬醫生去廈門，kah伊ê小弟來接伊ê 缺；有人稱呼伊做小萬。 Hō͘-來小萬先生去福州， koh 換一個連醫生來。Hit 幾年ê中間換幾若ê醫生，m̄-kú醫館內ê代誌猶原是黃先生teh照應。

後來換梅醫生來，也hit個醫館倒壞，黃先生soà去埤-頭，tī 北門soā家治開西藥店。 Hit-tah教會ê兄弟揀伊做長老，ta̍uh-ta̍uh 留任， 做幾若十年ê久。有一個查某囝嫁hō͘ 府城榮安堂 ê先生吳 Sûn-jîn； 到舊年ê中間伊就來toà 府城。hit時已經七十外歲。 近來伊ê身體有khah nó͘-mō͘； 到 6月14號平安過往。 Tī 6月18號出葬，有濟濟人來送； thang叫做福壽兩全。