飛行機

Hui-hêng-ki

文獻資訊

項目	資料
作者	無lo̍h名
卷期	台南府城教會報
卷期	第315卷
日期	1911/6
頁數	54

白話字（原文數位化）

Hui-hêng-ki

1911.06 315 koàn P.54

Chē hong toà poàⁿ-thiⁿ poe, put-kò sī nn̄g chheng nî chêng lia̍t-chú ê khang siūⁿ; Liông-kiong thit-thô kan-ta sī chhiàu-tâm gia̍t-gú. Chóng-sī tī chit 20 sè-kí, kho-ha̍k-kài ê toā chìn-pō͘, si̍t-chāi sī hō͘ lâng thiaⁿ-tio̍h ē kiaⁿ, khoàⁿ-tio̍h ē chhoah.

Chū-kó͘ í-lâi, jîn-luī sī tiàm tī tē-chiūⁿ ê oa̍h-mi̍h, nā-sī tuì tì-sek ê cheng-chìn, lí-lūn ke-thiⁿ, si̍t-iōng hoat-hiān, chiū lâng m̄-nā ē tit chò hî tiàm-bī tī chuí-lāi, iā ē o̍h chiáu poe tī poàn-khong-tiong. Chiâm-không-théng(sic) (chiū-sī hái lāi ê chûn) kú-kú chiū teh si̍t-iōng; hui-hêng-ki (chiū-sī poe-chûn) sī kīn-lâi chiàⁿ hoat-bêng. Tī Ji̍t-pún sui boē loā toā sêng-kong, tī Au Bí sī í-keng chhut-tuì chhì-ēng-kài ji̍p tī si̍t-ēng-kài lah.

I ê chō hoat m̄-nā chi̍t khoán, ū siang-hio̍h-sek, toaⁿ-hio̍h-sek, kok hoat-bêng-ka lóng ū i ê miâ, oh-tit it-it kì-chài bêng-pe̍k.

Tāi-pán Tiâu-ji̍t(sic) sin-pò-siā, tuì Bí-kok phèng-chhiáⁿ hui-hêng-ka saⁿ miâ toà hui-hêng-ki nn̄g tiuⁿ lâi, Saⁿ goe̍h 12 ji̍t tī Tāi-pán liān-peng-tiûⁿ hui-hêng, ū hui-hêng saⁿ pái. Tē it pái sī pho͘-chōng(sic) hui-hêng. Tē jī pái ū chiūⁿ kàu 2350 Eng-chhioh. Tē saⁿ pái chiūⁿ kàu 2000 chhioh ê sî chiū tián i ê pún-sū, ūn-choán thêng-chí, pàng hō͘ i ûn-ûn-á tuī-lo̍h--lâi, lóng bô sún-hāi.

Hit-ji̍t ji̍p tiûⁿ ê lâng oá 80 bān. Kiú-ní-kiong Pang-gân(sic) ông. To-ka ông jī-uī tiān-hā iā lâi khoàⁿ. Si̍t-chāi sī í-chêng boē-bat-ū ê hó kong-kéng, tī Ji̍t-pún hui-hêng sêng-kong ê tē it pái. (T. Th. Ts.).

漢羅（Ùi原文改寫）

飛行機

1911.06 315卷 P.54

坐風蹛半天飛，不過是兩千年前列子ê空想；龍宮thit迌kan-ta是笑談孽語。總是佇這20世紀，科學界ê大進步，實在是予人聽著ē驚，看著會chhoah。

自古以來，人類是踮佇地上ê活物，若是對知識ê精進，理論加添，實用發現，就人毋若會得做魚踮bī佇水內，也ē學鳥飛佇半空中。潛航艇 (就是海內ê船)久久就teh實用；飛行機 (就是飛船)是近來chiàⁿ發明。佇日本雖未偌大成功，佇歐美是已經出對試用界入佇實用界lah。

伊ê作法毋若一款，有雙葉式，單葉式，各發明家攏有伊ê名，oh得一一記載明白。

大阪朝日新報社，對美國聘請飛行家三名帶飛行機兩張來，三月12日佇大阪練兵場飛行，有飛行三擺。第一擺是普狀飛行。第二擺有上到 2350 英呎。第三擺 上到 2000 呎 ê時就展伊ê本事，運轉停止，放予伊勻勻仔墮落--來，攏無損害。

彼日入場ê人倚80 萬。久邇宮邦彥王。多嘉王二位殿下也來看。實在是以前未捌有ê好光景，佇日本飛行成功ê第一擺。(T. Th. Ts.)