公共小學

Kong-kiōng Sió-o̍h

文獻資訊

項目	資料
作者	無lo̍h名
卷期	台南府城教會報
卷期	第313卷
日期	1911/4
頁數	35

白話字（原文數位化）

Kong-kiōng Sió-o̍h

(Iu-sî Gōng-sióng.)

(Chiap chêng-koàn 26 bīn.)

1911.04 313 koàn p.35-36

iū chêng Ngô͘-kok(sic) ū chi̍t-ê toā hù-ong khoàⁿ tio̍h pún-kok ê jîn-bîn, náu-la̍t jîn-châi bē iâⁿ-koè choân-kiû; chiū ēng i nn̄g pah-bān ê gîn kiàn só͘-chāi, bé kok-tiong ióng-chòng ê jîn-châi, chhut-sek ê lâm-lú, kā in phit-phoè, ì-sù ài kái-liông hit-hō lâng chéng hō͘ chiâⁿ-mi̍h. Chit-hō-sū to ū lâng khéng uī-kok tô͘-bô͘ lah; hô-hòng lán ê Chú hiah jîn-chû, chit-hō-sū m̄-khéng uī i soat-hoat?

iū tng-sî Iâ-so͘ tī sè-kan, ū pháiⁿ hū-jîn-lâng kam-goān ēng kuí-nā cha̍p kho͘ ê hiuⁿ-iû boah Iâ-so͘, iū ēng bô kè ê ba̍k-sái, thâu-mn̂g, chhuì, lâi hiàn-hō͘-i. (Lō͘. 7:37, 38.) iū ū Iâ-so͘ ê ké pêng-iú Se-bûn kam-goān khai-chîⁿ pān chi̍t tè toh lâi chhiáⁿ Iâ-so͘(Lō͘. 7:36). Hô-hòng lán sī Iâ-so͘ ê chin pêng-iú lah (Hān. 15:14). Kài-pháiⁿ ê Sat-kai chi̍t-ē kau-poê tio̍h Iâ-so͘, liâm-piⁿ goān ēng chi̍t-poàⁿ ê ke-hoé lâi chín-chè sàn-hiong lâng (Lō͘. 19:8). Lán chiah-ê Sèng-hoē-iú, sui-jiân bô Sat-kai ê toā ke-sū, nā-sái ēng 100 ê 3 hun lâi the̍h chhut, chit-chân gī-kí ún-tàng chiâⁿ; iā nā án-ni chò, put-kò chhin-chhiūⁿ toā-chhiū lut 3 hio̍h, toā-kang kiám 3 poe chuí, kiám ē ko͘ ki, chuí ta mah? àn-choáⁿ bô?

Sī-lah! Sī-lah! Lia̍t-uī khoàⁿ Pò ê hoē-iú ah! Boeh sī hit-tia̍p goá teh ìn i ê sî, hō͘ lín thiaⁿ-tio̍h; lín mah(sic) beh tàu chàn-sêng kóng “Tio̍h, tio̍h, bô chhò.” Taⁿ chhiáⁿ lín lia̍t-uī siūⁿ khoàⁿ, chit-chân nā bô koan-hē chiū kā hiân-teh; nā sī lán Sèng-hoē ê toā koan-bo̍k, tio̍h chiū-kín lâi kó͘-bú siat-hoat; mê-nî-thâu chiū thang khoàⁿ-tio̍h kong-o̍h khui, tāi-ke kám-siā Siōng-tè. Khiok sio̍k-gú kóng, “Chò-sū khí-thâu lân”, iū “Chhut-thâu tio̍h sńg-kak” ; che khiok ū-iáⁿ; m̄-kú lán tit-tio̍h Siōng-tè si-in chò I-ê kiáⁿ, sio̍k kng-bêng, tio̍h kiâⁿ kng-bêng (Hut. 5: 1, 8), chai thang uī-tio̍h Chú ê tāi-chì lâi tio̍h-boâ, ún-tàng bô khang-khang (I Lîm. 15: 58). án-ni-siⁿ chai thang chīn só͘-ē lâi kiâⁿ, put-lūn sím-mi̍h téng-lâng, tit-tio̍h Chú ê pò-siúⁿ (Hut. 6: 8).

Kì-tit chá-nî Sin-bûn-pò teh kóng, Ngô͘-kok ū chi̍t-ê toā thâu-ke, sū-gia̍p chin khoah, koán-sū iā chin chē, tiong-kan ū chi̍t-ê koán-sū, káⁿ sī miâ kiò Chhi-bê. Chi̍t-ji̍t in thâu-ke beh kā siu-chîⁿ chò chi̍t-chân hó-sū. I chiū kóng, Bô chîⁿ in-uī chhiū toā ńg chiū toā, tiàm-lāi sin-lô, huì-hāng, tiàm-soè, ka-hù-soè, êng-gia̍p, kong-ha̍k-hāu, gī-ióng lām-tuī, pó-kah-huì, ài-kok hū-jîn-hoē, bú-tek-hoē, chióng-chióng to beh chîⁿ, thài ū thang hō͘ lí leh? Thâu-ke iā bô pìⁿ-bīn un-sûn kap i chham-siâng kóng, Ū-iáⁿ lah, goá iā chai án-ni; m̄-kú chit-chân ê hó-sū, lī(sic) to iā put-chí gâu siat-hoat, pa̍t-mi̍h khah liám khai leh, poah koá lâi hō͘ goá, lán to ū hit hō ióng-ló ê kui-lu̍t, pa̍t-ji̍t goá chiah hó khoán-thāi lí, hō͘ lí toà chin-sóng, ēng chin-chiok, kàu-sî goá lâi kiò lí, bô sit-gō͘. Chhi-bê sim siūⁿ khiok ū-iáⁿ, m̄-kú chêng i chi̍t-ê hó pêng-iú, miâ Sè-bô͘, kā i kóng, Bó͘-uī ê thó͘-jîn, chuí-chhân chin chē chin puî, chi̍t-chheng- gîn bé chi̍t-ji̍t; i siūⁿ beh khì bé lâi chò pún-sin kap kiáⁿ-sun ê su-gia̍p; goá nā the̍h hō͘ thâu-ke, to kiám-chió khì lah? Só͘-í ngē-sim ìn thâu-ke kóng, Bô thang hō͘ lí. Thâu-ke bô ta-tit-oâ tńg-khì, tuì pa̍t-uī khì siu.

Kàu i khí-sin liáu, Chhi-bê liâm-piⁿ khiâ-lû, kiò lô͘-po̍k toà chi̍t-chheng-kho͘ khí-sin beh khì bé chhân-gia̍p, kàu-uī kóng tiāⁿ-tio̍h. Keh thiⁿ-kng ji̍t boē chhut, thâu-lâng chio thó͘-jîn khì kàu tī soaⁿ-chiam, li̍p chi̍t-ki kài-phiò, tuì Chhi-bê kóng, “Tah goán ê gia̍p tī bīn-chêng, bêng-bêng kui-phiàn pîⁿ-iûⁿ che lóng sī. Put-kò goán ū tēng-lē, ji̍t-chhut lo̍h-khì kiâⁿ-khí, goá kiò lâng chhah kài-ān, nā kàu ji̍t tú-lo̍h lí kàu phiò-kha, só͘ kiâⁿ-koè chiū lóng kui-lí; nā ji̍t-lo̍h boē kàu phiò-kha, gîn siau--khì, gia̍p kui-goán.”

I ìn hó, chiū khí-sin ti̍t-ti̍t phoe-miā-kiâⁿ kàu chhuì-ta, pak-tó͘-iau, kha phoà-khang, ià-siān, toā-chhoán, m̄-kam hioh-khùn lim-chia̍h. Kàu ji̍t beh lo̍h, khoàⁿ-tio̍h soaⁿ-kha oat-kak chi̍t-phiàn, puî koh ū lâu-chuí; phah-sǹg chêng hiah ê hō͘ lâng choh, chia ê khah-hó lâi ka-tī choh; m̄-kú ji̍t-thâu i̍t-lo̍h, kiaⁿ-liáu gîn siau; só͘-í bián-kióng piàⁿ-miā kiâⁿ, kàu-uī ji̍t tú-lo̍h; m̄-kú la̍t-chīn, thò͘-hoeh, chiū-sí tī hia.

I-ê thâu-ke kiò pa̍t-lâng kā koán hit-hūn-gia̍p; lô͘-po̍k tī phiò-kha ku̍t chi̍t khang, tn̂g 7 chhioh khoah 4 chhioh; kā i bâi-chòng, kî-û kap i bô kan-sia̍p. Thó͘-jîn gîn phāiⁿ chò i khì, chi̍t-lō͘ iân-lō͘ chhiò kóng, Chhi-bê, Chhi-bê, lí chin-chiàⁿ sī Chhi-bê; bô chhò lah!

Lia̍t-uī hó pêng-iú ah! Lán kā siūⁿ chit-ê Chhi-bê, si̍t-chāi sit táⁿ-sǹg. Lán iā sī Siōng-tè ê koán-sū, āu-lâi lán tit-tio̍h iā sī chi̍t-tè bōng-tē nā-tiāⁿ; lán ê Chú iā kap lán iok beh thè lán pī-pān hó só͘-chāi, koh lâi chiap-la̍p lán khì (Hān. 14: 2--4). Lán iàu-kín tio̍h thé-thiap Ki-tok ê sim, m̄-thang kan-ta kiû lī-ek ka-tī (Huî. 2: 4, 5). Kàu lîm-chiong-ji̍t chiū tit-tio̍h bô lâ-sâm, pāi-hoāi, huì-tuī ê ke-gia̍p, in-uī lán pī-pān ê ( I Pí 1: 4). Chhiáⁿ lán tāi-ke chim-chiok siūⁿ, o̍h Pa-lu̍t-se kap hù-ong ê só͘-chò; bô kiâⁿ tio̍h Chhi-bê ê lō͘-kèⁿ; sī sim só͘-goān.

漢羅（Ùi原文改寫）

公共小學

(Iu-sî Gōng-sióng.)

(接前卷26面。)

1911.04 313卷 p.35-36

又前俄國有一個大富翁看著本國ê人民， 腦力人才袂贏過全球；就用伊兩百萬 ê 銀建所在，買國中勇壯ê人才，出色ê男女，共 in匹配，意思愛改良彼號人種予成物。這號事就有人肯為國圖謀lah；何況咱ê主hiah仁慈，這號事毋肯為伊說法？

又當時耶穌佇世間，有歹婦人人甘願用幾若十箍 ê香油抹耶穌，又用無價 ê目屎，頭毛，喙，來獻予伊。 (路 7:37, 38。) 又有耶穌ê假朋友西門甘願開錢辦一塊桌來請耶穌(路 7:36)。何況咱是耶穌ê真朋友lah (翰. 15:14)。Kài-歹ê撒該一下交陪著耶穌，連鞭願用一半ê家伙來賑濟散hiong人(路. 19:8)。咱chiah ê聖會友，雖然無撒該ê大家事，若使用100 ê 3分來提出，這chân義舉穩當成；也若按呢做，不過親像大樹lut 3葉，大江減 3 杯水，kiám 會枯枝，水ta mah？ 按怎無？

是lah！是lah！列位看報ê會友ah！ Boeh是hit-tia̍p我the應伊ê時，予恁聽著； 恁嘛欲鬥贊成講「著，著，無錯。」今請恁列位想看，這層若無關係就共懸teh；若是咱聖會ê大捐募，著就緊來鼓舞設法；明年頭就通看著公學開，大家感謝上帝。卻俗語講：「做事起頭難」，又「出頭著損角」；這卻有影；毋過咱得著上帝施恩做伊ê囝，屬光明，著行光明(弗. 5: 1, 8)，知通為著主ê代誌來著磨，穩當無空空(I 林. 15: 58)。按呢生知通盡所會來行，不論甚物等人，得著主ê報賞(弗. 6: 8)。

記得早年新聞報teh講：俄國有一個大頭家，事業真闊，管事也真濟，中間有一個管事，敢是名叫Chhi-bê。一日in頭家欲共收錢做一chân好事。伊就講：無錢因為樹大蔭就大，店內辛勞，費項，店稅，加付稅，營業，公學校，義勇艦隊，保甲費，愛國婦人會，母德會，種種都欲錢，thài有通予你leh？頭家也無變面溫純佮伊參詳講：有影lah，我也知按呢；毋過這chân ê好事，你都也不止gâu設法，別物較斂開leh，撥寡來予我，咱都有hit號養老ê規律，別日我chiah好款待你，予你蹛真爽，用真足，到時我來叫你，無失誤。Chhi-bê心想卻有影，毋過前伊一个好朋友，名Sè-bô͘，共伊講，某位ê土人，水田真濟真肥，一千銀買一日；伊想欲去買來做本身佮囝孫ê私業；我若提予頭家，都減少去lah？所以硬心應頭家講：無通予你。頭家無ta得佮轉去，對別位去收。

到伊起身了，Chhi-bê 連鞭騎驢，叫奴僕帶一千箍起身欲去買田業，到位講定著。 隔天光日未出，頭人招土人去到佇山尖，立一支界phiò，對Chhi-bê講：「貼阮ê業佇面前，明明規phiàn平洋這攏是。不過阮有定例，日出落去行起，我叫人插界限，若到日拄落你到phiò跤，所行過就攏歸你；若日落未到phiò跤， 銀消--去，業歸阮。」

伊應好，就起身直直phoe命行到喙ta，腹肚枵，跤破孔，厭siān，大喘，毋甘歇睏啉食。到日欲落，看著山跤斡角一phiàn，肥閣有流水；拍算前遐个予人作，遮的較好來家己作；毋過日頭一落，驚了銀消；所以勉強拚命行，到位日拄落；毋過力盡，吐血，就死佇遐。

伊ê頭家叫別人共管彼份業；奴僕佇 phiò跤掘一空，長7尺闊4尺；共伊埋葬，其餘佮伊無干涉。土人銀phāiⁿ做伊去，一路沿路笑講：Chhi-bê，Chhi-bê，你真正是癡迷；無錯lah！

列位好朋友ah！咱共想這个Chhi-bê，實在失打算。咱也是上帝ê管事，後來咱得著也是一塊墓地nā-tiāⁿ；咱ê主也佮咱約beh替咱備辦好所在，閣來接納咱去(翰. 14: 2-4)。咱要緊著體貼基督ê心，毋通kan-ta求利益家己(腓. 2: 4, 5)。到臨終日就得著無lâ-sâm，敗壞，廢墜 ê家業，因為咱備辦ê ( I 彼 1: 4)。請咱大家斟酌想，學Pa-lu̍t-se佮富翁ê所做；無行著 Chhi-bê ê路徑；是心所願。