上帝ê織工

Siōng-tè ê Chit-kang

文獻資訊

項目	資料
作者	無lo̍h名
卷期	台南府城教會報
卷期	第295卷
日期	1909/10
頁數	80

白話字（原文數位化）

Siōng-tè ê Chit-kang

1909.10 295 koàn p.80

Lâng oa̍h tī sè-kan it-seng ê lí-le̍k sī chhin-chhiūⁿ teh chit pò͘ ê khoán-sit. Nā beh chit pò͘ tio̍h ū pò͘-kui kap ta̍k hāng ê ki-khì. Lūn Siōng-tè hō͘ lán só͘ keng-koè ê sî-hāu, phì-lūn chhin-chhiūⁿ pò͘-kui chi̍t keⁿ chi̍t huī teh chit. Lâng ê sim teh èng-chiap tāi-chì sī chhin-chhiūⁿ soàⁿ-soh teh keng-koè keⁿ-huī. Só͘ ēng ê soàⁿ ū o͘ kap pe̍h nn̄g sek. O͘-ê sī ná-chún lâng tú-tio̍h hoân-ló, pe̍h-ê sī chhin-chhiūⁿ tit-tio̍h hoaⁿ-hí. Chit-kang tio̍h ū chi̍t ê pán thang khoàⁿ iūⁿ. Lūn teh chit beh chiâⁿ chò tó chi̍t iūⁿ, lâng khoàⁿ bē kìⁿ, kan-ta Siōng-tè chai nā- tiāⁿ. Ū-sî hit hō sim ê soàⁿ-so tîⁿ-tio̍h chē-chē tiâu o͘-soàⁿ, iā lán m̄ chai sī àn- cháiⁿ-iūⁿ. Tio̍h thèng-hāu kàu tio̍h án-ni. In-uī ū-sî tio̍h phoè pe̍h soàⁿ chhin-chhiūⁿ hō͘ lâng hoaⁿ-hí, iā ū-sî kai-tit tio̍h kah khah chē o͘-soàⁿ chhin-chhiūⁿ hō͘ lâng hoân-ló; nā bô án-ni chiū bē tit-thang chiàu Siōng-tè só͘ ài chò chiâⁿ ê iūⁿ. Só͘-í lâng nā tit-tio̍h khoài-lo̍k chiū thang hoaⁿ-hí; nā-sī tú-tio̍h kan-khó͘ iû-goân tio̍h hoaⁿ-hí, in-uī chit nn̄g chân ê soàⁿ-soh pêⁿ-pêⁿ sī Siōng-tè só͘ ēng lâi chò-chiâⁿ I ê pò͘.

漢羅（Ùi原文改寫）

上帝ê織工

1909.10 295卷 p.80

人活tī世間一生ê履歷是親像teh織布ê款式。若beh織布著有布規kap逐項ê機器。論上帝hō͘咱所經過ê時候，譬論親像布規一經一緯teh織。人ê心teh應接代誌是親像線索teh經過經緯。所用ê線有烏kap白兩式。烏--ê是那準人tú著煩惱，白--ê是親像得著歡喜。織工著有一個版thang看樣。論teh織beh成做叨一樣，人看bē見，kan-ta上帝知nā-tiāⁿ。有時hit號心ê線索纏著濟濟條烏線，也咱m̄知是àn怎樣。著聽候到著án-ni。因為有時著配白線親像hō͘人歡喜，也有時該得著kah較濟烏線親像hō͘人煩惱；若無án-ni就bē tit thang照上帝所ài做成ê樣。所以人若得著快樂就thang歡喜；若是tú著艱苦猶原著歡喜，因為這兩層ê線索平平是上帝所用來做成伊ê布。