顏清華ê小傳

Giâm Chheng-hoâ ê Sió-toān

文獻資訊

項目	資料
作者	無lo̍h名
卷期	台南府城教會報
卷期	第294卷
日期	1909/9
頁數	73

白話字（原文數位化）

Giâm Chheng-hoâ Ê Sió-toān

1909.09 294 koàn p.73

Chheng-hoâ ia̍h miâ Hu̍t-á. I tī sè-hàn ê sî ū ji̍p sió-o̍h tha̍k chheh, ke-sū put-chí sàn, só͘-í kàu 16 hoè ko͘-put-chiong tio̍h thè o̍h khì hō͘ lâng chhiàⁿ. Ū kap i ê thâu-ke saⁿ-kap khì Kńg-tang, bô kú chiū koh tńg--lâi. Kàu 20 hoè chiū chhoā bó͘. Hit nî Kai Bo̍k-su tú kàu Tām-chuí, i chiū khì thàm i ài thó khoàn ū thâu-lō͘ á-bô. Kai Bo̍k-su chhiàⁿ--i, hit-tia̍p i lóng m̄ chai Sèng-kàu ê tō-lí sī sím-mi̍h khoán. āu-lâi chiām-chiām tit-tio̍h Kai Bo̍k-su ê kà-sī chiū hoán-hoé ké-pìⁿ lâi sìn Chú, niá sé-lí ji̍p kàu-hoē. án-ni sǹg sī pak pō͘ thâu chi̍t ê ji̍p-kàu--ê

āu-lâi Kai Bo̍k-su chiap-la̍p i chò ha̍k-seng kà-sī tō-lí; bô kú chiū khì chò thoân-tō, ū tiàm kuí-nā uī ê pài-tn̂g. Kàu 26 hoè ê sî kap Kai Bo̍k-su sì-kè siat kàu. Kàu 31 hoè chiū tàu kà Toā-o̍h, chò Toā-o̍h ê sian-seⁿ. Kàu 34 hoè ū seng chò Bo̍k-su; tuì hit-tia̍p liáu-āu lóng sī tiàm tī Tām-chuí pang-chān Kai Bo̍k-su liāu-lí kàu-hoē ê sū-bū. Kàu 50 hoè tì-pīⁿ; tuì hit-tia̍p liáu-āu sin-thé khah lám, chò kang khah chió, tām-po̍h tàu kà Toā-o̍h kap sûn-sī Kàu-hoē nā-tiāⁿ.

Tī kin-nî 5 goe̍h kan kap Lâu Bo̍k-su khì thû gî-lân ê kàu-hoē, tò tńg-lâi bô kuí ji̍t pīⁿ-sè khah siong-tiōng, ū chò-lī kap phuì-hoeh. Sòng i-seng put-chí chīn-la̍t teh kā i-tī, chóng-sī bô hoat-tit, kàu 6 goe̍h 2 hō koè-óng. Kin-nî tú 58 hoè, sìn Chú ū 38 nî kú, chò Bo̍k-su 24 nî.

I it-seng siông-siông kap koaⁿ kau-poê. Koaⁿ-tiûⁿ ê sū i put-chí chai-iáⁿ. Tī 18 hoè ê sî bat ūn-niû khì Pak-kiaⁿ, ū tit-tio̍h siúⁿ gō͘ phín kun kong kap chek pó͘ koān sêng. Tī 33 ê sî Tâi-oân ê sûn-bú kā i pó-chàu chīn sian-siú-pī kiam siú lâm-lêng. ia̍h tī 43 hoè ê sî, tn̂g Bú-tâi ū kā i pó-chàu hāu-soán Ti-koān.

Kàu 45 hoè ê sî Ji̍t-pún ê chèng-hú ū sù i sin chiong, ia̍h 46 hoè chò Tâi-pak thiaⁿ ê chham-sū, Î-sin Kong-hoē ê kàu-sū, Jîn-chè īⁿ ê uí-oân, kap Hoa-bîn hoē-koán ê kàu-sū. Tuì án-ni lâi khoàⁿ, i m̄ nā pān-lí Kàu-hoē ê sū-bū, í-goā iáu ū chīn la̍t tàu pān pa̍t hāng ê tāi-chì.

漢羅（Ùi原文改寫）

嚴清華Ê小傳

1909.09 294卷 p.73

清華亦名佛仔，伊tī細漢ê時有入小學讀冊，家事不止散，所以到16歲，姑不chiong著退學去hō͘人chhiàⁿ。有佮伊ê頭家相佮去廣東，無久就koh轉--來。到20歲就娶某，hit年偕牧師抵到淡水，伊就去探伊愛討看有頭路抑無。偕牧師chhiàⁿ--伊，hit-tia̍p伊攏m̄ 知聖教ê道理是甚物款。後來漸漸得著偕牧師ê教示，就反悔改變來信主，而且洗禮入教會。án-ni算是北部第一個入教--ê。

後來偕牧師接納伊做學生教示道理，無久就去做傳道，有tiàm 幾若位ê拜堂。到26歲ê時合偕牧師四界設教；到31歲就鬥教大學，做大學ê先生；到34歲有升做牧師；對hit-tia̍p了後攏是tiàm tī淡水幫贊偕牧師料理教會ê事務；到50歲致病，對hit-tia̍p了後身體較lám ，做工較少，淡薄鬥教大學合巡視教會nā-tiāⁿ。

Tī今年5五月間合劉牧師去巡宜蘭ê教會，倒轉來無幾日病勢較傷重，有chò-lī佮phuì 血，宋醫生不止盡力teh kā 醫治，總是無法--tit。到6月2號過往，今年抵58歲，信主有38年久，做牧師24年。

伊一生常常佮官交陪，官場ê事伊不止知影。Tī 18歲ê時bat運糧去北京，有得著賞五品軍功合即補縣丞；tī 33歲ê時台灣ê巡撫kā 伊保奏chīn sian 守備兼守南陵；亦tī 43歲ê時，唐撫台有kā 伊保奏候選知縣。

到45歲ê時日本ê政府有賜伊紳章，亦46歲做台北廳ê參事，Î-sin公會ê教士，仁濟院ê委員，kap華民會館ê教士。對án-ni來看，伊m̄-nā辦理教會ê事務，以外iáu有盡力鬥辦別項ê事誌。