梁沈先生小傳

Niû Tîm Sian-seⁿ Sió-toān

文獻資訊

項目	資料
作者	無lo̍h名
卷期	台南府城教會報
卷期	第290卷
日期	1909/5
頁數	38

白話字（原文數位化）

Niû Tîm Sian-seⁿ Sió-toān

1909.05 290 koàn p.38

Sian-seⁿ sī sio̍k Chiang-hoà Kàu-hoē Siù-chuí chng ê lâng. Chhut-sì tī Bêng- tī 11 nî. Lāu-pē sī choh-sit lâng, só͘-í Sian-seⁿ chū-sè iā sī choh-sit, m̄ bat tha̍k chheh. Kàu 16 hoè ê sî tit-tio̍h tō- lí, sī in-uī sit-tiûⁿ kap sìn Chú ê lâng ê sit-tiûⁿ chò hoé; tuì án-ni thiaⁿ-tio̍h Ki-tok ê hok-im chiū hoán-hoé lâi pài Siōng-tè. Jī-cha̍p hoè ji̍p Kàu-hoē, 21 hoè chhoā Sian-seⁿ-niû. Tī kàu-hoē put- chí jia̍t-sim, soà hō͘ hoē-iú kéng i tng tiúⁿ-ló ê chit.

āu-lâi lâng khoàⁿ i chin oa̍h-tāng, chiū kí-chiàn i ji̍p Toā-o̍h. Tī o̍h-lāi siū kà-sī 3 nî chiū chhut lâi chò Oân-lí ke kàu-hoē thoân tō-lí kap kà o̍h ê kang chi̍t nî kú; iā put-chí ū lī-ek kàu-hoē kap hia ê ha̍k-seng-á. Chū koh ji̍p Toā-o̍h chi̍t nî kú, chiah chut-gia̍p khì chò Kheⁿ-kháu kàu-hoē ê Sian-seⁿ. Toà hia nî poàⁿ kú chiū jiám-tio̍h hì-pēⁿ, chia̍h io̍h bô sáⁿ kong-hāu. Kàu-sū-hoē phài i khì toà Lo̍k-káng, sī hái-kháu ê só͘-chāi; in-uī teh ǹg-bāng i ê pēⁿ ē hó; chóng-sī pēⁿ-sè ná siong-tiōng, chiū chiām-sî thêng kang tńg-khì.

Kàu kin-nî 2 goe̍h 23 hō chiū hō͘ Chú tiàu tò-khì. Taⁿ i thoat-lī sè-kan ê kan- khó͘, thang kap Chú saⁿ-kìⁿ; m̄-kú i ū saⁿ ê gín-á iáu sè-hàn, Sian-seⁿ-niû beh kâⁿ kàu toā, chin-chiàⁿ sī uî-lân. Taⁿ chhiáⁿ khoàⁿ pò ê lâng thè in kî-tó Siōng-tè, hō͘ hiah ê gín-á kàu toā-hàn ē tit chò I ê kng-teng.

漢羅（Ùi原文改寫）

梁沈先生小傳

1909.05 290卷 p.38

先生是屬彰化教會秀水庄ê人。出世tī明治11年。老父是作穡人，所以先生自細也是作穡，m̄ bat讀冊。到16歲ê時得著道理，是因為穡場kap信主ê人ê穡場做伙；tuì án-ni聽著基督ê福音就反悔來拜上帝。20歲入教會，21歲娶先生娘。Tī教會不止熱心，續hō͘會友敬伊當長老ê職。

後來人看伊真活動，就舉薦伊入大學。Tī學內受教示3年就出來做灣裡家教會傳道理kap教學ê工一年久；也不止有利益教會kap hia ê學生--仔。自koh入大學一年久，chiah卒業去做坑口教會ê先生。Toahià年半久就染著肺病，食藥無啥功效。教師會派伊去toà鹿港，是海口ê所在；因為teh 向望伊ê病會好；總是病勢那傷重，就暫時停工轉--去。

到今年2月23號就hō͘主召轉--去。今伊脫離世間ê艱苦，thang kap主相見；m̄-kú伊有3個囡仔iáu細漢，先生娘beh kâⁿ 到大，真正是為難。今請看報ê人替in祈禱上帝，hō͘ hiah ê囡仔到大漢會得做伊ê光燈。