反悔

Hoán-hoé

文獻資訊

項目	資料
作者	無lo̍h名
卷期	台南府城教會報
卷期	第289卷
日期	1909/4
頁數	26

白話字（原文數位化）

Hoán-hoé

1909.04 289 koàn p.26

Kuí-nā nî chêng tī Eng-kok ê sai- lâm pêng ū chi̍t chiah chûn hoān-hong, hō͘ hong-éng phah khì hái-kîⁿ, khò-tio̍h chhián, chiū tiâu tī-hia bē kiâⁿ. Ná-kú ná hō͘ hái-soa im-tîm chha-put-to bô thang ǹg-bāng koh phû thang kiâⁿ chhut-khì. Chóng-sī tán kàu chuí teh- beh koh toā tīⁿ, hit-sî lâng tī sì-piⁿ khui kau ǹg-bāng hái-chuí lâu ji̍p-lâi thang hō͘ chûn phû chhut-khì.

Kàu chuí teh toā tīⁿ hit ji̍t chin chē lâng khiā tī hái-kîⁿ teh khoàⁿ. In khoàⁿ chuí ná-kú ná-chhim, chóng-sī chûn iû- goân tiâu-teh. Kàu boé hiah ê lâng hut-jiân-kan toā siaⁿ hán tah-chhiú-chiúⁿ teh toā hoaⁿ-hí. Sī sím-mi̍h iân-kò͘? Sī chûn ū kiâⁿ chhut hái-bīn bô? M̄-sī. Sī chûn ū phû soá uī bô? iā m̄-sī. Nā-sī án-ni lâng teh toā siaⁿ hán, sī hoaⁿ-hí sím-mi̍h tāi-chì leh! Khiok sī kan-ta in-uī khoàⁿ-kìⁿ hit chiah chûn teh sió- khoá tín-tāng nā-tiāⁿ.

Phì-lūn lâng hoān-choē ná-chún chhin-chhiūⁿ hit chiah chûn hoān-hong khò chhián, hō͘ soa ná-im ná-tîm, teh beh hāi-khì. Chóng-sī lâng khui-thiah tō-lí hō͘ i ū lō͘, iū-kiam Siōng-tè ê in- tián lâi uî i, kàu-boé i ê sim nā sió-khoá kám-tōng lâi hoán-hoé chiū tī Siōng-tè kap thiⁿ-sài ê bīn-chêng uī-tio̍h i lâi hoaⁿ-hí iā sī án-ni.

漢羅（Ùi原文改寫）

反悔

1909.04 289卷 p.26

幾若年前tī英國ê西南爿有一隻船犯風，hō͘風湧扑去海墘，靠著 淺，就tiâu tī-hia bē行。那久那hō͘海沙淹沈差不多無thang 向望koh浮thang行出去。總是等到水teh beh koh大tīⁿ，hit時人tī四邊開溝向望海水留入--來thang hō͘船浮出去。

到水teh大 tīⁿ hit日真濟人企tī海墘teh看。In看水那久那深，總是船猶原tiâu-teh。到尾hiah ê人忽然間大聲喊搭手掌teh大歡喜。是甚mih緣故？是船有行出海面無？M̄是。是船有浮徙位無？也m̄是。若是án-ni人teh大聲喊，是歡喜甚mih代誌leh！卻是kan-ta因為看見hit隻船teh小可振動nā-tiāⁿ。

譬論人犯罪那準親像hit隻船犯風靠淺，hō͘沙那淹那沈，the beh害去。總是人開拆道理hō͘伊有路，又兼上帝ê恩典來圍伊，到尾伊ê心若小可感動來反悔就tī上帝kap天使ê面前為著伊來歡喜也是án-ni。