鐵車路
Thih-chhia-lō͘
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第243張 |
| 日期 | 1905/6 |
| 頁數 | 63 |
白話字（原文數位化）
Thih-chhia-lō͘
1905.06 243 koàn p.63
Tī 5 goe̍h 15 hō Hoé-chhia-lō͘ ū khui Thàu kàu Hô͘-lô͘-tun-ke. Tuì hia kàu Pek-kong-kheⁿ tio̍h koè Tāi-kah kap Tāi-an nn̄g tiâu khe. Hit chām tāi-iok ū nn̄g phò͘ goā lō͘ ê hn̄g; hit chām nā chō chheng-chhó chiū tuì Táⁿ-káu kàu Ke-lâng-thâu lóng ū thih-chhia-lō͘. Hit chām chō iáu-boē hó, kú ū chō nn̄g tiâu ê Kheng-piān chhia-lō͘ chin hó-ēng.
Hiān-sî tuì Tâi-lâm pak ê chá-chhia Sī 6 tiám cheng hoat, hit mê 9 tiám cheng chiū kàu Tâi-pak; án-ni Tâi-lâm kàu Tâi-pak chi̍t ji̍t chiū kàu uī.
Lâng nā beh khì Chiang-hoà, 6 tiám tuì Tâi-lâm khui, tī 11 tiám chhut 34 hun chiū kàu Chiang-hoà. Beh tò-tńg- lâi, hoé-chhia 3 tiám-poàⁿ tuì Chiang- hoà hoat iā hit mê 9 tiám chhut 7 hun chiū kàu Tâi-lâm. án-ni Tâi-lâm kàu Chiang-hoà lâng-kheh chi̍t ji̍t ē-tit phah óng-hoê, iā tī Chiang-hoà ū sì tiám cheng kú thang tī-hia pān tāi-chì. Chheng-kok-sî beh chò chit hō tāi-chì tio̍h 8 ji̍t kú chiū chò ē-tit chiâⁿ.
Chiang-hoà ê pak-pêng 4 phò͘ chiū- sī Hô͘-lô͘-tun. Hô͘-lô͘-tun lī Toā-siā pài- tn̂g nn̄g lí lō͘ nā-tiāⁿ. Nā ū lâng beh tuì Tâi-lâm kàu Hô͘-lô͘-tun, chiū-sī 24 phò͘, chi̍t ji̍t kú iû-goân thang phah óng-hoê iā tī Hô͘-lô͘-tun ū poàⁿ tiám- cheng kú thang pān tāi-chì. án-ni óng-hoê 48 phò͘. Chá-chêng tio̍h 10 ji̍t kú, taⁿ nā-sái chi̍t ji̍t chiū hó.
Nā beh tuì Tâi-lâm khì Ka-gī, thâu pang chhia sī chá-khí-sî 8 tiám chhut 9 hun chiū kàu Ka-gī; beh tò-tńg-lâi, tuì Ka-gī boé pang chhia sī 6 tiám chhut 58 hun chiah hoat. án-ni beh khì Ka-gī thang phah óng-hoê, iā tuì chá-khí 8 tiám 9 hun kàu ê-hng-sî teh- beh 7 tiám cheng thang chē hoé-chhia tò-tńg-lâi Hú-siâⁿ.
漢羅（Ùi原文改寫）
鐵車路
1905.06 243卷 p.63
Tī 5月15號火車路有開透到葫蘆敦 街。Tuì hia到百公坑著過大甲kap大安兩條溪。Hit站大約有二舖 外路ê遠；hit站若造清楚就tuì打狗到基隆頭攏有鐵車路。Hit站造iáu-boē好，kú有造兩條ê 輕便車路真好用。
現時tuì台南北ê早車是6點鐘發，hit瞑9點鐘就到臺北；á- ni台南到臺北一日就到位。
人若beh去彰化，6 點tuì台南開，tī 11 點出34分就到彰化。Beh倒轉--來，火車3點半tuì彰化發也hit瞑9點出7分就到台南。án-ni台南到彰化人客一日會tit打往回，也tī 彰化有4點鐘久thang tī hia辦代誌。清國時beh做這號代誌著8日久就做會tit成。
彰化ê北爿4舖就是葫蘆敦。葫蘆敦離大社拜堂二裏路nā tiāⁿ。若有人beh tuì台南到葫蘆敦，就是24舖，一日久猶原thang打往回也tī 葫蘆敦有半點 鐘久thang辦代誌。án-ni 往回48 舖。早前著10日久，今若sái一日就好。
若beh tuì台南去嘉義，頭班車是早起時8點出9分就到嘉義；beh到轉--來，tuì嘉義尾班車是6點出58分才發。án-ni beh去嘉義thang打往回，也tuì早起8點9分到 e昏時teh-beh 7點鐘thang坐火車倒轉--來府城。