清國打扮
Chheng-kok táⁿ-pān
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第213張 |
| 日期 | 1902/12 |
| 頁數 | 96 |
白話字（原文數位化）
Chheng-kok táⁿ-pān
1902.12 213 koàn p.96
Tâi-oân iáu-boē hō͘ Ji̍t-pún koán ê sî, Tâi-oân lâng lóng sī Chheng-kok táⁿ-pān, bô chhin-chhiūⁿ hiān-sî án-ni, ū-ê chián thâu-chang, ū-ê bô. Chián thâu-chang sī o̍h Ji̍t-pún lâng, pīⁿ thâu-chang sī chiàu Chheng-kok khoán Chiàu Chheng-kok khoán ê lâng iáu-kú chin chē; nā mn̄g chiah-ê siàu-liân lâng khoàⁿ chit-hō khoán sī tuì tó-uī lâi, kan-ta chai lâng ū hō͘ Chheng-kok koán, só͘-í chiah án-ni , chóng m̄-chai Chheng-kok lâng án-choáⁿ-iūⁿ thâu-khak ài pīⁿ chi̍t-ê thâu-chang boé.
Ū ló-poè ê lâng teh kóng, sī in-uī chá-chêng Boán-chiu sio̍k Tiong-kok , Boán ông ū chhe jîn-sîn toà lé-mi̍h lâi chìn-kòng Tiong-kok . Tiong-kok ê tāi- sîn ài chhòng-tī i, chiū kā i thì-thâu, pīⁿ mn̂g-boé, chò tn̂g-saⁿ hō͘ i chhēng, ū chêng-pó͘ āu-pó͘, chhòng bé-tê ńg, koà sò͘-chu, chhēng o͘-hia, tì téng-tài ū koà iaⁿ. Kā i kóng, Chit-khoán chin hó-khoàⁿ, goán ê Hông-tè ài chiong án-ni pò-siúⁿ lí .
Boán-chiu ê jîn-sîn tò-khì chin tek-ì, Boán ông khoàⁿ-liáu iā hoaⁿ-hí, chiū bēng-lēng peh-sìⁿ thâu-mn̂g tio̍h thì, thâu-chang tio̍h pīⁿ. Boán-chiu lâng khoàⁿ chit-hō chò thé-biān, kî-si̍t sī teh lêng-jio̍k in, in-uī Tiong-kok lâng khoàⁿ in chò cheng-siⁿ , pí-phēng in chò bé. Hit-niá saⁿ kā-chiah ū pó͘-koà, sī pí-phēng bé-oaⁿ . Heng-chêng ū sò͘-chu sī pí-phēng bé-le̍k-soh. Chhiú-ńg e̍h-e̍h koà chiam-so koh tò-pih sī chhin-chhiuⁿ bé-tê; kha-chhēng o͘-hia iā-sī án-ni . Thâu tì téng-tài ū koà iaⁿ, sī ná bé-chang, thâu-chang boé sī ná bé-boé . Lâng chhēng chit-hō khoán , nā phak- lo̍h-khì, tú-tú ná chhin-chhiūⁿ bé.
Put-hēng Tiong-kok soà sio̍k Boán- chiu, kok hō Chheng-tiâu, Chheng ông bēng-lēng koaⁿ-hú lóng tio̍h chiàu chit- hō ê táⁿ-pān, peh-sìⁿ iā tio̍h o̍h Boán- chiu khoán . Ta-po͘ lâng iàu-kín tio̍h thì-thâu, pīⁿ thâu-chang. Tuì chit-ê tāi-chì hō͘ lán thang chai, Lêng-jio̍k pa̍t-lang8 sī lêng-jio̍k ka-tī.
漢羅（Ùi原文改寫）
清國打扮
1902.12 213卷 p.96
台灣iáu-boē hō͘ 日本管ê時，台灣人攏是清國打扮，無親像現時án-ni，有ê 剪頭鬃、有ê無。剪頭鬃是學日本人，pīⁿ頭鬃是照清國款。照清國款ê人iáu-kú真濟；若問chiah ê少年人看這號款式tó位來，kan ta 知人有hō͘清國管，所以chiah án-ni，總 m̄ 知清國人án-choáⁿ樣頭殼ài pīⁿ一個頭鬃尾。
有老輩ê人teh講，是因為早前滿洲屬中國，滿王有差人臣帶禮物來進貢中國。中國ê大臣ài創治伊，就kā伊剃頭，pīⁿ 毛尾，做長衫hō͘伊穿，有前補後補，創馬蹄ńg ，掛素珠，穿烏靴，tì頂戴有掛纓。Kāu伊講：「這款真好看，阮 ê 皇帝ài將án-ni報賞--你。」
滿洲ê人臣倒去真得意，滿王看了也歡喜，就命令百姓頭毛著剃， 頭鬃著pīⁿ。滿洲人看這號做體面，其實是 teh凌辱in，因為中國人看in做畜生，比並in做馬。Hit領衫kā-chiah有補掛，是比並馬鞍。胸前有素珠是比並馬勒索。手ńg隘隘掛針梭koh倒pih是親像馬蹄；腳穿烏靴也是án-ni。頭戴頂戴有掛纓，是若馬鬃，頭鬃尾是若馬尾。人穿這號款，若仆落去，tú-tú若親像馬。
不幸中國煞屬滿洲，國號清朝，清王命令官府攏著照這號ê打扮，百姓也著學滿洲款。查甫人要緊著剃頭、pīⁿ頭鬃。Tuì這個代誌hō͘咱thang知，凌辱別人是凌辱家己。