傳道會

Thoân-tō-hoē

文獻資訊

項目	資料
作者	無lo̍h名
卷期	台南府城教會報
卷期	第212張
日期	1902/11
頁數	84-85

白話字（原文數位化）

Thoân-tō-hoē

190211 212 koàn p.84

Chit 11 goe̍h 7 hō (10:8) Ka-gī sio̍k ê Thoân-tō-hoē chū-chi̍p tī Gû-taⁿ-oan pài-tn̂g. Lâi hù Hoē--ê chiū-sī Khó͘ Tiâu-iông, Chiu Chú-keng, Lîm Sè-thoân, N̂g Bō͘-sēng; Tiúⁿ-ló, N̂g O͘-phoê; iā ū hiaⁿ-tī kuí-nā lâng chê-chi̍p.

1. Khó͘ Tiâu-iông chò Chú-lí, tha̍k Iok-hān 15:1-9, hun chò 4 hāng. (1) Phô-tô-chhiū sī chí Iâ-so͘. (2) Koán-hn̂g--ê sī chí Siōng-tè. (3) Ki sī chí I-ê peh-sìⁿ. (4) Ki ē kiat-chí sī ū liân tī Chú. Káng-lūn bián-lē bêng-pe̍k chiū kî-tó.

2. Ū chih-tio̍h Lîm Io̍k-kî ê phoe, kóng-khí i bē tit lâi hù hoē, sī in-uī Táu-la̍k hiān-sî teh khí pài-tn̂g. iā ū chih-tio̍h i-ê lūn. Koh ū chih-tio̍h N̂g Chhoan-pe̍k ê phoe, in-uī i-ê seng-khu phoà-pīⁿ bē tit lâi hù hoē.

3. Lîm Sè-thoân tha̍k Lîm Io̍k-kî ê lūn. Tê-ba̍k chiū-sī Má-thài 13: 51, 52 chat. Chit nn̄g chat. Chit nn̄g chat sī Iâ-so͘ tī Ka-lī-lī ê hái-piⁿ kà-sī lâng, ū siat 7 ê phì-jū, jî-hō͘ tuì ha̍k-seng só͘ kóng--ê. Thang kóng sī 7 ê phì-jū kà-sī lâng liáu, kiaⁿ I-ê ha̍k-seng bē bêng-pe̍k, chiū mn̄g ha̍k-seng khoàⁿ ē-hiáu-gō͘ á bē? Ha̍k-seng ìn kóng, Ē. Iâ-so͘ tuì án-ni chiū kā in kóng, Hoān-nā beh thoân-chhut thian-kok ê tō-lí, tio̍h chiàu sím-mi̍h khoán, iā sī hō͘ in chai tio̍h tuì tó-uī the̍h-chhut. Só͘-í Iâ-so͘ kā tha̍k-chheh-lâng o̍h thian-kok ê tō-lí, á-sī thâu-ke tuì khò͘-pâng lāi the̍h-chhut sin-kū ê mi̍h. Taⁿ chiong 52 chat kí-khí kuí-nā kù lâi siūⁿ khoàⁿ ū sím-mi̍h ì-sù.

I. Khò͘-pâng sī sím-mi̍h? (1) Sī chí Siōng-tè ê Sèng-chheh. (2) Sī chí Siōng-tè ê lô͘-po̍k ê sim.

II. Sim ê khò͘-pâng só͘ khǹg ê mi̍h sī tuì tó-uī lâi? (1) Káng-kiù Sèng-keng lâi tit-tio̍h--ê. (2) Ka-tī só͘ keng-koè lâi tit-tio̍h--ê. (3) Tuì pa̍t-lâng só͘ keng-koè lâi tit-tio̍h--ê.

III. Sim tio̍h the̍h-chhut sī sím-mi̍h? (1) Kū-ê, sī chí lán bat ēng ê mi̍h, kū-sî só͘ káng-kiù--ê. (2) Sin--ê, sī chí lán boē bat ēng ê mi̍h, hiān-sî koh káng-kiù--ê.

1. Káng kiù in-tián ê tō-lí. (1) Lūn cháiⁿ-iūⁿ hō-chò sī in-tián. (2) Lūn Siōng-tè in-tián lâng sím-mi̍h. (3) Lūn siū in-tián ê lâng sím-mi̍h khoán.

2. Sî kàu Chú-lí kî-tó chiām-thêng.

3. Ē-po͘ nn̄g tiám cheng hun chò sì-tuī chhut-mn̂g thàm hiaⁿ-tī.

4. Ê-hng peh tiám cheng koh chū-chi̍p, N̂g Bō͘-sēng chò Chú-lí. Tha̍k Sù-tô͘ 15: 1-21, kî-tó.

5. Hiaⁿ-tī ū tāi-chì tio̍h chhap á m̄-thang chhap? Tāi-ke gī-lūn hoān tāi-chì ū-ê thang chhap, iā ū-ê m̄-thang chhap. Chóng-sī lán tio̍h chim-chiok.

6. Gī-lūn kuí-nā hāng tio̍h khó͘-khǹg hiaⁿ-tī chhiat-chhiat m̄-thang chò. (1) Sè-sio̍k lâng pâi-toâⁿ hàu-kuí, lán hiaⁿ-tī m̄-thang ēng mi̍h chioh--i, iā m̄-thang thè i chioh mi̍h. (2) Chhin-chhek pêng-iú lâi lán tau, lán m̄-thang ēng a-phiàn chhiáⁿ--i, iā m̄-thang thè i pī-pān chia̍h a-phiàn ê ke-si-thâu. (3) M̄-thang hō͘ sè-sio̍k lâng kià bé kim-hiuⁿ-chek. (4) M̄-thang kuī goā-ke, chò goā-ke ia m̄-thang hō͘ lâng kuī.

7. Sî àm Chú-lí kî-tó chiū thêng.

8. Tē-jī-ji̍t pài-la̍k téng-po͘ 9 tiám cheng koh chū-chi̍p, Chiu Chú-keng chò Chú-lí, tha̍k Lô-má 1: 13-15, ēng 14 chat chò tê. (1) Hêng chè sī eng-kai tio̍h. (2) Chè hêng-liáu sim chiū pêng-an. Káng-lūn liáu kî-tó.

9. Gī-lūn āu-hoē tī sin-nî kū-le̍k 3 goe̍h thâu chi̍t lé-pài koè-khì ê pài-sì, tio̍h chê kàu Giâm-chêng, pài-gō͘ beh chū-chi̍p.

10. Gī-lūn āu-hoē chhiáⁿ Chiu Chú-keng chò lūn. Tê-ba̍k Iok-hān 2: 1-11.

11. Gī-lūn sū-hoē beh káng-kiù ê Sèng-keng chiū-sī Lô-má 8: 1, 2.

12. Tē-saⁿ ji̍t lé-pài-ji̍t téng-po͘ kap hiaⁿ-tī chí-moē lé-pài, ēng kuí-kù bián-lē an-uì.

13. Ē-po͘ kap hiaⁿ-tī chí-moē chò kî-tó-hoē.

14. Ê-hng 8 tiám cheng koh chū-chi̍p. Lîm Sè-thoân chò Chú-lí, tha̍k I Ko-lîm-to 11: 1-16, ēng 1 chat kà-sī bián-lē liáu kî-tó.

15. Bô chih-tio̍h Chiu iāu-chhái sian-siⁿ ê phoe, iā bô khoàⁿ-kìⁿ i lâi, tāi-ke chin ut-chut. Gī-lūn thok-tiōng Kì-sū siá-phoe mn̄g māi-teh.

16. Thiaⁿ Kì-sū tha̍k só͘-kì--ê, chún kì-chiūⁿ chheh. Chú-lí kî-tó,sì-soàⁿ.

Chit-pang Thoân-tō-hoē ê hoé-si̍t sī Gû-taⁿ-oan kuí-nā tng-chit kap kuí-nā hiaⁿ-tī siat-hoat chhiáⁿ goán; taⁿ ài kā in soeh siā.

Koh kóng kuí-nā kù hō͘ lín lia̍t-uī thang an-sim. In-uī goá tuì Thoân-tō-hoē tò-lâi ê sî tē-jī ji̍t ū chih-tio̍h Chiu iāu-chhái sian-siⁿ ê phoe, teh mn̄g sím-mi̍h sî Thoân-tō-hoē; án-ni put-kò sī bē-kì-tit nā-tiāⁿ, bô pa̍t-mi̍h in-toaⁿ.

漢羅（Ùi原文改寫）

傳道會

190211 212卷p.84

這11月7號(10：8)嘉義屬的傳道會聚集佇牛擔灣拜堂。來赴會--的就是許朝陽，周主經，林世傳，黃茂盛；長老，黃烏皮；也有兄弟幾若人齊集。

1. 許朝陽做主理，讀約翰15：1-9，分做4項。(1) 葡萄樹是指耶穌。(2)管園--的是指上帝。(3) 枝是指伊的百姓。(4) 枝會結籽是有連佇主。講論勉勵明白就祈禱。

2. 有接著林Io̍k-kî 的批，講起伊袂得來赴會，是因為斗六現時teh起拜堂。也有接著伊的論。閣有接著黃Chhoan-pe̍k 的批，因為伊的身軀破病袂得來赴hoē。

3. 林世傳讀林Io̍k-kî 的論。題目就是馬太13：51，52節。這兩節。這兩節是耶穌佇加利利的海邊教示人，有設7 个譬喻，而後對學生所講--的。通講是7个5譬喻教示人了，驚伊的學生袂明白，就問學生看會曉悟抑袂？學生應講，會。耶穌對按呢就共in講，凡若欲傳出天國的道理，著照啥物款，也是予in知著對佗位the̍h出。所以耶穌共讀冊人學天國的道理，抑是頭家對庫房內the̍h出新舊的物。Taⁿ將52節指起幾若句來想看有啥物意思。

I. 庫房是啥物？(1)是指上帝的聖冊。(2)是指上帝的奴僕的心。

II. 心的庫房所囥的物是對佗位來？(1)講究聖經來得著--的。(2)家己所經過來得著--的。(3)對別人所經過來得著--的。

III. 心著the̍h出是啥物？(1)舊的，是指咱捌用的物，舊時所講究--的。(2) 新--的，是指咱袂捌用的物，現時閣講究--的。

1. 講究恩典的道理。(1)論怎樣號做是恩典。(2)論上帝恩典人啥物。(3)論受恩典的人啥物款。

2. 時到主理祈禱暫停。

3. 下晡兩點鐘分做四隊出門探兄弟。

4. 下昏八點鐘閣聚集，黃茂盛做主理。讀使徒15：1-21，祈禱。

5. 兄弟有代誌著chhap抑毋通chhap？大家議論犯代誌有的通chhap，也有的毋通chhap。總是咱著斟酌。

6. 議論幾若項著苦勸兄弟切切毋通做。(1)世俗排壇孝鬼，咱兄弟毋通用物借--伊，也毋通替伊借物。(2)親戚朋友來咱兜，咱毋通用鴉片請--伊，也毋通替伊備辦食鴉片的家私頭。(3)毋通予世俗人寄買金香燭。(4)毋通跪外家，做外家也毋通予人跪。

7. 時暗主理祈禱就停。

8. 第二日拜六頂晡9點鐘閣聚集，周主經做主理，讀羅馬1：13-15，用14節做題。(1)還債是應該著。(2) 債還了心就平安。講論了祈禱。

9. 議論後會佇新年舊曆3月頭一禮拜過去的拜四，著齊到Giâm-chêng，拜五欲聚集。

10. 議論後會請周主經做論。題目約翰2：1-11。

11. 議論事會欲講究的聖經就是羅馬8：1，2。

12. 第三日禮拜日頂晡佮兄弟姊妹禮拜，用幾句勉勵安慰。

13. 下晡佮兄弟姊妹做祈禱會。

14. 下昏8點鐘閣聚集。林世傳做主理，讀哥林多前書11：1-16，用1節教示勉勵了祈禱。

15. 無接著周耀彩先生的批，也無看見伊來，大家真鬱卒。議論託重記事寫批問māi-teh。

16. 聽記事讀所記--的，準記上冊。主理祈禱，四散。

這pang傳道會的伙食是牛擔灣幾若當職佮幾若兄弟設法請阮；taⁿ愛共in說謝。

閣講幾若句予恁列位通安心。因為我對傳道會倒來的時第二日有接著周耀彩先生的批，teh問啥物時傳道會；按呢不過是袂記得nā-tiāⁿ，無別物因端。