廈門的火災
Ē-mn̂g ê Hoé-chai
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第211張 |
| 日期 | 1902/10 |
| 頁數 | 75 |
白話字（原文數位化）
Ē-mn̂g ê Hoé-chai
1902.10 211 koàn p.75
Goá tī pún-goe̍h chhe-peh-ji̍t, ū chiap-tio̍h Ē-mn̂g ê Tiúⁿ-ló Khó͘ Bûn-gâm chhe 3 siá ê phoe, kóng chhe-jī-ji̍t, téng-po͘ cha̍p-tiám-cheng, Ē-mn̂g Koan-tè-biō chêng Chio̍h-tiâⁿ-ke sit-hoé. Tuì 10 tiám-cheng khí sio kàu poàⁿ-mî 11 tiám hoé chiah lo̍h-tē, kiōng sio 13 tiám-cheng ê kú. Só͘ sio-khì ê tiàm kiōng ū chheng-goā keng ê chó-iū; ke-chhī toā-sió iok ū 30 goā tiâu. Hái-kîⁿ Tek-kì-lī-sū iûⁿ-hâng iā soà sio-sio khì.
Thong Ē-mn̂g chha-put-to khì chi̍t-poàⁿ. Chāi Ē-mn̂g toā-sió ê chheh-tiàm, kiōng ū jī-cha̍p-goā keng, chí ū sio chhun kàu-hoē-lāi ê 2 keng, chiu-sī Poê-bûn-chai oa̍h-pán-sià, kap Bûn-gâm tiúⁿ-ló in chhe-kū ê chio̍h-ìn-tiàm.
Hāiⁿ-ah! chhám-ah! khó-lîn-ah! chit-pang kàu-iú tú-tio̍h che hoé-chai, tāi-iok liáu ū cha̍p-goā bān gîn. Kè-kiōng só͘ sio--ê iok ta̍t chheng-goā-bān gîn.
Kàu thiⁿ-kng chiū khoàⁿ-kìⁿ sin-si hoat-hiān ê jī-cha̍p-goā lâng. Koh hit-tia̍p teh sio Tek-kì-lī-sū iûⁿ-hâng ê sî ū toā-chiah hoé-chûn ê chûn-tiúⁿ iā tī-hia tàu-phah-hoé; bô phah-sńg hoé tuì lâu-kha hoat, lâu hām-lo̍h-khì, chûn-tiúⁿ iā soà sio-sí; chin khó-lîn. Lán ê Sòng Bo̍k-su hit-sî iā tī hit-keng lâu tàu-phah-hoé, chóng-sī cháu-lī pêng-an bô-sū; che chin thang kám-siā Siōng-tè. Koh tī Ē-mn̂g ū sì-gō͘ keng ê lé-pài-tn̂g, iā ū i-seng-koán lóng bô sū; che iā sī chin hoaⁿ-hí kám-siā Chú ê in-tián.
Taⁿ goān Siōng-tè chān in ê khuì-la̍t, sim-koaⁿ bô loé-chì; keng-koè chhì-liān liáu-āu ho̍k-sāi Chú ná kian-kò͘, jia̍t-sim toè Chú khí-thâu kàu soah-boé: sī sim só͘ goān.
Gô͘ Tō-goân siá ê.
漢羅（Ùi原文改寫）
廈門的火災
1902.10 211卷p.75
我佇本月初八日，有接著廈門的長老許文岩初3寫的批，講初二日，頂晡十點鐘，廈門關帝廟前石埕街失火。對10點鐘起燒到半暝11點火才落地，共燒13點鐘的久。所燒去的店共有千外間的左右；街市大小約有30外條。海墘Tek-kì-lī-sū洋行也紲燒燒去。
通廈門差不多去一半。在廈門大小的冊店，共有二十外間，只有燒偆教會內的 2間，就是培文齋活版舍，佮文岩長老in妻舅的石印店。
Hāiⁿ-ah！慘-ah！可憐-ah！這-pang教友拄著這火災，大約了有十外萬銀。計共所燒--的約達千外萬銀。
到天光就看見身屍發現的二十外人。閣彼tia̍p teh燒Tek-kì-lī-sū洋行的時有大隻火船的船長也佇遐鬥拍火；無拍損火對樓跤發，樓陷落去，船長也紲燒死；真可憐。咱的宋牧師彼時掖佇彼間樓鬥拍火，總是走離平安無事；這真通感謝上帝。閣佇廈門有四五間的禮拜堂，也有醫生館攏無事；這也是真歡喜感謝主的 恩典。
Taⁿ願上帝贊in 的氣力，心肝無餒志；經過試煉了後服事主那堅固，熱心綴主起頭到煞尾：是心所願。
吳道源寫的。