天才會

Thian-châi-hoē

文獻資訊

項目	資料
作者	無lo̍h名
卷期	台南府城教會報
卷期	第209張
日期	1902/8
頁數	59

白話字（原文數位化）

Thian-châi-hoē

1902.08 209 koàn p.59

Lūn Thian-châi-hoē sī chhin-chhiūⁿ lán Tâi-oân Hoa-hoē ê khoán. I-ê kui-kí khiok ū koh iūⁿ, m̄ kú li-khì sī sio-siāng, sǹg-lâi iā sī chèng-kiáu-tiong ê chi̍t-hāng.

Chit ê hoē goân-chiân sī Sió-Lū-sòng choè tē-it seng. Chheng-kok iā ū tām-po̍h. Chóng-sī Sió Lū-sòng tuì kui Bí-kok liáu-āu. chit-hō pè-toan ū chiām-chiām teh sàu-tû, kàu chit-tia̍p chha-put-to lóng bô-lah. Khó-sioh Chheng-kok m̄-nā bô ná-kiám, hoán-tńg sī ná-ke; chèng-hú m̄-nā bô kìm-chí, hoán-tńg teh siat-hoat bián-kióng lâng iô. Chit-hō ê só͘ chò. si̍t-chāi ū toā sún-hāi kok-chèng kap bîn-sim.

Chiàu Se-kok ê Sin-bûn-choá teh kóng. Tī bó͘-séⁿ bó͘ chóng-tok in-uī chiàu chèng-hú ê bēng-lēng i ko͘-put-chiong tio̍h bé 2000 tiuⁿ ê Thian-châi-phiò. I pún-sin phah-sǹg, Goá nā tio̍h sêng-siū chiah-chē, goá ê ē-si iā tio̍h kap goá pun-pheⁿ. Só͘-í chiū pun kuí-pah-tiuⁿ hō͘ bó͘-hú, bó͘-koān. āu-lâi bó͘-koān iā chiàu án-ni phah-sǹg, soà pun-pheⁿ hō͘ khah ē-tit-koè ê peh-sèⁿ tàu tam-tng. Chiông-tiong iā ū pun-pheⁿ hō͘ lán sìn Chú ê lâng. Hiān-sî tī hit-pêng kàu-hoē tng-chit ê lâng ū teh chham-siông khoàⁿ eng-kai tio̍h bé, á-sī m̄-bián. Si̍t-chāi sī khì-tò lióng-lân ê só͘-chāi, in-uī nā beh bé, bêng-bêng bô ha̍p chin-lí; nā m̄ bé, koaⁿ-hú chiū hiâm iu bô thé-thiap kok-ka. Chiàu lâng kóng, Siat chit ê hoē sī uī-tio̍h ài tit-tio̍h khah-chē chîⁿ thang chu-chō͘ poê goā-kok khoáⁿ-hāng ê sū.

Ū lâng kóng Ji̍t-pún kok iā beh siat chit ê hoē, m̄-chai ū iáⁿ á-bô? Goán ǹg-bāng chhian-bān m̄-thang ū án-ni.

Goān khoàⁿ Pò ê pêng-iú tio̍h thè Chheng-kok ê hiaⁿ-tī kap pún-sin lâi kî-tó. Kiû Siōng-tè hō͘ Chheng-kok ê hiaⁿ-tī ê tit thoat-lī chit-hō ê chhì-liān; iā kiû Siōng-tè hō͘ lán Tâi-oân m̄-thang tú-tio̍h chit-hō sū: sī sim só͘ goān.

漢羅（Ùi原文改寫）

天才會

1902.08 209卷p.59

論天才會是親像咱台灣Hoa-hoē 的款。伊的規矩卻有閣樣，毋kú理氣是相像，算來也是眾筊中的一項。

這个原前是小呂宋做第一先。清國也有淡薄。總是小呂宋對歸美國了後。這號弊端有漸漸teh掃除，到這tia̍p差不多攏無lah。可惜清國m̄-nā無那減，反轉是那加；政府毋若無禁止，反轉teh設法勉強人iô。這號的所做。實在有大損害國政佮民心。

照西國的新聞紙teh講。佇某省某總督因為照政府的命令伊姑不將著買2000張的天才票。伊本身拍算，我若著承受chiah濟，我的下司也著佮我分-pheⁿ。所以就分幾百張予某府，某縣。後來某縣也照按呢拍算，紲分-pheⁿ予較會得過的百姓鬥擔當。從中也有分-pheⁿ予咱信主的人。現時佇彼爿教會當職的人有teh參詳看應該著買，抑是毋免。實在是去倒兩難的所在，因為若欲買，明明無合真理；若毋買，官府就嫌iu無體貼國家。照人講，設這个會是為著愛得著較濟錢通資助賠外國款項的事。

有人講日本國也欲設這个會，毋知有影抑無？阮向望千萬毋通有按呢。

願看報的朋友著替清國的兄弟佮本身來祈禱。求上帝予清國的兄弟的得脫離這號的試煉；也求上帝予咱台灣毋通拄著這號事：是心所願。