傳道會
Thoân-tō-hoē
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第206張 |
| 日期 | 1902/5 |
| 頁數 | 37 |
白話字（原文數位化）
Thoân-tō-hoē.
Chiang-hoà-koān.
1902.05 206 Koàn p.37
Taⁿ goán ài chiong kū-le̍k saⁿ-goe̍h chhe-cha̍p-ji̍t, tī Chiang-hoà siâⁿ pài-tn̂g thoân-tō-hoē só͘ gī ê sū, lâi pâi-lia̍t tī ē-té hō͘ lín chai：－
Lūn chit-pang lâi hù-hoē ê lâng, chiū-sī Se-kok Bo̍k-su Liâm Tek-lia̍t; thoân-tō ê lâng: Ô͘ Tiāu-ki, Lîm Ha̍k-kiong, Tân Iú-sêng, Chan Toā-niū, Ko Kim-seng, N̂g Teng-hoat. iā ū lâi hù-hoē ê Tiúⁿ-ló Chip-sū kap hiaⁿ-tī: chiū-sī Ka-tang-á, Sin-kiat, Ka-tâu, Chiang-hoà, Lo̍k-káng, kiōng ū cha̍p-chhit lâng.
Chhe cha̍p ê-hng chê-chi̍p, chhiáⁿ Liâm Te̍k-lia̍t chò chú-lí, phài Lîm Ha̍k-kiong chò kì-sū. Koh lûn-liû lé-pài kap gī-lūn só͘ chò ê kang-tiâⁿ.
Cha̍p-it chiū-sī pài-gō͘ 9 tiám-cheng chū-chi̍p thoân-tō hoē; chú-lí Lîm Ha̍k-kiong tha̍k Lô-má jîn-su 12:1. Lūn hiàn seng-khu chò oa̍h chè, lâi chiâⁿ-sèng hō͘ Siōng-tè só͘ hoaⁿ-hí. Lūn bêng-pe̍k chhiáⁿ N̂g Teng-hoat tha̍k lūn chi̍t-phiⁿ, tê-ba̍k Má-thài 13:24-30, tha̍k-liáu kuí-nā lâng koh-chài khí-lâi saⁿ-kap gī-lūn lāi-tiong ê ì-gī, siū-tio̍h chē-chē lī-ek; kàu cha̍p-it tiám-cheng chiū soah. Tuì cha̍p-it-tiám kàu cha̍p-jī-tiám gī-lūn：－
-
Tâi-tiong-koān sio̍k ū chē-chē pài-tn̂g bô thoân-tō--ê thang lâi toà hia, chiū chham-siông chhiáⁿ Lo̍k-káng kap Chiang-hoà thoân-tō--ê chiām-sî lûn-liû lé-pài-ji̍t khì Khe-ô͘ chò lé-pài; chhiáⁿ Kheⁿ-kháu kap Siā-thâu-lūn-á thoân-tō--ê chiām-sî lûn-liû khì Toā-chng chò lé-pài; chhiáⁿ Toā-tun thoân-tō--ê khì Tāi-lí-khit chò lé-pài.
-
Lūn Chiang-hoà I-koán, ū lâng lâi chiū i, nā hoaⁿ-hí siū tō-lí ê lâng, lô-hoân chhiáⁿ I-seng khoàⁿ hit hō lâng sī kīn tī tó chit[sic.] uī ê pài-tn̂g, siá-phoe thong-ti hit uī ê thoân-tō chai, thang khì ín-chhoā i lâi lé-pài.
-
Lūn Thoân tō-lí ê lâng muí lé-pài-lāi só͘ tio̍h chò ê kang-tiâⁿ, chiū-sī thàm hiaⁿ-tī, pò͘-tō, ka-tī káng-kiù Sèng-chheh; chiàu ta̍k lâng só͘ phah-sǹg lâi chīn pún-hūn.
Hā-ngó͘ nn̄g-tiám-cheng koh chū-chi̍p. Tân Iú-sêng chò chú-lí tha̍k Hui-li̍p-pí 2:5. Lūn thé-thiap Iâ-so͘ ê sim; lūn soah, chiū koh gī-lūn：－
-
Tī lé-pài-ji̍t thoân-tō á-sī tng-chit-ê tio̍h siat hó hoat-tō͘, hō͘ hoē-iú lûn-liû tha̍k Sèng-chheh á-sī mn̄g tō-lí ê lâi-le̍k, kà jī-bó, chò kî-tó-hoē lâi lī-ek hiaⁿ-tī.
-
Lūn ta̍k kàu-hoē tê-iân ê sū: tio̍h siūⁿ khoàⁿ ū sím-mi̍h hoat-tō͘ khah-hó, thang hō͘ iân tê khah chìn-pō͘; chhin-chhiūⁿ ēng chhiam-á, á-sī ēng tê hun-siaⁿ, chiàu ta̍k uī tióng-chip ê lâng só͘ siat ê hó hoat-tō͘, lâi ke-thiⁿ chìn-pō͘ chò kàu-hoē ê lī-ek.
-
Lūn ta̍k uī chhut thoân-tō ê sok-kim, khah chē lâng sī kóng chiàu kū-té ê khoán-sit, tuì pún-tông niá, nā bô kàu-gia̍h Kàu-sū-hoē chi-lí kàu chheng-chhó.
-
Kàu sì-tiám cheng kî-tó tāi-ke chhut-mn̂g khì ke-ni̍h pò͘-tō, kàu la̍k-tiám cheng tńg-lâi, tāi-ke lóng hó ki-hoē, lâng chīn ài thiaⁿ.
Cha̍p-jī ji̍t chiū-sī pài-la̍k, káu-tiám-cheng koh chū-chi̍p. N̂g Teng-hoat chò chú-lí tha̍k II Ko-lîm-to 2:14, chò tê-ba̍k lâi lūn, lūn soah gī-lūn tāi-chì.
-
Gī-tēng āu-kî thoân-tō-hoē chiū-sī tī kū-le̍k cha̍p-goe̍h cha̍p-sì ji̍t beh chū-chi̍p tī Sin-kiat-chng lé-pài-tn̂g.
-
Gī-tēng kéng Sèng-keng Thê-to saⁿ chiuⁿ chhiáⁿ Ko Kim-seng chò chi̍t-phiⁿ lūn, āu-kî lâi tha̍k. Gī-lūn soah kî-tó chiū chiām-thêng.
Hā-ngó͘ chū-chi̍p kî-tó chiū sì-soàⁿ hun-pan khì ta̍k chng thàm hiaⁿ-tī.
Cha̍p-saⁿ ji̍t chiū-sī lé-pài-ji̍t, chhiáⁿ Tân Iú-sêng, Ô͘ Tiāu-ki chò téng-po͘ ê toā lé-pài; Ko Kim-seng, N̂g Teng-hoat chò hā-ngó͘ ê toā lé-pài, chiū-sī tī I-koán ê lé-pài-tn̂g chò lé-pài, só͘ lâi lé-pài ê lâng-gia̍h kap tī I-koán ê pēⁿ-lâng nn̄g pah goā lâng; tāi-ke siū lī-ek chīn-chē. Kàu pài-it tāi-ke sì-soàⁿ.
Chhiáⁿ khoàⁿ pò lia̍t-uī ê hoē-iú, thè chit ê Tâi-tiong sio̍k ê kàu-hoē I-koán ê pēⁿ-lâng lâi kî-tó, hō͘ goán chit pang chū-chi̍p tit-tio̍h toā lī-ek.
Hōng-soaⁿ-koān.
Tī 4 goe̍h 17 hō (3:10) Ông Hi-hiân, Gô͘ Bûn-pin, Chhî Chhun-ki, Tiō Sî-hoê, Ko Tok-hêng, Chhoà Ní-sûn[sic.] téng, chê-chi̍p tī Bān-tan-ke lé-pài-tn̂g chò Thoân-tō-hoē.
Chhe 10 ê-hng Ông Hi-hiân lé-pài, tha̍k Hēng-toān 2:2-4.
Cha̍p it chá-khí 7 tiám cheng Chhî Chhun-ki lé-pài, tha̍k Iok-hān 13:34, 35.
Téng-po͘ 9 tiám cheng chū-chi̍p, kí Ông Hi-hiân chò chú-lí, tha̍k Hui-li̍p-pí 2:4, 5. Soà thiaⁿ Ko Tok-hêng só͘ chò ê lūn; i ê tê-ba̍k chiū-sī II Ko-lîm-to 4:7; ū hun chò 3 hāng：－
-
Pó-poè sī sím-mi̍h？
-
Thô͘ ê khì-khū sī sím-mi̍h？
-
Pó-poè àn-choáⁿ hē tī thô͘ ê khì-khū.
Koh gī-lūn Hōng-soaⁿ sio̍k ū kàu-hoē Thoân-tō ê lâng tio̍h giâm-kìm An-hioh-ji̍t m̄-thang bé-bē. Kàu 12 tiám-cheng Ông Hi-hiân kî-tó chiū thêng-khùn.
Ē-po͘ 2 tiám poàⁿ chū-chi̍p, Chhî Chhun-ki chò chú-lí, tha̍k Má-thài 28:16-20. Liáu-āu chiū tāi-ke koh káng-kiù Sèng-keng; kàu 4 tiám-cheng kî-tó chiū thêng. Soà hun nn̄g pan khì pò͘-tō Ông Hi-hiân, Chhî Chhun-ki, Chhoà Ní-sûn khì Chhân-chhù chng. iā Gô͘ Bûn-pin, Ko Tok-hêng khì Siang-kheⁿ-kháu chng; tāi-ke chīn hó ki-hoē. Hit ê-hng Gô͘ Bûn-pin lé-pài, tha̍k Sù-tô͘ 10: 1-8.
Cha̍p-jī chá-khí 7 tiám cheng Ko Tok-hêng lé-pài tha̍k Iok-hān 10:1-18.
Téng-po͘ 9 tiám cheng Gô͘ Bûn-pin chò chú-lí chhoā chèng lâng lé-pài tha̍k Má-khó 10:17.
Gī-lūn kiàn-tì kì-sū-phō͘, kong-ìn kap ìn-sek a̍h, só͘ khai chiah-ê huì kok kàu-hoē tio̍h pī-pān chi̍t-ê gîn-kak lâi chò hit-hō lō͘-ēng.
Koh kí-gī āu-hoē sin-le̍k 11 goe̍h 13 hō, chiū-sī kū-le̍k 10 goe̍h 14 ji̍t tio̍h chū-chi̍p tī Tiong-nâ-chng lé-pài-tn̂g chò Thoân-tō-hoē. Soà kéng Hi-pek-lâi 4:11 chò tê-ba̍k, chhiáⁿ Lâm-á-kheⁿ N̂g Sian-seⁿ Chì-sêng chò lūn, kàu hit-ji̍t toà kàu Tiong-nâ lé-pài-tn̂g tha̍k. Jiân-āu chiū saⁿ-kap káng-kiù Sèng-keng, kî-tó chiū hioh-khùn.
Ē-po͘ 2 tiám-poàⁿ cheng chū-chi̍p, Tiō Sî-hoê chò chú-lí, tha̍k II Ko-lîm-to 11: 16-29; kî-tó, chiū sì-soàⁿ khì ke--ni̍h pò͘-tō sûn hiaⁿ-tī. Hit ê-hng Tiō Sî-hoê lé-pài tha̍k Má-thài 13: 1-10. Kàu 13 ê An-hioh ji̍t chá lé-pài Chhoà Ní-sûn tha̍k I Pí-tek 4: 1-6. Téng-po͘ toā lé-pài chiū-sī Chhî Chhun-ki lé-pài, tha̍k II Ko-lîm-to 5:17. Ē-po͘ toā lé-pài Gô͘ Bûn-pin tha̍k II Lia̍t-ông-kì 4: 1-17; I Pí-tek 4: 9. Ko Tok-hêng tha̍k Sù-tô͘ 16: 11-15. Hit ê-hng Gô͘ Bûn-pin chò lé-pài tha̍k II Pí-tek 2: 20-22.
Kàu pài-it tāi-ke sì-soàⁿ.
漢羅（Ùi原文改寫）
傳道會。
彰化縣。
1902.05 206卷 p.37
今阮愛將舊曆三月初十日，佇彰化城拜堂傳道會所議的事，來排列佇下底予恁知：－
論這幫來赴會的人，就是西國牧師連德烈；傳道的人：胡Tiāu-ki，林學恭，陳有成，詹大讓，高金生，黃登發。也有來赴會的長老執事佮兄弟：就是茄苳仔，新結，Ka-tâu，彰化，鹿港，共有十七人。
初十ê昏齊聚，請連德烈做主理，派林學恭做記事。閣輪流禮拜佮議論所做的工程。
十一就是拜五9點鐘聚集傳道會；主理林學恭讀羅馬人書12：1。論獻身軀做活祭，來成聖予上帝所歡喜。論明白請黃登發讀論一篇，題目馬太13：24-30，讀了幾若人閣再起來相佮議論內中的意義，受著濟濟利益；到十一點鐘就煞。對十一點到十二點議論：－
-
台中縣屬有濟濟拜堂無傳道--的通來蹛遐，就參詳請鹿港佮彰化傳道--的暫時輪流禮拜日去溪湖做禮拜；請坑口佮社頭崙仔傳道--的暫時輪流去大庄做禮拜；請大墩傳道--的去大里杙做禮拜。
-
論彰化醫館，有人來就醫，若歡喜受道理的人，勞煩請醫生看彼號人是近佇佗一位的拜堂，寫批通知彼位的傳道知，通去引chhoā伊來禮拜。
-
論傳道理的人每禮拜內所著做的工程，就是探兄弟，佈道，家己講究聖冊；照逐人所拍算來盡本份。
下午兩點鐘閣聚集。陳有成做主理讀腓立比2：5。論體貼耶穌的心；論煞，就閣議論：－
-
佇禮拜日傳道抑是當職的著設好法度，予會友輪流讀聖冊抑是問道理的來歷，教字母，做祈禱會來利益兄弟。
-
論逐教會題捐的事：著想看有甚物法度較好，通予捐題較進步；親像用籤仔，抑是用題分聲，照逐位長執的人所設的好法度，來加添進步做教會的利益。
-
論逐位出傳道的束金，較濟人是講照舊底的款式，對本堂領，若無夠額教士會支理到清楚。
-
到四點鐘祈禱大家出門去家裡佈道，到六點鐘轉來，大家攏好機會，人盡愛聽。
十二日就是拜六，九點鐘閣聚集。黃登發做主理讀哥林多後書2：14，做題目來論，論煞議論代誌。
-
議定後期傳道會就是佇舊曆十月十四日欲聚集佇新結庄禮拜堂。
-
議定揀聖經提多三章請高金生做一篇論，後期來讀。議論煞祈禱就暫停。
下午聚集祈禱就四散分班去逐庄探兄弟。
十三日就是禮拜日，請陳有成，胡Tiāu-ki做頂晡的大禮拜；高金生，黃登發做下午的大禮拜，就是佇醫館的禮拜堂做禮拜，所來禮拜的人額佮佇醫館的病人兩百外人；大家受利益盡濟。到拜一大家四散。
請看報列位的會友，替這个台中屬的教會醫館的病人來祈禱，予阮這幫聚集得著大利益。
鳳山縣。
佇4月17號(3：10)王希賢，吳文彬，徐春枝，趙時回，高篤行，蔡耳順等，齊聚佇萬丹街禮拜堂做傳道會。
初10 ê昏王希賢禮拜，讀行傳 2：2-4。
十一早起7點鐘徐春枝禮拜，讀約翰13：34，35。
頂晡9點鐘聚集，舉王希賢做主理，讀腓立比2：4，5。紲聽高篤行所做的論；伊的題目就是哥林多後書4：7；有分做3項：－
-
寶貝是甚物？
-
塗的器具是甚物？
-
寶貝按怎下佇塗的器具。
閣議論鳳山屬有教會傳道的人著嚴禁安歇日毋通買賣。到12點鐘王希賢祈禱就停睏。
下晡2點半聚集，徐春枝做主理，讀馬太28：16-20。了後就大家閣講究聖經；到4點鐘祈禱就停。紲分兩班去佈道王希賢，徐春枝，蔡耳順去田厝庄。也吳文彬，高篤行去雙坑口庄；大家盡好機會。彼ê昏吳文彬禮拜，讀使徒10：1-8。
十二早起7點鐘高篤行禮拜讀約翰10：1-18。
頂晡9點鐘吳文彬做主理chhoā眾人禮拜讀馬可10：17。
議論建置記事-簿，公印佮印色盒，所開遮的費各教會著備辦一个銀角來做彼號路用。
閣舉議後會新曆11月13號，就是舊曆10月14日著聚集佇中林庄禮拜堂做傳道會。紲揀希伯來4：11做題目，請湳仔坑黃先生志成做論，到彼日帶到中林禮拜堂讀。然後就相佮講究聖經，祈禱就歇睏。
下晡2點半鐘聚集，趙時回做主理，讀II哥林多11：16-29；祈禱，就四散去街--裡佈道巡兄弟。彼个昏趙時回禮拜讀馬太13：1-10。到13的安歇日早禮拜蔡耳順讀彼得前書4：1-6。頂晡大禮拜就是徐春枝禮拜，讀哥林多後書5：17。下晡大禮拜吳文彬讀列王紀下4：1-17；彼得前書4：9。高篤行讀使徒16：11-15。彼个昏吳文彬做禮拜讀II彼得2：20-22。
到拜一大家四散。