公論事理

Kong-lūn Sū-lí

文獻資訊

項目	資料
作者	無lo̍h名
卷期	台南府城教會報
卷期	第204張
日期	1902/3
頁數	24

白話字（原文數位化）

Kong-lūn Sū-lí

1902.03   204 Koàn  p.24

Lán Tâi-lâm ê Tiúⁿ-ló-kàu, tio̍h kap Ji̍t-pún kok tiúⁿ-ló-kàu ha̍p, á-sī tio̍h kap Chheng-tiâu ê Tiúⁿ-ló-kàu ha̍p？ In-uī Ji̍t-pún kok ê Tiúⁿ-ló-kàu ha̍p-chò chi̍t-ê, lán Tâi-oân ê só͘-chāi iā í-keng sio̍k tī Ji̍t-pún kok, lán kap in ha̍p sī khah tio̍h.

Hiān-sî Chheng-tiâu ê Tiúⁿ-ló-kàu, kok-ê ka-tī liāu-lí siat-hoat, iáu-kú sī soàⁿ-soàⁿ. In-uī chá-nî iā ū lâng teh gī-lūn, ài ha̍p-chò chi̍t-ê; ū lâng kóng tī Chheng-tiâu khiuⁿ-kháu chē-chē, nā beh ha̍p chi̍t-ê, tāi-ke kiám m̄ tio̍h ē hiáu kóng, ē hiáu thiaⁿ chiah ū lī-ek？ Ū-lâng kóng kiám-chhái tio̍h kóng chiàⁿ-jī, á-sī tio̍h kóng Eng-kok ê oē chiah lóng ē saⁿ-tâng. Chóng-sī lán ê Chó͘-ke ê Kong-hoe ū khai siat Tiúⁿ-ló-kàu tī Chheng-tiâu, lán nā kap Ji̍t-pún kok ê Tiúⁿ-ló-kàu ha̍p ná-chhin-chhiūⁿ lī-khui in. Chóng-sī Tiúⁿ-ló-kàu sī chi̍t-ê, bô lūn tī Eng-kok, Bí-kok, Tek-kok, ìn-tō͘-kok, Ji̍t-pún-kok, Tiong-kok lóng saⁿ-tâng.

Chiàu goá ê gû-kiàn lán kap Ji̍t-pún kok ê Tiúⁿ-ló-kàu ha̍p khah tio̍h. In-uī hiān-sî kok-ka ū siat ha̍k-hāu hō͘ siàu-liân-lâng o̍h Ji̍t-pún ê oē. Ji̍t-pún lâng iā chē-chē teh o̍h Tâi-oân ê oē.

Ô͘ Tiāu-ki kì-ê

Lēng-goā koh mn̄g nn̄g hāng:－

I. Lé-pài-ji̍t chē hoé-chhia, hoé-chûn sī tio̍h á m̄-tioh8？

II. Chhut Thoân-tō ê sin-kim tio̍h chiàu sím-mi̍h hoat-tō͘ khah-ho2？

Chhiáⁿ lín chiong téng-bīn chit saⁿ-hāng koh gī-lūn khah siông-sè. Tio̍h siūⁿ khah khui-khoah; m̄-thang kan-ta mn̄g khoàⁿ An-hioh-ji̍t chē-chhia ū lī-ek lán pún-sin, iā tio̍h siàu-liām in chò-kang ê lâng, teh bē-toaⁿ, koáⁿ-chhia, pōng hêng-lí ê, lán tio̍h cháiⁿ-iūⁿ lī-ek in. Á-sī lūn chhut sin-kim ê hoat-tō͘ m̄-sī kan-ta mn̄g khoàⁿ tó chi̍t-hāng khah ha̍p sian-siⁿ ê lō͘-ēng hō͘ in khah khoàⁿ-oa̍h niá, sī teh mn̄g tó chi̍t hāng ū khah lī-ek kàu-hoē.

漢羅（Ùi原文改寫）

公論事理

1902.03   204卷p.24

咱台南的長老教，著佮日本國長老教合，抑是著佮清朝的長老教合？因為日本國的長老教合做一个，咱台灣的所在也已經屬佇日本國，咱佮in合是較著。

現時清朝的長老教，各个家己料理設法，iáu-kú是散散。因為早年也有人teh議論，愛合做一个；有人講佇清朝腔口濟濟，若欲合一个，大家檢毋著會曉講，會曉聽才有利益？有人講檢采著講正字，抑是著講英國的話才攏會相同。總是咱的祖家的公會有開設長老教佇清朝，咱若佮日本國的長老教合那親像離開in。總是長老教是一个，無論佇英國，美國，德國，印度國，日本國，中國攏相同。

照我的愚見咱佮日本國的長老教合較著。因為現時國家有設學校予少年人學日本的話。日本人也濟濟teh學台灣的話。

胡Tiāu-ki記的

另外閣問兩項：－

I. 禮拜日坐火車，火船是著抑毋著？

II. 出傳道的辛金著照啥物法度較好？

請恁將頂面這三項閣議論較詳細。著想較開闊；毋通干焦問看安息日坐車有利益咱本身，也著數念in做工的人，teh賣單，趕車，磅行李的，咱著怎樣利益in。抑是論出辛金的法度毋是干焦問看佗一項較合先生的路用予in較快活領，是teh問佗一項有較利益教會。