Kàu-hoē ê Lâi-le̍kPermalink

文獻資訊Permalink

白話字（原文數位化）Permalink

Kàu-hoē ê Lâi-le̍k

Lo̍k-káng

1902.01 202 koàn p.7

Chú 1895 nî, 4 goe̍h goá lī-khui Tâi-lâm lâi hia khui se-io̍h-tiàm. Tī hit-sî lóng bô sìn Chú ê lâng tī-hia. Goá nā beh siú Chú-ji̍t, khah siông khì Chiang-hoà, chiong-kīn oá chiâⁿ nî kú, chin-chiàⁿ m̄ lī-piān. Chóng-sī sim siông-siông kiû Siōng-tè khui-lō͘ thang siat I-ê Sèng-hoē. Kai-chài Moâi Bo̍k-su kap Chiang-hoà ê thoân-tō Sian-seⁿ N̂g Bō͘-sēng bat ta̍uh-ta̍uh khì hia pò͘-tō.

Kàu 1897 nî, Siōng-tè chiū thiaⁿ goá ê kî-tó, hō͘ I chīn-tiong ê lô-po̍k Moâi Bo̍k-su hián-chhut toā tō͘-liōng, gī-lūn tiāⁿ-tio̍h beh siat Hok-im-tn̂g, goá thiaⁿ-tio̍h chit-hō siau-sit, sim-koaⁿ hoaⁿ-hí kám-in Siōng-tè; bô loā-kú chiū soè chi̍t keng tiàm tī Pán-tiàm-ke, ta̍k goe̍h Chhù-soè gîn 2 kho͘. Hit sî iā goá hoat-lo̍h tn̂g-lāi só͘ khiàm-ēng ê mi̍h-kiāⁿ kàu lóng hó-sè, chiū tī 2 goe̍h kan khui tn̂g kóng tō-lí. Lī hia 6,7 lí lō͘, ū chi̍t-chng hō-chò Khiā-kau-á kuí-nā kháu-chàu sio̍k Chiang-hoà ê kàu-hoē, in iā hoaⁿ-hí ta̍k lé-pài lâi hia saⁿ-kap chū-chi̍p. Hit-tia̍p lóng sī Bo̍k-su kap N̂g sian-siⁿ in ta̍k lé-pài lûn-liû, ū-sî I-seng iā lâi hia tàu-chān kóng tō-lí kap chhut-mn̂g pò͘-tō; koh bô loā-kú I-seng iā siat-hoat muí lé-pài chi̍t-ji̍t khì pò͘-tō hoat-io̍h, ta̍k-kî ū kuí cha̍p lâng lâi chiū i.

Kàu 1891 nî, Kàu-hoē í-keng ū khioh tām-po̍h chîⁿ-hāng, tāi-ke siūⁿ tio̍h lâi tián chi̍t keng khah-hó, bián le̍k-nî la̍p chhù-soè gîn, chiū kap Moâi Bo̍k-su Lân I-seng chham-siông, in iā tah-èng hoaⁿ-hí tàu chàn-sêng. Tú-hó tī Tek-heng-ke ū chi̍t-chō hiā-chhù, khiok bô loā khoah, chóng-sī thang chò chiām-sî ê lō͘-ēng, siu-lí khai oá 8,9 cha̍p kho͘, chiū tī 3 goe̍h kan ū poaⁿ-koè sin pài-tn̂g. Tī chit nî-thâu chiah ū tit-tio̍h kuí-nā siàu-liân lâng sin lâi thiaⁿ tō-lí, chhin-chhiūⁿ Chhoà Hoê-siūⁿ sī tī I-koán i ba̍k-chiu, āu-lâi soà tit-tio̍h i sim-ba̍k. Koh chit-ê Ông Bí-tê, sī in-uī lāu-bó kap sió-moē tio̍h un-e̍k-chèng sí, bat kuí-nā pái tī ke-lō͘ thiaⁿ-tio̍h kiù-sè ê chin-lí, koh hit-sî tú-tio̍h chhiⁿ-chhám ê sū, sim chiū oa̍t-lìn-tńg lâi kèng-pài chin ê Siōng-tè, bô loā-kú i ê hū-jîn-lâng iā soà lâi lé-pài. Taⁿ i tī 1899 nî 6 goe̍h, kap Chhoà Hoê-siūⁿ ū tuì Moâi Bo̍k-su niá-siū sé-lé; iā i ê hū-jîn-lâng tī 1901 nî 3 goe̍h, Kam Bo̍k-su ji̍p Po͘-siā, iā ū tuì i niá sé-lé ji̍p-kàu lah.

Kàu 1899 nî 3 goe̍h, Kàu-sū-hoē chiah chhe Ông an-kiā sian-siⁿ lâi toà hia, tuì i lâi liáu-āu iā ū koh ke-thiⁿ kuí-nā ke lâi sìn Chú, chhin-chhiūⁿ Chiā Chiáⁿ choân-ke, Má-chhiau-só choân-ke, iā kuí-nā pa̍t-lâng. Chiā Chiáⁿ kap Má-chhiau-só iā tī 1901 nî 4 goe̍h, tuì Kam Bo̍k-su niá-siū sé-lé. Khó-sioh tī chit-nî Chhoà Hoê-siūⁿ ū koè Tn̂g-soaⁿ Choân-chiu chhoē i-ê lāu-bó. Ông Bí-tê iā poaⁿ ke-koàn ji̍p Po͘-siā khiā-khí; in-uī i-ê chhù kap lé-pài-tn̂g saⁿ-liân, chiū ji̍p Po͘-siā koh chhut-lâi, hit-sî soà chiong i-ê chhù bē tī kàu-hoē, chóng-sī i hoaⁿ-hí siu chi̍t-poàⁿ chîⁿ, iā hiàn chi̍t-poàⁿ tī kàu-hoē; taⁿ koh ke bé chi̍t keng saⁿ-liân, chiū koh khah ha̍p-ēng, chin-chiàⁿ sī Siōng-tè só͘ pī-pān. iā 1898 nî goá in-uī seng-lí ê sū, ū poaⁿ lâi Oân-lîm-ke.

Kàu 1901 nî 10 goe̍h, kàu-hoē koh tit-tio̍h Siong-tè ê toā-in, chiū Kàu-sū-hoē koh phài Tân Iú-sêng sian-siⁿ lâi chiap-soà koán-kò͘ kàu-hoē. Koh tī chit nî 10 goe̍h 21 ji̍t, Liâm Bo̍k-su iā ū khì hia siat Boán-chhan, soà siat-li̍p Iûⁿ Thian-hô chò chip-sū, thang liāu-lí siàu-hāng ê sū.

Lūn Lo̍k-káng hiān-sî lâng-gia̍h cha-po͘ hū-jîn sui-bóng oá 50 goā, ji̍p-kàu--ê chí-ū 10 lâng, koh lâi teh lé-pài khah-siông sī oá 20 goā lâng nā-tiāⁿ. Khiok ū nn̄g-hāng ê in-toaⁿ, chi̍t hāng hiaⁿ-tī lâng toà tī chháu-tē khah-chē; koh chi̍t hāng, goán 2,3 kháu-chàu ū soà pa̍t-uī, chiū chāi Káng só͘ chhun sī kuí-ê nā-tiāⁿ; koh pún sio̍k Chiang-hoà hiah-ê hiaⁿ-tī, in ū-sî chia̍p-chia̍p khì Chiong-hoà lé-pài, só͘-í it-hoat chió-lâng. Chhiáⁿ khoàⁿ Pò ê hoē-iú uī Lo̍k-káng ê kàu-hoē kî-tó, in-uī hia sǹg-sī lāu-jia̍t ê ke-chhī, jîn-sò͘ oá 2,0000 goā, sui-bóng kàu-hoē thâu-boé siat oá 5 nî ê kú, nā-sī lâng chē-chē m̄ khéng hâng-ho̍k Sèng-kàu, iáu-kú ta̍uh-ta̍uh ài chò tō-lí ê tuì-te̍k. Goān Siōng-tè hō͘ I ê peh-sìⁿ tī-hia ê chò chin-lí ê thiāu-chio̍h, thang ín-chhoā khah chē Lo̍k-káng lâng lâi sìn lán ê Kiù-chú, sim só͘ goān.

Oân-lîm-ke, Lí Tō-seng pò.

漢羅（Ùi原文改寫）Permalink

教會的來歷

鹿港

1902.01 202卷p.7

主1895年，4月我離開台南來遐開西藥店。佇彼時攏無信主的人佇遐。我若欲守主日，較常去彰化，將近倚成年久，真正毋利便。總是心常常求上帝開路通設伊的聖會。佳哉Moâi牧師佮彰化的傳道先生黃茂盛捌ta̍uh-ta̍uh去遐佈道。

到1897年，上帝就聽我的祈禱，予伊盡忠的 lô-po̍k Moâi牧師顯出大度量，議論定著欲設福音堂，我聽著這號消息，心肝歡喜感恩上帝；無偌久就稅一間店佇板店街，逐月厝稅銀2箍。彼時也我發落堂內所欠用的物件到攏好勢，就佇2月間開堂講道理。離遐6，7里路，有一庄號做徛溝仔幾若口灶屬彰化的教會，in也歡喜逐禮拜來遐相佮聚集。彼tia̍p攏是牧師佮黃先生in逐禮拜輪流，有時醫生也來遐鬥贊講道理佮出門佈道；閣無偌久醫生也設法每禮拜一日去佈道發藥，逐期有幾十人來就醫。

到1891年，教會已經有拾淡薄錢項，大家想著來典一間較好，免歷年納厝稅銀，就佮Moâi牧師蘭醫生參詳，in也答應歡喜鬥贊成。拄好佇德興街有一座瓦厝，卻無偌闊，總是通做暫時的路用，修理開倚8，9十箍，就佇3月間有搬過新拜堂。佇這年頭才有得著幾若少年人新來聽道理，親像蔡和尚是佇醫館伊目睭，後來紲得著伊心目。閣這个王Bí-tê，是因為老母佮小妹著瘟疫症死，捌幾若擺佇街路聽著救世的真理，閣彼時拄著淒慘的事，心就越輪轉來敬拜真的上帝，無偌久伊的婦人人也紲來禮拜。Taⁿ伊佇1899年6月，佮蔡和尚有對Moâi牧師領受洗禮；也伊的婦人人佇1901年3月，甘牧師入埔社，也有對伊領洗禮入教lah。

到1899年3月，教士會才差王安崎先生來蹛遐，對伊來了後也有閣加添幾若家來信主，親像謝Chiáⁿ全家，Má-chhiau-só全家，也幾若別人。謝Chiáⁿ佮Má-chhiau-só也佇1901年4月，對甘師領受洗禮。可惜佇這年蔡和尚有過唐山泉州揣伊的老母。王Bí-tê也搬家眷入埔社徛起；因為伊的厝佮禮拜堂相連，就入埔社閣出來，彼時紲將伊的厝賣佇教會，總是伊歡喜收一半錢，也獻一半佇教會；taⁿ閣加買一間相連，就閣較合用，真正是上帝所備辦。也1898年我因為生理的事，有搬來員林街。

到1901年10月，教會閣得著上帝的大恩，就教士會閣派陳有成先生來接續管顧教會。閣佇這年10月21日，廉牧師也有去遐設晚餐，紲設立楊天河做執事，通料理數項的事。

論鹿港現時人額查甫婦人雖罔倚50外，入教--的只有10人，閣來teh禮拜較常是倚20外人nā-tiāⁿ。卻有兩項的因端，一項兄弟人蹛佇草地較濟；閣一項，阮2，3 口灶有紲別位，就在講所chhun是幾个nā-tiāⁿ；閣本屬彰化遐的兄弟，in有時chia̍p-chia̍p去彰化禮拜，所以益發少人。請看報的會友為鹿港的教會祈禱，因為遐算是鬧熱的街市，人數倚2,0000外，雖罔教會頭尾設倚5年的久，若是人濟濟毋肯降服聖教，iáu-kú ta̍uh-ta̍uh愛做道理的對敵。願上帝予伊的百姓佇遐的做真理的柱石，通引chhoā較濟鹿港人來信咱的救主，心所願。

員林街，李道生報。