浪蕩子

Lōng-tōng Chú

文獻資訊

項目	資料
作者	萬姑娘 Bāng Ko͘-niû
卷期	台南府城教會報
卷期	第190卷
日期	1901/1
頁數	8

白話字（原文數位化）

Lōng-tōng Chú

1901.01 190 koàn p.8

(Chiap chêng koàn tē 96 bīn.)

Koè cha̍p-kuí-ji̍t Bí-lē chiap-tio̍h phoe chiū-sī Lí Iok-hān kià-lâi-ê. Phoe-lāi ū saⁿ-kho͘ ê gîn-phiò. Guī Ló-iâ chiong phoe tha̍k hō͘ i thiaⁿ kóng, Lí Iok-hān kàu Lûn-tun-siâⁿ in chek chiap-la̍p hó khoán-thāi, hō͘ i toà tī tiàm-lāi pang-chhiú. I ū kài-chiú siú lé-pài iā oá-khò Kiù-chú koat-ì chò hó-lâng. Koh kóng in chek ū pêng-iú sī chò kàu-su. Iok-hān chiong To-má ê sū kóng hō͘ i thiaⁿ. I èng-ún kóng, tek-khak tio̍h ēng sim chhoē i kàu-tio̍h.

Bí-lē thiaⁿ-liáu ū hoaⁿ-hí kàu bē kò͘-tit. Guī Ló-iâ kóng, Lí siūⁿ hit ê lâng sī khò tit Chú mah? Sī put-chhò. Sim-lāi àm-chēⁿ siūⁿ Siōng-tè ēng Bí-lē kuí-kù-oē khì kiù hit ê lâng, sī chin kî-koài. Koh siūⁿ hit ê khit-chia̍h siū i kám-tōng tit kiù, goá uī-tio̍h sím-mi̍h iáu-kú boē kui-ho̍k Siōng-tè lâi tit-kiù?

Hit ji̍t ē-po͘ Guī Ló-iâ khiâ-bé chhut khì kiâⁿ-thô. Hit chiah bé hut-jiân kiaⁿ-tio̍h pháu-cháu, Guī Ló-iâ poa̍h-lo̍h bé cheng tio̍h chhiū-kin. Chiū o͘-àm-hîn. Bé pháu-cháu, Guī Ló-iâ soà hūn-khì tiàm-hia khùn chi̍t tiám cheng kú. Tú-tio̍h lâng thoa-chhia tuì hia koè, chi̍t-ē khoàⁿ-kìⁿ,ē jīn-tit sī Guī Ló-iâ, chiū khin-khin āiⁿ i chiūⁿ chhia,koáⁿ-kín chài kàu in-tau. I-seng lâi khoàⁿ kóng, Saⁿ-tiâu kin phah-li̍h, thâu-khak iā ū siū-siong; m̄ chai ē hāi bē. Bí-lē thiaⁿ-kìⁿ liáu chiū thî-khàu beh ji̍p khì Kū-iâ ê pâng-keng, chóng-sī i-seng m̄ chún i. kóng,Kài iàu-kín tio̍h an-chēng, bē kham tit gín-á chhá, thèng-hāu Lāu-iâ khah hó chiah thang ji̍p khì.

Koè cha̍p kuí-ji̍t Lāu-iâ kó-jiân khah hó chiū chún Bí-lē ji̍p-khì, kan-ta kah i m̄-thang kóng chē oē. Bí-lē hoaⁿ-hí kàu-ke̍k toà chi̍t pau mi̍h ji̍p-khì, ûn-ûn kiâⁿ kàu chhn̂g piⁿ khoàⁿ-kìⁿ Guī ló-iâ bīn-māu put-chí siau-sán, thâu-khak pau chi̍t tiâu pe̍h kin.

(āu-koàn beh koh chiap.)

漢羅（Ùi原文改寫）

浪蕩子

1901.01 190卷 p.8

(接前卷第96面。)

過十幾日美麗接著批就是李約翰寄來ê。批內有3箍ê銀票。魏老爺將批讀hō͘ 伊聽講，李約翰到倫敦城in 叔接納好款待，hō͘ 伊toà tī 店內幫手。伊有戒酒守禮拜也倚靠救主決意做好人。Koh講in叔有朋友是做教師。約翰將多馬ê事講hō͘ 伊聽。伊應允講，的確著用心chhoē伊到著。

美麗聽了有歡喜到bē顧得。魏老爺講，你想hit個人是靠得主mah？是不錯。心內暗靜想上帝用美麗幾句話去救hit 個人，是真奇怪。Koh想hit個乞食受伊感動得救，我為著甚物 iáu-kú boē歸服上帝來得救？

Hit日ē晡魏老爺騎馬出去行thô。Hit隻馬忽然驚著跑走，魏老爺跋落馬cheng著樹根。就烏暗眩。馬跑走，魏老爺續暈去tiàm-hia睏一點鐘久。Tú著人拖車對hia過，一下看見，會認得是魏老爺，就輕輕āiⁿ伊上車，趕緊載到in兜。醫生來看講，三條筋扑裂，頭殼也有受傷；m̄ 知會害bē。美麗聽見了就啼哭beh入去舅爺ê房間，總是醫生m̄ 准伊。講，蓋要緊著安靜，bē堪tit囡仔吵，聽候老爺較好才thang入去。

過十幾日老爺果然較好就准美麗入去，kan-ta 教伊m̄-thang講濟話，美麗歡喜到極帶一包物入去，勻勻行到床邊看見魏老爺面貌不止消瘦，頭殼包一條白巾。

（後卷beh koh接。）