清國戰事

Chheng-kok Chiàn-sū

文獻資訊

項目	資料
作者	無lo̍h名
卷期	台南府城教會報
卷期	第188卷
日期	1900/11
頁數	85

白話字（原文數位化）

Chheng-kok Chiàn-sū

1900.11 188 koàn p.85-86

Hiān-sî Pak-kiaⁿ Chheng-kok ê koân-pèng bô it-tēng sím-mi̍h lâng teh chiáng, chhin-chhiūⁿ sang-sang soàⁿ-soàⁿ ê khoán-sit. Lūn Se-kok in koat-ì beh chiong Hông-thài-hō͘, Toan-chhin-ông, kap Gī-hô-thoân-huí tóng-siú hiah-ê lâi pān choē. iū-koh in iàu-kín beh hû-chō͘ Kong-sū-kun iû-goân hō͘ i teng-ke̍k. Lūn-kàu Kong-sū-kun lán bô tek-khak chai hiān-kim ê chong-chek choáⁿ-iūⁿ. Khiok ū ji̍t-pò teh kóng Se-kok-peng nā chhut Pak-kiaⁿ chiū Kong-sū-kun liâm-piⁿ ē tò-khì. Hiān-sî Lí hông-chiong kap Goā-kok ê Khim-chhe teh gī-hô, ji̍t-pò iā kóng Tiong-kok goān poê chhut gîn 4,0000,0000. Lūn-kàu thó͘-huí thâi-sí Kàu-hoē-tiong Goā-kok ê lâng-sek, lán í-keng chai chha-put-to ū peh-cha̍p ê toā lâng, saⁿ-cha̍p ê gín-á ê jin-bēng. Chāi-tē sìn Chú ê lâng iā sit kuí-nā chheng tiâu ê jîn-bēng. Ū kuí séng ê Chóng-tok kiù-si̍t sī chò Gī-hô-thoân-huí ê chú. Chhin-chhiūⁿ Soaⁿ-sai ê Chóng-tok eng kè khì ín-iú kuí-nā cha̍p Goā-kok Kàu-sū kap Sian-seⁿ-niû, phiàn in kóng beh pó-hō͘ kàu hái-kîⁿ. Chi̍t-ē ji̍p gê-mn̂g chiū hē to̍k-chhiú hāi-sí kuí-nā-ê, kî-û sī théng Gī-hô-thoân-huí lâi thâi. Taⁿ hit ê chóng-tok tio̍h kiaⁿ ū ka-tī khì chū-chīn.

Hiān-sî tī Kńg-tang-séng peh-sèⁿ teh hoán. In ê ì-sù khiok m̄ sī ài hāi Goā-kok-lnag5, kì-si̍t sī ài sak-tó Chheng-tiâu, soà hû sin kun. In toā teh ǹg-bāng Se-kok beh pang-chō͘ chit chân sū.

漢羅（Ùi原文改寫）

清國戰事

1900.11 188 卷 p.85-86

現時北京清國ê權柄無一定甚乜人teh掌，親像鬆鬆散散ê款式。論西國in決意beh將皇太后，端親王，佮義和團匪黨首hiah-ê來辦罪。又閣in要緊beh扶助光緒君猶原予伊登極。論到光緒君咱無的確知現今ê蹤跡怎樣。卻有日報teh講西國兵若出北京就光緒君連鞭ē倒去。現時李鴻章佮外國ê欽差teh議和，日報也講中國願賠出銀4,0000,0000。論到土匪刣死教會中外國ê人氏，咱已經知差不多有八十个大人，三十个囡仔ê人命。在地信主ê人也失幾nā千條ê人命。有幾省ê總督究實是做義和團匪ê主。親像山西ê總督用計去引誘幾nā十外國教士佮先生娘，騙in講beh保護到海墘。一下入衙門就下毒手害死幾nā个，其餘是等義和團匪來刣。Taⁿ hit个總督著驚有家己去自盡。

現時佇廣東省百姓teh反。In ê意思卻毋是愛害外國人，其實是愛sak倒清朝，紲扶新君。In大teh向望西國beh幫助這層事。