浪蕩子
Lōng-tōng Chú
文獻資訊
| 項目 | 資料 |
|---|---|
| 作者 | 萬姑娘 Bāng Ko͘-niû |
| 卷期 | 台南府城教會報 |
| 卷期 | 第188卷 |
| 日期 | 1900/11 |
| 頁數 | 91 |
白話字（原文數位化）
Lōng-tōng Chú
1900.11 188 koàn p.91-92
(Chiap chêng koàn tē 84 bīn.)
Tē jī ji̍t tuì Má Pô-pô hia tò-lâi; hit mî phoāⁿ bó-kū chia̍h koé-chí. Bí-lē kóng,”Kin-á ji̍t Má Pô-pô khoán-thāi goá chin hó, the̍h hó piáⁿ hō͘ goá chia̍h. Hit chiah niau-á ām-kún ū kat âng-toà, koh chi̍t pak oē-tô͘ kuì tī piah-téng, chiū-sī lōng-chú hoê-thâu, i ê lāu-pē chiap-la̍p hó khoán-thāi. Goá kā Má Pô-pô kóng, Goá chin ài hit pak, tiāⁿ-tio̍h beh khioh chîⁿ bé lâi kuì tī goá ê pâng-keng. Má Pô-pô kā goá kóng, I ài hit pak chhak ū iân-kò͘, chóng--sī i kà goá, m̄-thang kā pa̍t lâng kóng, iā m̄-sī kiaⁿ kū-iâ lí chai; kan-ta m̄ ài kū-iâ tuì pa̍t lâng kóng.”Guī Ló-iâ kóng, M̄-bián kiaⁿ, goá bô beh chhut-phoà m̄ ki-bi̍t ê sū.
Bí-lē sè-á siaⁿ kóng,”In-uī Má Pô-pô ū chi̍t ê lōng-tōng-chú, i miâ kiò-chò To-má; káu nî chêng chhut-mn̂g khì, iā bô kià phoe lâi, iā bô tò-lâi. Teh kóng ê sî Má Pô-pô chiū lâu ba̍k-sái, m̄ chai i ê kiáⁿ tī hit tah kiaⁿ-liáu ē tú-tio̍h kan-khó͘; chò lāu-bó ê sim chiū koè bē-tit khì. Goá chiū kā i kóng, Hit-ê lōng-chú khì pa̍t só͘-chāi siū khó͘ chhī ti ē hiáu siūⁿ beh hoê-thâu; goá goān To-má iā ē chhin-chhiūⁿ hit-ê. Má Pô-pô khoàⁿ-kìⁿ goá an-uì i ê sim chiū chhit ba̍k-sái khì the̍h chi̍t-tè thn̂g-sng hō͘ goá chia̍h; āu-lâi Má Peh-peh chhoā goá tò-lâi. Goá tī lō͘--ni̍h mn̄g i nā To-má hoê-ka lâi jīn-choē; lí beh thé-thiap iông-ún á-bô? I chiū kóng, M̄ nā thé-thiap iông-ún i, koh beh hoaⁿ-hoaⁿ-hí-hí chiap-la̍p hó khoán-thāi i.
Goá thiaⁿ che oē chiū teh siūⁿ Pē-bó thiàⁿ kiáⁿ kàu án-ni; khó͘-liân goá iā bô pē, iā bô bó. Ū-sî mî-sî bē-khùn-tit, goá kî-tó Siōng-tè sim-lāi ná-chún thiaⁿ-kìⁿ Siōng-tè kā goá pàng sim, kóng, I sī goá ê Pē lah. Chá-ji̍t Bo̍k-su kóng Siōng-tè ū lōng-tōng-chú, goá siūⁿ che oē chin kî-koài. Kū-iâ, chiàu lí khoàⁿ ū chit hō ê lōng-tōng-chú á bô? Guī Ló-iâ kan-ta kóng, M̄ bián tô-giân; lí kóng chē-chē oē hō͘ goá thâu-khak hîn.
Bí-lē chiū bô koh chhut-siaⁿ tiām-tiām chē, tia̍p-á-kú Guī Ló-iâ kóng, “Lí nā hoaⁿ-hí khì Má Pô-pô tau khiok thang, chóng--sī m̄-thang toà káu-á iân-lō͘ khì, chhiū-nâ lāi ū iá-ke, kiaⁿ-liáu i kā.”Bí-lē kóng. To-siā, Kū-iâ goá chin hoaⁿ-hí khì; tuì kin-á-ji̍t goá beh ta̍k ji̍t thè To-má kî-tó, kiû Siōng-tè kám-tōng i ê sim hō͘ i khoài-khoài tò-lâi. Kū-iâ lí khéng án-ni kî-tó á bô? Guī Ló-iâ kóng, “Lí thè i kî-tó chiū kàu-gia̍h lah.”Bí-lē koh kóng,”Chiàu án-ni-seⁿ Kū-iâ lâi thè Siōng-tè hia ê lōng-tōng-chú kî-tó, thang, m̄-thang leh.”Guī Ló-iâ kóng, “Taⁿ sī peh tiám cheng lah, lí tio̍h chiūⁿ lâu, khì khùn, khah hó.”Bí-lē chiū cháu khì. Guī Ló-iâ teh siūⁿ hit ê cha-bó͘-gín-ná bē-hiáu-tit, goá chiū-sī lī-khui Siōng-tè ê lōng-tōng-chú. I uī-tio̍h sím-mi̍h siông-siông tuì goá kóng chit ê sū leh?
Koè kuí-nā-ji̍t láu-ma beh ji̍p siâⁿ chiūⁿ-ke khì bé-mi̍h; in-uī lō͘-tô͘ 20 lí hiah nī hn̄g, chiū chē bé chhia. Mn̄g Bí-lē khoàⁿ beh kap i khì bô? Bí-lē kóng, “Beh khì.”Chiū khì mn̄g Kū-iâ khoàⁿ i beh kià i bé sím-mi̍h á bô? Guī Ló-iâ kóng,”Lí kan-ta thè goá bé choá-pit chiū hó, goá beh siá chi̍t tiuⁿ jī hō͘ lí. Lí chiong chit tiuⁿ hō͘ hit khám tiàm khoàⁿ, chū-jiân thang the̍h hō͘ lí lóng bô bé m̄ tio̍h. Chi̍t ê kim-chîⁿ kau--lí, kā i oāⁿ, chhun-ê, hō͘ i chāu-gîn, chāu chhun-ê beh hō͘ lí lân-san ēng.”
Bí-lē the̍h hit ê kim-chîⁿ kā Kū-iâ kóng, To-siā; ka-tī siūⁿ éng ji̍t bô hiah chē chîⁿ, kin-á-ji̍t ū thang bé chē-chē mi̍h. Bí-lē chiū hoaⁿ-hoaⁿ-hí-hí toà láu-ma chē chhia khì lah. Koè poàⁿ ji̍t Guī Ló-iâ khoàⁿ hit tiuⁿ bé-chhia tò-lâi khoàⁿ Bí-lē bīn-ni̍h ū lâu ba̍k-sái ê jiah, láu-ma iā bô pêng-an ê khoán-sit. Guī Ló-iâ mn̄g khoàⁿ ū sím-mi̍h in-toaⁿ. Láu-ma kóng,”Lóng sī Bí Ko͘-niû ê sit chhò, i m̄ thiaⁿ goá ê chhuì, i chò i cháu hō͘ goá chhoē poàⁿ ji̍t, chin kan-khó͘. Cháu-lâi cháu-khì, hō͘-soàⁿ kap hâ-pau lóng phah-m̄-kìⁿ lah. I khì chē tī hāng-á hô-hèng kap chi̍t ê láu-á-kong-kùn teh kóng-oē.”Guī Ló-iâ kóng, “Che, chiū-sī chin kî-koài lah, goá bē bêng-pe̍k. Bí-lē lí thang lâi chheh-pâng ûn-ûn-á kóng hō͘ goá thiaⁿ.”
(āu-koàn beh koh chiap.)
漢羅（Ùi原文改寫）
浪蕩子
1900.11 188卷 p.91-92
(接前卷第84面。)
第2日tuì 馬婆婆hia 倒來；hit暝伴母舅食果子。美麗講，「今仔日馬婆婆款待我真好，提好餅hō͘我食。Hit隻貓仔頷頸有結紅帶，koh一幅畫圖kuì tī 壁頂，就是浪子回頭，伊ê 老父接納好款待。我kā 馬婆婆講，我真愛hit幅，定著beh拾錢買來kuì tī 我ê 房間。馬婆婆kā我講，伊愛hit幅chhak有緣故，總--是伊教我，m̄-thang kā別人講，也m̄是驚舅爺你知；kan-ta m̄ ài 舅爺tuì別人講。」魏老爺講，m̄免驚，我無beh出破m̄機密 ê 事。
美麗細仔聲講，「因為馬婆婆有一個浪蕩子，伊名叫做多馬；九年前出門去，也無寄批來，也無倒來。Teh講 ê 時馬婆婆就流目屎，m̄知伊ê 子tī hit tah 驚了會tú著艱苦；做老母ê 心就過bē-tit去。我就kā伊講，hit個浪子去別所在受苦飼豬會曉想beh回頭；我願多馬也會親像hit個。馬婆婆看見我安慰伊ê 心就拭目屎去提一塊糖霜hō͘ 我食；後來馬伯伯chhoā我倒來。我tī 路--ni̍h 問伊若多馬回家來認罪；你beh體貼容允抑無？伊就講，m̄但體貼容允伊，koh beh 歡歡喜喜接納好款待伊。
我聽che話就teh想父母疼子到án-ni；苦憐我也無父，也無母。有時暝時bē睏tit，我祈禱上帝心內若准聽見上帝kā我放心，講，伊是我ê 父lah。昨日牧師講上帝有浪蕩子，我想che話真奇怪。舅爺，照你看有這號ê 浪蕩子抑無？魏老爺kan-ta 講，m̄免多言；你講濟濟話hō͘我頭殼暈。
美麗就無koh 出聲恬恬坐，tia̍p仔久魏老爺講，「你若歡喜去馬婆婆兜卻thang，總--是m̄-thang 帶狗仔沿路去，樹林內有野雞，驚了伊咬。」美麗講，多謝，舅爺我真歡喜去；tuì 今仔日我beh逐日替多馬祈禱，求上帝感動伊ê 心hō͘伊快快倒來。舅爺你肯án -ni 祈禱抑無？魏老爺講，「你替伊祈禱就夠額lah。」美麗koh 講，「照án-ni -seⁿ舅爺來替上帝hia ê 浪蕩子祈禱，thang，m̄-thang leh。」魏老爺講，「今是8點鐘lah，你著上樓，去睏，較好。」美麗就走去。魏老爺teh想hit個查某囡仔bē曉tit，我就是離開上帝 ê 浪蕩子。伊為著甚物常常tuì我講這個事leh？
過幾若日láu-ma beh 入城上街去買物；因為路途20 里hiah nī遠，就坐馬車。問美麗看beh kap伊去無？美麗講，「Beh去。」就去問舅爺看伊beh寄伊買甚物抑無？魏老爺講，「你kan-ta 替我買紙筆就好，我beh寫一張字hō͘你。你將這張hō͘ hit khám店看，自然thang提hō͘你攏無買m̄著。一個金錢交--你，kā伊換，chhun-ê，hō͘伊找銀，找chhun-ê beh hō͘ 你零星用。」
美麗提hit個金錢kā舅爺講，多謝；家己想永日無hiah濟錢，今仔日有thang 買濟濟物。美麗就歡歡喜喜帶láu-ma 坐車去lah。過半日魏老爺看hit張馬車倒來看美麗面ni̍h有流目屎 ê 跡，láu-ma 也無平安 ê 款式。魏老爺問看有甚物因端。Láu-ma講，「攏是美姑娘 ê 失錯，伊m̄ 聽我ê 嘴，伊做伊走hō͘我chhoē半日，真艱苦。走來走去，雨傘kap hâ包攏扑m̄見lah。伊去坐tī巷仔hô-hèng kap一個老仔光棍teh講話。」魏老爺講，「Che，就是真奇怪lah，我bē明白。美麗你thang來冊房勻勻仔講hō͘ 我聽。」
(後卷beh koh接。)