論偶像
Lūn Ngó͘-siōng
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第179卷 |
| 日期 | 1900/2 |
| 頁數 | 19 |
白話字（原文數位化）
Lūn Ngó͘-siōng(2)
1900.02 179 koàn p.19-20
(Chiap chêng koàn tē 9 bīn)
Cha-khó Siong-tiâu Bú-it-tè khí-thâu chò ngó͘-siōng chò sîn; āu-lâi i hō͘ luî phah sí, in-uī Chin-sîn Siōng-tè ēng luî hêng-hoa̍t chò ngó͘-siōng ê lâng, lâi kéng-kài āu-sè-tāi. Khó-sioh bô hiáu-gō͘, ná-kú ná siong-tiōng. Kàu tī Hàn-tiâu Bêng-tè ê sî hu̍t-hoat chiàⁿ ji̍p Tiong-kok, tuì án-ni ngó͘-siōng ê pháiⁿ hong-sio̍k ji̍t-ji̍t ná sēng. Bêng-tè chē-uī chiàⁿ 18 nî nā-tiāⁿ, āu-lâi sí-sit saⁿ-soà, kok-uī bô kú-tn̂g. Sòng, Chê, Liông, Goân, Guī, í-ē ta̍k tāi ná gâu kèng pu̍t, chóng-sī sè-tāi ná té. Chhin-chhiūⁿ Liông Bú-tè siá-sin pài-pu̍t, chi̍t ji̍t chia̍h chi̍t tǹg, chí-ū chia̍h koé-chí, m̄-káⁿ pa̍t-mi̍h. āu-lâi hō͘ hâu Kéng só͘ pek, gō-sí tī Tâi-siâⁿ, kok iā bia̍t-bô; kèng-pu̍t bāng hok-khì hoán-tńg siū chai-hō lah! Tuì Tiong-kok ū pu̍t í-āu, tāi-tāi ná toā heng-tōng kan-ko, ta̍k-hāng ê chai-hō ná chē, bô chi̍t sî pêng-an, che sī tuì pài pu̍t ná chio chai-hāi. án-ni ngó͘-siōng m̄ thang ho̍k-sāi che sī bêng. Chhin-chhiūⁿ Sèng-keng kóng, “Hit hō ngó͘-siōng, lâng ê chhiú só͘ tiau-khek, ū chhuì bē kóng-oē, ū ba̍k-chiu bē khoàⁿ, ū hīⁿ-khang bē thiaⁿ, ū phīⁿ-khang bē chhoán-khuì, ū chhiú bē the̍h, ū kha bē kiâⁿ, ū nâ-âu bē thun” (Si. 115:4-7).
Khó-sioh kīn-lâi ê sè-tāi só͘ ho̍k-sāi sîn pu̍t ngó͘-siōng, chhian kî pek koài ta̍k só͘-chāi ū kèng sîn-pu̍t, i ê miâ sǹg bē liáu, ū ê sī thong Tiong-kok só͘ kèng, ū-ê sī kok, hú, chiu, koān, só͘ pài-ê. Chhin-chhiūⁿ Chheng-kok Iông-chiu siâⁿ chi̍t keng biō ū pu̍t siōng bān-goā sian; Ji̍t-pún ū chi̍t keng biō ū pu̍t 3,3333 sian ê pu̍t siōng.
Chóng-kóng put-kò ū hun n̄g chióng. Chi̍t chióng sī ho̍k-sāi seng-sêng ê mi̍h chò sîn; chi̍t chióng sī kèng í-keng sí ê lâng chò sîn. Kèng seng-sêng ê mi̍h chiū-sī thiⁿ, tē, ji̍t, goe̍h, chheⁿ, san-chhoan, chuí, hoé, chit hō ê luī. Pài í-keng sí ê lâng chò sîn, chhin-chhiūⁿ Sek-kia, Lí Ló-kun, Gio̍k-hông, Tiuⁿ Thian-su, Thian-hui chiū-sī Má-chó͘, Koan-im, Koan-tè, Thó͘-tē-kong, Sêng-hông, Bûn-chhiong Khoe-seng, Lāu Chin-bú chiū-sī Siōng-tè-âi, Khó͘ Chin-kun, Sam-koan tāi-tè, Ngó͘-ga̍k-tè, àn-kong, Siau-kong, Châi-sîn, Chàu-kun, Mn̂g-sîn, Ngó͘-seng-ông, Lêng-ông, Ló͘ Pan-kong, Ngó͘-kok-sîn chiū-sī Lâu Béng chiong-kun, Sam-chheng, Pat-sian, Cha̍p peh lô-hàn, Kheⁿ-saⁿ-ko͘, Ông-iâ chiū-sī 390 chìn-sū, Lâu Chin-kun chiū sī Lâu Hái, Sam-mâu chin-kun, Ông Goân-soè, Tiuⁿ Ông-kong, Luî-kong, Sat-bó tāi-ông, Giâm-lô-ông, Tē-chông-ông. Taⁿ lio̍h-á kóng chiah ê pu̍t ê lâi-le̍k tī ē-té.
漢羅（Ùi原文改寫）
論偶像(2)
1900.02 179 卷 p.19-20
(接前卷第9面)
查考商朝武乙帝起頭做偶像做神;後來伊予雷拍死，因為真神上帝用雷刑罰做偶像ê人，來警戒後世代。可惜無曉悟， ná久ná傷重。到佇漢朝明帝ê時佛法chiàⁿ入中國，對按呢偶像ê歹風俗日日ná盛。明帝坐位chiàⁿ 18年nā-tiāⁿ，後來死失相紲，國位無久長。宋，齊，梁，元，魏，以下逐代nágâu敬佛，總是世代ná短。親像梁武帝捨身拜佛，一日食一頓，只有食果子，毋敢別物。後來予候景所逼，餓死佇台城，國也滅無;敬佛望福氣反轉受災禍lah!對中國有佛以後，代代ná大興動干戈，逐項ê災禍ná濟，無一時平安，這是對拜佛ná招災害。按呢偶像毋通服侍這是明。親像聖經講：「Hit號偶像，人ê手所雕刻，有喙袂講話，有目睭袂看，有耳空袂聽，有鼻空袂喘氣，有手袂提，有跤袂行，有嚨喉袂吞」(詩。 115:4-7)。
可惜近來ê世代所服侍神佛偶像，千奇寄百怪逐所在有敬神佛，伊ê名算袂了，有ê是通中國所敬，有ê是國，府，州，縣，所拜ê。親像清國揚州城一間廟有佛像萬外身;日本有一間廟有佛3，3333身ê佛像。
總講不過有分兩種。一種是服侍生成ê物做神;一種是敬已經死ê人做神。敬生成ê物就是天，地，日，月，星， 山川，水，火，這號ê類。拜已經死ê人做神，親像釋迦，李老君， 玉皇，張天師，天妃就是媽祖，觀音，關帝，土地公，城隍，文昌魁星，老真武就是上帝爺，許真君，三官大帝，五嶽帝，àn-kong，蕭公，財-神，灶君，門神，Ngó͘-seng-ông，Lêng-ông，魯班公，五穀神就是劉Béng將軍，三清，八仙，十八羅漢，Kheⁿ-saⁿ-ko͘，王爺就是390進士，劉真君就是劉海，三茅真君，王元帥，張王公，雷公，Sat-bó 大王，閻羅王，地藏王。Taⁿ略仔講chiah-ê佛ê來歷佇下底。
(後卷beh閣接。)