潘牧師

Phoaⁿ Bo̍k-su.

文獻資訊

項目	資料
作者	無lo̍h名
卷期	台南府城教會報
卷期	第175卷
日期	1899/10
頁數	73

白話字（原文數位化）

Phoaⁿ Bo̍k-su.

1899.10 175 koàn p73-74

Kū-nî saⁿ goe̍h ê Kàu-hoē-pò ū kì kóng, “Taⁿ lán Tâi-lâm ê kàu-hoē í-keng ū nn̄g ê pún-tē bo̍k-su,” chiū-sī Phoaⁿ Bo̍k-su kap Lâu Bo̍k-su. Taⁿ khó-sioh Phoaⁿ Bo̍k-su í-keng koè-óng. Chāi 8 goe̍h cha̍p-it ē-po͘ goán chih-tio̍h tiān-pò kóng i chhe 10 chiū-sī pài-sì ê-hng, tī Nâ-āu koè-sin. Hit-sî saⁿ lé-pài chêng goán chih-tio̍h siau-sit chai i phoà-pēⁿ siong-tiōng.Sòng Bo̍k-su chiū lo̍h-khì Nâ-āu khoàⁿ i. Khoàⁿ-liáu chiah teh siūⁿ Phoaⁿ Sian-seⁿ kiám-chhái ê kham-tit thoa nn̄g saⁿ goe̍h ji̍t kú, bô pān-phoe i hiah kín chiū lī-khui sè-kan.

Lūn i ê lâi-le̍k kap koè-sin ê chêng-hêng ǹg-bāng pa̍t ji̍t ē-tit thang khah siông-sè kì tī Kàu-hoē-pò. Chóng-sī tī chia ài kóng kuí-kù chiū hó.

Phoaⁿ Bêng-chu chhut-sì tī 1865 nî, pún-té sio̍k tī Giâm-chêng ê kàu-hoē. Chha-put-to 10 hoè hit-sî i thâu chi̍t pái thiaⁿ tō-lí. Kàu cha̍p-la̍k hoè chiū ji̍p Toā-o̍h, tha̍k kuí-nā goe̍h ji̍t kú chiū tī Hú-siâⁿ niá sé-lé. I jī-cha̍p hoè chiū chhut o̍h khì chò thoân-tō--ê, só͘ keng-koè sī chiàu ē-té kì hiah ê só͘-chāi, chiū-sī Kong-á-nâ, Ka-poà-soá, Ka-la̍h-po͘, Tang-káng, kap Phêⁿ-ô͘. āu-lâi Kàu-sū-hoē chhiáⁿ i lâi toà Hú-siâⁿ tàu kà Tiong-o̍h.

Saⁿ sì nî chêng lán Tâi-lâm lia̍t-uī ê Tiúⁿ-ló chò-hoé chū-chi̍p tī Hú-siâⁿ soà siat Tāi-hoē. Phoaⁿ Bo̍k-su kài-it chai siat Tāi-hoē ê lí-khì, ū toā chhut-la̍t tàu chò-chiâⁿ chit hō toā lī-ek kàu-hoē ê hong-hoat, só͘-í hit-tia̍p Tāi-hoē tâng-sim chhiáⁿ i chó Kì-sū. Lán Tāi-hoē ê sū-chêng bô lâng pí i khah chai-iáⁿ. Kàu kū-nî 3 goe̍h 12 ji̍t Tāi-hoē chū-chi̍p tī Nâ-āu Lé-pài-tn̂g siat-li̍p i chò Bo̍k-su. I tng Bo̍k-su ê chit khah bô chi̍t nî poàⁿ nā-tiāⁿ. I si̍t-chāi sī Chú chīn-tiong ê lô͘-po̍k; sī toā-toā lī-ek kàu-hoē ê chhe-ēng; sī lán chin hó kau-poê ê pêng-iú; iā sī chin ha̍k-būn ê sian-seⁿ. Ta Ni koè-sin lah! Lán ê sim bē-bián-tit iu-būn kàu bē-kò͘-tit, in-uī lâm-lō͘ hit gō͘ ê tông-hoē sī chhin-chhiūⁿ bô bo̍k-chiá ê iûⁿ-kûn, iū-koh thong kàu-hoē bô thang koh tit-tio̍h i ê chí-sī. Chóng-sī ke-koàn ê iu-būn pí lán-ê sī chám-jiân khah chhim. Goān Thiⁿ-pē an-uì in. Kin-nî Phoaⁿ Bo̍k-su chí-ū 35 hoè nā-tiāⁿ. Lán kàu-hoē ū chin toā khiàm kang. Lūn Siōng-tè tiàu chit ê toā lī-ek kàu-hoē ê tiong-liân lâng khì, lán iàu-boē chai sī uī-tio̍h sím-mi̍h in-toaⁿ, iàu-boē chai Siōng-tè ū sím-mi̍h hó ì-sù tī-teh. Tī kàu-hoē-lāi ū sím-mi̍h lâng hoaⁿ-hí lâi pó͘ i ê khoeh mah?

Chāi Hi-pek-lâi 11: 4 chat ê ì-sù sī “A-pek sui-jiân sí iáu-kú ná-chhin-chhiūⁿ iû-goân teh kóng-oē.” Chit nn̄g goe̍h ji̍t chêng Phoaⁿ Bo̍k-su kià chi̍t phiⁿ lūn hō͘ goán. Taⁿ chiong hit phiⁿ lūn kì tī ē-té, chiū-sī i sui-jiân sí iáu-kú iû-goân ná-chhin-chhiūⁿ kap lán kóng-oē.

漢羅（Ùi原文改寫）

潘牧師

1899.10 175 卷 p.73-74

舊年三月ê教會報有記講：「Taⁿ咱台南ê教會已經有兩个本地牧師，」就是潘牧師佮劉牧師。 Taⁿ可惜潘牧師已經過往。在八月十一ē晡阮接著電報講伊初10就是拜四ê昏，佇林後過身。 Hit時三禮拜前阮接著消息知伊破病傷重。 宋牧師就落去林後看伊。看了chiah teh想潘先生kiám-chhái ē堪得拖兩三月日久，無辦phoe伊hiah緊就離開世間。

論伊ê來歷佮過身ê情形向望別日會得通較詳細記佇教會報。總是佇遮愛講幾句就好。

潘Bêng-chu出世佇1865年，本底屬佇Giâm-chêng ê教會。差不多十歲 hit時伊頭一擺聽道理。到十六歲就入大學，讀幾那月日久就佇府城領洗禮。伊二十歲就出學去做傳道--ê，所經過是照下底記hiah-ê所在，就是岡仔林，Ka-poà-soá，Ka-la̍h-po͘，東港，佮澎湖。後來教師會請伊來蹛府城鬥教中學。

三四年前咱台南列位ê長老做伙聚集佇府城紲設大會。 潘牧師kài一知設大會ê理氣，有大出力鬥做成這號大利益教會ê方法，所以hit-tia̍p大會同心請伊做記事。咱大會ê事情無人比伊khah知影。到舊年3月12日大會聚集佇林後禮拜堂設立伊做牧師。伊當牧師ê職較無一年半nā-tiāⁿ。伊實在是主盡忠ê奴僕；是大大利益教會ê差用；是咱真好交陪ê朋友；也是真學問ê先生。 Taⁿ伊過身lah！咱ê心袂免得憂悶到袂顧得，因為南路hit五个同會是親像無牧者ê羊群，也閣通教會無通閣得著伊ê指示。總是家眷ê憂悶比咱ê是嶄然khah深。願天父安慰in。今年潘牧師只有35歲nā-tiāⁿ。咱教會有真大欠工。論上帝召這个大利益教會ê中年人去，咱猶袂知是為著甚乜因端，猶袂知上帝有甚乜好意思佇teh。佇教會內有甚麼人歡喜來補伊ê缺mah？

在希伯來11:4節ê意思是「亞伯雖然死猶過ná親像猶原teh講話。」這兩月日前潘牧師寄一篇論予阮。 Taⁿ將hit篇論記佇下底，就是伊雖然死猶過猶原若親像佮咱講話。