論寄批ê規矩

Lūn Kià-phoe ê kui-kí

文獻資訊

項目	資料
作者	無lo̍h名
卷期	台南府城教會報
卷期	第156卷
日期	1898/3
頁數	24

白話字（原文數位化）

Lūn Kià-phoe ê kui-kí

1898.03 156 koàn p.24

Ji̍t-pún siat phoe-kio̍k sī chin toā lō͘-ēng, Tâi-oân ná chē lâng teh kià phoe-chat óng-lâi. Taⁿ ài thong-ti lín chi̍t nn̄g hāng. Kià-phoe khah lím nn̄g-chîⁿ tāng tio̍h tah nn̄g-chiam-chîⁿ ê phoe-phiau. Nā-sī koè-thâu nn̄g-chîⁿ tāng tio̍h tah 4 chiam ê phoe-phiau, sui-jiân sī jī-chîⁿ-it tang nā-tiāⁿ, iáu-kú tek-khak tio̍h kô͘ 4 chiam chîⁿ ê, bē-ēng-tit 3 chiam ê. iū-koh hit-hō lō͘-hong-ê, chi̍t-tiuⁿ chi̍t-chiam-chîⁿ ê, tio̍h sè-jī, nā beh siá kóng sím-mi̍h oē, tek-khak tio̍h siá tī āu-bīn, m̄-thang siá tī chêng-bīn. Chêng-bīn chún lâng siá kià hō͘ bó͘ só͘-chāi bó͘-lâng siu, kap siá tuì sím-mi̍h só͘-chāi sím-mi̍h lâng bó͘-nî bó͘-goe̍h bó͘-ji̍t kià, kî-û ê oē lóng m̄-chún lâng siá, nā ke siá pa̍t-mi̍h oē tī chêng-bīn, chiū hō͘ phoe-kio̍k hoa̍t têng-poē chîⁿ; iā m̄-thang siá-tio̍h phoe-phiau, nā siá-tio̍h phoe-phiau iû-goân tio̍h hoa̍t téng-poē chîⁿ. In-uī ū lâng kià phoe lâi hō͘ goán bat hoān-tio̍h chit-chân sū, goán kuí-nā pái hō͘ phoe-kio̍k hoa̍t.

漢羅（Ùi原文改寫）

論寄批ê規矩

1898.03 156 卷 p.24

日本設批局是真大路用，台灣ná濟人teh寄批札往來。 Taⁿ愛通知恁一兩項。寄批較lím兩錢重著貼兩chiam錢ê批標。若是過頭兩錢重著貼4 chiam ê批標，雖然是二錢一重nā-tiāⁿ，猶過的確著糊4 chiam錢ê，袂用得3 chiam ê。又閣hit號露封ê，一張一chiam錢ê，著細膩，若beh寫講甚麼話，的確著寫佇後面，毋通寫佇前面。前面准人寫寄予某所在某人收，佮寫對甚麼所在甚麼人某年某月某日寄，其餘ê話攏毋准人寫，若加寫別物，畫佇前面，就予批局罰重倍錢；也毋通寫著批標，若寫著批標猶原著罰等倍錢。因為有人寄批來予阮捌犯著這層事，阮幾那擺予批局罰。