勸戒嫁娶ê條規
Khoàn-kài kè-chhoā ê Tiâu-kui
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第155卷 |
| 日期 | 1898/2 |
| 頁數 | 14 |
白話字（原文數位化）
Khoàn-kài kè-chhoā ê Tiâu-kui
1898.02 155 koàn p.14-15
Taⁿ lūn kè-chhoā sī jîn-lûn ê toā tō-lí, sī tuì Siōng-tè siat-li̍p, lâng tio̍h tuì-tiōng m̄-thang khoàⁿ-khin. Sèng-keng kóng, “Hun-in thang tuì-tiōng, iàu-kín tio̍h chheng-khì” (Khoàⁿ Hi-pek-lâi 13:4). Só͘-í hoān-nā lâng kiâⁿ chit-hō ê lé-sò͘, chi̍t-bīn sī hián-bêng i kong-hêng thàn hoat lâi kè-chhoā, bêng keng chèng chhú lâi chiâⁿ ang-bó͘; m̄-sī chhin-chhiūⁿ iah-piah poâⁿ-chhiûⁿ ê só͘ kiâⁿ. Koh chi̍t-bīn sī hián-bêng hoaⁿ-hí ê sū, hō͘ lâng kap i saⁿ-tâng hoaⁿ-hí. Sù-tô͘ Pó-lô kóng, “Kap hoaⁿ-hí ê tio̍h saⁿ-kap hoaⁿ-hí” (Lô-má 12:15). Chá ji̍t Chú Iâ-so͘ tī sè-kan ê sî, hoaⁿ-hí khì hù hun-in ê iân-toh. Thang chai lâng chiàu chin-lí lâi kiâⁿ kè-chhoā ha̍p-hun ê lé, chin-chiàⁿ sī kuì-khì chhiat-iàu ê sū.
Taⁿ pâi-lia̍t kuí-nā tiâu-khoáⁿ tī ē-té.
-
Lâm-lú tek-khak tio̍h tióng-sêng chiàⁿ thang kè-chhoā. Ū lâng boē chēng tióng-sêng chiū ha̍p-hun, che sī chin m̄-hó ê hong-sio̍k. Sī ū kuí-nā hāng ê sún-hāi. (1)Kiaⁿ-liáu ē hāi in pún-sin, hō͘ hoè-siū ná té. (2) Bē hiáu ang-bó͘ saⁿ khoán-thāi ê pún-hūn. (3) M̄-bat kà-kiáⁿ tī-ke ê hoat-tō͘.
-
Tio̍h it-lâm it-lú lâi ha̍p-hun kàu tī chi̍t-sì lâng. Nā m̄-sī kan-îm ê iân-kò͘ bô thang huì-chhin lâi pun-khui; sui-jiân lióng-pêng lóng kam-goān soah, iáu-kú tek-khak bē soah tit. Chú Iâ-so͘ kóng, “Siōng-tè só͘ phoè-ha̍p lâng m̄-thang pun-khui” (Má-thài 19:6)
-
Sìn Chú ê lâng tio̍h kap sìn Chú ê lâng saⁿ phit-phoè, m̄-thang kap sè-sio̍k lâng kè-chhoā. In-uī Sèng-keng kóng, “Tiōng-hū tī-teh, bó͘ hō͘ ang-bó͘ ê hoat pa̍k-tiāⁿ; tiōng-hu sí i chiū ū thoat-lī hit-ê hoat, chhut-chāi i só͘ ài kè, NĀ-SĪ SIO̍K TĪ CHÚ CHIAH THANG (I Lîm. 7:39.) Koh kóng, “BOH-TIT KAP M̄-SÌN Ê LÂNG PHIT-PHOÈ, in-uī hó kap pháiⁿ cháiⁿ-iūⁿ chò phoāⁿ? Kng kap àm cháiⁿ-iūⁿ saⁿ kau-poê?” Lūn chit-hō ê tō-lí sèng-keng lāi ū kóng bêng-bêng, chū-jiân ta̍k lâng tio̍h sūn-thàn m̄-bián koh gī-lūn. Chóng-sī khó-sioh ū ji̍p kàu-hoē ê lâng tiâu-kò͘-ì chhoā sè-sio̍k kè sè-sio̍k. Chhin-chhiūⁿ chit-hō ê só͘-chò, m̄-nā tng-chit ê lâng m̄-thang kā in ha̍p-hun; chiū-sī kok-tông Tiúⁿ-ló-hoē tio̍h cha-khó pān-lí.
-
Beh chò chhin-chiâⁿ tio̍h chiong lâm-lú ê miâ-sìⁿ tāi-seng saⁿ lé-pài liân-liân thong-ti pún-tông hoē-iú tāi-ke chai. Nā bô sím-mi̍h chó͘-tòng, jiân-āu chiàⁿ thang phèng-tiāⁿ ha̍p-hun.
-
Hun-in só͘ ēng ê tiāⁿ-thâu phèng-lé, í-ki̍p beh chhoā beh kè ê sî só͘ ēng ê lé-mi̍h, lóng thang chiàu-ta̍k-uī ê hong-lē. Put-kò iàu-kín só͘ kiâⁿ ê lé-gî, só͘ ēng ê mi̍h-kiāⁿ, tek-khak m̄-thang chham-chhap tī īⁿ-toan khiàn-sńg. In-uī sè-sio̍k só͘ ēng ê lé-mi̍h, ū-ê ǹg-bāng siám-pī hiong-siâ ok-soah, ū-ê ài tit pó-hō͘ ang-bó͘ ē-tit hô-hó kàu chi̍t-sì, ū-ê ài thiam kiáⁿ-sun ke hù-kuì, che lóng sī khiàn-sńg ê sim só͘ hoat chhut. Sìn Chú ê lâng beh oân-hun tio̍h chim-chiok hun-piat, kìⁿ ū īⁿ-toan ê ì-sù tio̍h tû-khì. Chiàⁿ thang hiong-siū Siōng-tè siúⁿ-sù toā-hok.
-
Kàu-hoē lāi ê lâng ha̍p-hun, iû-goân tio̍h ū hun-chu lé-thiap. Chóng-sī hun-chu lāi só͘ siá ê oē, tio̍h bô hoān-tio̍h Siōng-tè ê chin-lí. Nā ū lâng m̄ ài ēng pêng-siông hun-chu ê piān-thò oē, ài-tit lēng-goā siá ha̍p-hun ê iok-jī iā thang.
-
Kàu-hoē lāi ê lâng tuì chit-tia̍p í-āu tek-khak m̄-thang io sim-pū-á lâi chhī tī ke-lāi, ǹg-bāng toā-hàn hō͘ i ê hāu-siⁿ chiap-la̍p. Che sī m̄-hó ê hong-sio̍k, khah siông ū siⁿ-khí chē-chē hāng ê m̄ tú-hó. Só͘-í tio̍h kìm-chí.
-
Ū lâng chhin-chiâⁿ chò tiāⁿ-tio̍h iáu-boē chhoā, tú-tio̍h pē-bó sí, chiū khì chioh lâi sàng, soà chiū án-ni oân-hun, che iā sī m̄ ha̍p-gî. Iu-būn hoaⁿ-hí siāng chi̍t-sî bô ha̍p jîn-chêng. Kàu-hoē lāi ê lâng m̄-thang án-ni chò.
-
Ū só͘-chāi tú-á ha̍p-hun liáu, hit kuí mê-hng, sin-kiáⁿ-sài ê pêng-iú ji̍p khì nāu sin-niû-pâng, che chin toā m̄ ha̍p-gî, Kàu-hoē lāi ê lâng tek-khak m̄-thang án-ni kiâⁿ.
-
Kàu-hoē lāi ê lâng beh chò chhin-chiâⁿ m̄-thang kè-kàu phèng-kim ê chē-chió; chhin-chhiūⁿ ēng cha-bó͘-kiáⁿ chò bé-bē ê khoán-sit. iā goân-pún sin-niû phâng tê chhiáⁿ lâng-kheh sī hó lé ê ì-sù. Taⁿ ū só͘-chāi pìⁿ chò m̄ hó hong-sio̍k; sī ǹg-bāng tuì án-ni thang tit-tio̍h chē-chē chîⁿ. Che iā sī bô ha̍p-gî.
-
Lâm-lú saⁿ phit-phoè, nî-hoè tio̍h saⁿ-tuì, cheng-chha bô loā-chē. Toā siuⁿ chē hoè chin bô ha̍p-gî.
-
Koh thang hoān-hiâm--ê, chiū-sī ū lâng kan-ta ài khang-khang ê miâ-siaⁿ, tuì-tiōng tiap-á-kú chhia-hoâ, tì-kàu khai-huì koè-thâu, liân-luī chē-chē nî ê kan-khó͘. Só͘-í khó͘-khǹg kàu-hoē chèng lâng, tio̍h tuì-tiōng chiat-khiām sêng-si̍t, ta̍k hāng chiàu chin-lí tek-tiong ha̍p-gî lâi kiâⁿ chiū-sī.
漢羅（Ùi原文改寫）
勸戒嫁娶ê條規
1898.02 155 卷 p.14-15
Taⁿ論嫁娶是人倫ê大道理，是對上帝設立，人著對重毋通看輕。聖經講：「婚姻通對重，要緊著清氣」(看希伯來13:4)。所以凡若人行這號ê禮數，一面是顯明伊公行趁法來嫁娶，明經正娶來成尪某；毋是親像iah壁盤牆ê所行。 閣一面是顯明歡喜ê事，予人佮伊相同歡喜。使徒保羅講：「佮歡喜ê著saⁿ-kap歡喜」(羅馬12:15)。早日主耶穌佇世間ê時，歡喜去赴婚姻ê筵桌。 通知人照真理來行嫁娶合婚ê禮，真正是貴氣切要ê事。
Taⁿ排列幾nā條款tī下底。
1.男女的確著長成chiàⁿ通嫁娶。有人未曾長成就合婚，這是真毋好ê風俗。是有幾nā項ê損害。 (1)驚了會害in本身，予歲壽ná短。 (2) 袂曉尪某saⁿ款待ê本份。 (3) 毋捌教囝治家ê法度。
2.著一男一女來合婚到佇一世人。若毋是姦淫ê緣故無通廢親來分開；雖然兩爿攏甘願煞，猶過的確袂煞得。主耶穌講：「上帝所配合人毋通分開」(馬太19:6)。
3.信主ê人著佮信主ê人相匹配，毋通佮世俗人嫁娶。因為聖經講：「丈夫佇teh，某予尪某ê法縛定；丈夫死伊就有脫離彼个法，出在伊所愛嫁，若是屬佇主CHIAH THANG (I 林. 7:39。)閣講：「莫得佮毋信Ê人匹配，因為好佮歹2怎樣做伴？光佮暗怎樣相交陪？」論這號ê道理聖經內有講明明，自然逐人著順趁毋免閣議論。總是可惜有入教會ê人tiâu故意娶世俗嫁世俗。親像這號ê所做，毋nā當職ê人毋通kā in合婚；就是各堂長老會著查考辨理。
4.Beh做親chiâⁿ著將男女ê名姓代先三禮拜連連通知本堂會友大家知。若無甚乜阻擋，然後chiàⁿ通聘定合婚。
5.婚姻所用ê定頭聘禮，以及beh娶beh嫁ê時所用ê禮物，攏通照逐位ê風例。不過要緊所行ê禮儀，所用ê物件，的確毋通參插佇異端khiàn-sńg。因為世俗所用ê禮物，有ê向望閃避兇邪惡煞，有ê愛得保護尪某會得和好到一世，有ê愛添囝孫加富貴，這攏是khiàn-sńg ê心所發出。信主ê人beh完婚著斟酌分別，見有異端ê意思著除去。 Chiàⁿ通享受上帝賞賜大福。
6.教會內ê人合婚，猶原著有婚書禮帖。總是婚書內所寫ê話，著無犯著上帝ê真理。若有人毋愛用平常婚書ê便套話，愛得另外寫合婚ê約字也通。
7.教會內ê人對這tia̍p以後的確毋通io新婦仔來飼佇家內，向望大漢予伊ê後生接納。這是毋好ê風俗， 較常有生起濟濟項ê毋拄好。所以著禁止。
8.有人親chiâⁿ做定著猶袂娶，拄著父母死，就去借來送，紲就按呢完婚，這也是毋合宜。 憂悶歡喜siāng一時無合人情。教會內ê人毋通按呢做。
9.有所在拄仔合婚了，hit幾暝昏，新囝婿ê朋友入去鬧新娘房，這真大毋合宜，教會內ê人的確毋通按呢行。
10.教會內ê人beh做親chiâⁿ毋通計較聘金ê濟少；親像用查某囝做買賣ê款式。也原本新娘捧茶請人客是好禮ê意思。 Taⁿ有所在變做毋好風俗；是向望對按呢通得著濟濟錢。這也是無合宜。
11.男女相匹配，年歲著相對，精差無偌濟。大傷濟歲真無合宜。
12.閣通犯嫌--ê，就是有人kan-ta愛空空ê名聲，對重tiap仔久奢華，致到開費過頭，連累濟濟年ê艱苦。所以苦勸教會眾人，著對重節儉誠實，逐項照真理得中合宜來行就是。