莫得掛慮明仔日
Bo̍h-tit khoà-lū bîn-á-ji̍t
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第152卷 |
| 日期 | 1897/11 |
| 頁數 | 81 |
白話字（原文數位化）
Bo̍h-tit khoà-lū bîn-á-ji̍t
1897.11 152 koàn p.81-82
Chá-chêng tī Se-kok ū bó͘-lâng, ang-bó͘ nn̄g-ê sio-hoé-thoàⁿ teh tō͘-oa̍h; sī kèng-khiân ho̍k-sāi Chú, gâu hō khoán-thāi lâng. Í-keng gō͘-cha̍p goā hoè, iáu-boē ū kiáⁿ-jî. Sī chin sàn-hiong, ke-lāi bô poàⁿ-hāng mi̍h, chí-ū chi̍t-tè chhù thang khiā-khí, iok-liōng ta̍t 600 gîn nā-tiāⁿ. Chia̍h-chhēng siông-siông khiàm-khoeh.
Koh tú-tio̍h ki-hng ê sî-tang, bí kuì chhin-chhiūⁿ chin-chu, chhâ-chîⁿ kàu ná-chún jio̍k-kuì. Chiū kā lâng chioh-chîⁿ, khiàm-chè chin-chē, ji̍t-chí chi̍t-ē kú, chè-chú tuì koaⁿ-hú kò--i, boeh kó͘ i-ê chhù lâi hêng-khiàm. In nn̄g-ê lāu-ang-bó͘ bô hoat-tit i ta-oâ. Chè-chú boē lâi kó͘-chhù ê chêng chi̍t-ji̍t, sī An-hioh-ji̍t; in ang-bó͘ chiū khì Lé-pài-tn̂g thiaⁿ tō-lí; tú-hó Bo̍k-su kóng Má-thài 6 chiuⁿ 34 chat, chiong”Bo̍h-tit khoà-lū bîn-á-ji̍t” ê kù chò tê-ba̍k, lâi gī-lūn tō-lí. In ang-bó͘ thiaⁿ-liáu lio̍h-á siū an-uì in ê sim, tò-khì chhù-ni̍h koh tha̍k chit chat, sêng-sim kiû Siōng-tè pang-chān.
Tē-jī ji̍t koaⁿ-hú lâi kó͘-chhù, in nn̄g-ê lāu-lâng to̍k-to̍k hn̄g-hn̄g khiā teh thî-khàu; chhut-chāi chèng-lâng só͘-chò, nā-sī sim-lāi iû-goân kî-tó bô soah. Thêng tiap-á-kú, chèng-lâng chū-chi̍p lâi beh bé chhù. Thâu chi̍t-ê chhut kè kóng, 300 gîn. Tē-jī ê kóng, 350gîn. Tē-saⁿ ê kóng, 400 gîn. Tē-sì ê kóng, 450 gîn. Kóng iáu-boē soah, hut-jiân ū chi̍t-ê chun-kuì ê lâng kín-kín cháu--lâi, khuì chhoán boē soah, chiū toā-siaⁿ chhut kè kóng, 500 gîn. Tuì án-ni chèng-lâng lóng tiām-tiām, chiū tiāⁿ-tio̍h chhù ê kè-chîⁿ. Hit-ê chun-kuì ê lâng khui tē-á the̍h gîn hō͘ chè-chú. Chè-chú chiū mn̄g, Lí sím-mi̍h miâ-sèⁿ? Soà mn̄g lí bé chhù sím-mi̍h iân-kò͘? Hit-ê chun-kuì ê lâng ìn kóng, Goá khoàⁿ in nn̄g-ê lāu-ang-bó͘ thî-thî khàu-khàu, chhuì-lāi sè-siaⁿ teh liām, goá m̄-chai sī sím-mi̍h iân-kò͘, nā-sī goá phah-sǹg in sī kèng-khiân ê lâng; só͘-í lîn-bín--in, thè in poê chit 500 ê gîn-chîⁿ, sī sim só͘ kam-goān, kóng-soah, chiū chò i khì.
Jiân-āu chè-chú chiū kiò in ang-bó͘ lâi, chiū kā in kóng, lín thang koh tit-tio̍h kū-chhù lâi khiā-khí; in-uī hit-ê chun-kuì ê lâng-kheh thè lín sio̍k-hoê. Siat-sú lín ài kā i siā in, nā-sī hit-ê lâng í-keng khì-lah, iā m̄-chai tiàm tī tó-uī.
In nn̄g ê lāu-lâng chiū tńg-khì sit-lo̍h koh tit-tio̍h ê chhù, tâng siaⁿ o-ló Chú ê toā-in; kám-siā Chú ín-chún in ê kî-tó. Soà phah chio̍h-pi khiā tī mn̂g-kháu, siá Má-thài 6 chiuⁿ 33-34 chat, chò éng-oán ê kì-liām; hit nn̄g-chat chiū-sī kóng,”Nā sī Siōng-tè ê kok kap I ê gī tio̍h kiû, chiū chiah-ê mi̍h chū-jiân ke hō͘ lín. Só͘-í bo̍h-tit khoà-lū tī bîn-á-ji̍t, bîn-á-ji̍t ê khoà-lū, tio̍h khoà-lū tī bîn-á-ji̍t; kin-á-ji̍t ê tio̍h-boâ, tio̍h-boâ tī kin-á-ji̍t, chiū kàu-gia̍h.”
Tuì án-ni khoàⁿ-khí-lâi lán nā sêng-sim kî-tó, chiū put-lūn kiû sím-mi̍h, tek-khak tit-tio̍h Siōng-tè ín-chún, mi̍h-sái khoà-lū tī bîn-á-ji̍t. Sù-tô͘ Pí-tek kóng,”Tio̍h chiong só͘ khoà-lū ê tāi-chì kau-hù Siōng-tè, Siōng-tè chiàu-kò͘ lín.”Che oē sêng-si̍t ū iáⁿ. Só͘-í lán thàn Kiù-chú ê kà-sī, ta̍k-hāng oá-khò I, hâng-ho̍k I, kau-tāi I kā lán siat-hoat, chiū m̄-nā lêng-hûn tit-tio̍h hok-khì pêng-an, chiū seng-khu tī sè-kan ta̍k-ji̍t tit-tio̍h an-ún m̄-bián khoà-lū. (Hoan-e̍k oē-pò)
漢羅（Ùi原文改寫）
莫得掛慮明仔日
1897.11 152卷 p.81-82
早前tī 西國有某人，翁某兩個燒火炭teh 渡活；是敬虔服事主，gâu號款待人。已經五十外歲，iáu-boē有子兒。是真散hiong，家內無半項物，只有一塊厝thang企起，約量值600銀nā -tiāⁿ。食穿常常欠缺。
Koh tú著飢荒ê 時冬，米貴親像珍珠，柴錢到那準肉桂。就kā人借錢，欠債真濟，日子一下久，債主tuì 官府告--伊，欲估伊ê 厝來還欠。In二個老翁某無法得伊ta-oâ。債主boē來估厝 ê 前一日，是安息日；in翁某就去禮拜堂聽道理；tú好牧師講馬太6章 34 節，將「莫tit 掛慮明仔日」ê 句做題目，來議論道理。In 翁某聽了略仔受安慰in ê 心，倒去厝ni̍h koh讀這節，誠心求上帝幫贊。
第2日官府來估厝，in兩個老人獨獨遠遠企teh啼哭；出在眾人所做，若是心內猶原祈禱無煞。停tiap仔久，眾人聚集來beh 買厝。頭一個出價講，300 銀。第2個講，350銀。第3個講，400 銀。第4個講，450 銀。講iáu-boē煞，忽然有一個尊貴ê 人緊緊走--來，氣喘boē煞，就大聲出價講，500 銀。Tuì án -ni眾人攏恬恬，就定著厝 ê 價錢。Hit個尊貴 ê 人開袋仔提銀hō͘ 債主。債主就問，你甚mih名姓？續問你買厝甚mih緣故？Hit個尊貴ê 人應講，我看in兩個老翁某啼啼哭哭，嘴內細聲teh念，我m̄知是甚mih緣故，若是我扑算in是敬虔ê 人；所以憐憫--in，替in 賠這 500 ê銀錢，是心所甘願，講煞，就做伊去。
然後債主就叫in 翁某來，就kā in 講，lín thang koh得著舊厝來企起；因為hit個尊貴ê人客替lín 贖回。設使lín ài kā伊謝恩，若是hit個人已經去lah，也m̄ 知tiàm tī tó位。
In兩個老人就轉去失落koh得著ê 厝，同聲o-ló主ê 大恩；感謝主允准in ê 祈禱。續扑石碑企tī 門口，寫馬太 6 章 33-34 節，做永遠 ê 記念；hit二節就是講︰「若是上帝ê 國kap伊ê 義著求，就chiah-ê 物自然加hō͘ lín。所以莫tit掛慮tī 明仔日，明仔日 ê 掛慮，著掛慮tī 明仔日；今仔日 ê 著磨，著磨tī 今仔日，就夠額」。
Tuì án -ni看起來咱若誠心祈禱，就不論求甚mih，的確得著上帝允准，物使掛慮tī 明仔日。使徒彼得講︰「著將所掛慮 ê 代誌交咐上帝，上帝照顧lín。」Che話誠實有影。所以咱趁救主ê 教示，逐項倚靠伊，降服伊，交代伊kā 咱設法，就m̄若靈魂得著福氣平安，就身軀tī世間逐日得著安穩m̄免掛慮。(翻譯畫報)