補養心神詩
Pó͘ ióng-sim-sîn-si
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府城教會報 |
| 卷期 | 第106卷 |
| 日期 | 1894/2 |
| 頁數 | 10 |
白話字（原文數位化）
Pó͘ ióng-sim-sîn-si
1894.02 106 koàn p.10
“ióng-sim-sîn-si” chi̍t-pún sī chò Lán kàu-hoē ê toā lō͘-ēng , chiông-tiong ê si chē-chē chin-hó thang kà-sī lâng , hō͘ lâng khah-khoài bat tō-lí . Chóng-sī ū chi̍t-hāng thang hiâm , chiū-sī siuⁿ chió , si chí-ū 59 siú nā-tiāⁿ , bē-tit thang chiâu-pī chò kàu-hoē ta̍k-hāng ê lō͘-ēng. Phah-sǹg thiⁿ ē bô chi̍t-ê kàu-hoē chhin- chhiūⁿ lán-ê hiah-toā si-chheh kàu-hiah Khiàm-khoeh . iā chiah-kú lóng bô ke- thiⁿ sin-ê , chha-put-to jī-cha̍p nî kú iû- goân sī hit-pún . Hit-sî ê tiong-kan Cha̍p- lio̍k chham Hoē-pò khiok ū sin-chhut kuí-nā siú ; chóng-sī kéng-soán--khí-lâi chí-ū cha̍p-goā siú ē-kham-tit ēng . Chiah-ê si iā lóng sī goán goā-kok lâng chò--ê . Hiaⁿ-tī bô chò , káⁿ bô tek-khak sī in-uī in bē-ē , kiám-chhái sī tuì in bô phah-sǹg , á-sī bē hiau-tit thang ēng hit- ê tú-hó ê tō-lí .Goán chó͘-ke ê si chin- chē , iā chin-hó , hō͘ lâng gîm-liáu lóng siū kám-kek . Nā chiong hiah-ê si hoan- e̍k chit-pêng ê oē , kàu-hoē ún-tàng tit- tio̍h lī-ek ; Só͘-í taⁿ kéng-chhut hit-pêng toā chhut-miâ ê si , chiong hit--ni̍h ê ì-gī kì tī ē-té ; chhiáⁿ ta̍k só͘-chāi ê hiaⁿ-tī chhì-khoàⁿ ē-tit thang chiàu chit-ê ì-sù lâi chò-si . Lóng-chóng ū 4 chat, muí chat 6 choā , muí choā 7 jī . Tê -ba̍k hō-chò Bān-sè-poâⁿ , sī chí Kiù-chú Iâ-so͘ . iā in-uī si chò-liáu thang chò kong ê lō͘- ēng, chhiáⁿ Tn̂g-soaⁿ lia̍t-uī ê sian-siⁿ lâi soà chàn-sêng chit-ê tāi-chì.
- Bān-sè-poâⁿ thè goá phah-khui,
Kiû lí ín goá bih tī hit tiong-kan.
Lí ê hia̍p-ē hō lâng chha̍k-phoà,
Chuí chham hoeh lóng lâu-chhut-lâi;
Hō͘ goá tit-tio̍h nn̄g hāng ê kong-hāu,
Sià-bián goá-ê choē , sé goá-ê sim.
2.Goá sui-jiân chīn-la̍t tio̍h-boâ,
iáu-kú bē-tit chiâu-thàn lí-ê lu̍t-hoat,
Sui-jiân jia̍t-sim lóng bô thè,
Ba̍k-sái éng-éng lâu bô thêng,
Tàu-tí lóng bē sio̍k-choē,
To̍k-to̍k lí ē-tit kiù-goá.
3.Goá chhiú khang-khang lâi chiū lí,
Kan-ta khîⁿ-tio̍h lí-ê si̍p-jī-kè;
Goá thǹg-theh chiū lí kiû i-chiûⁿ,
Goá nńg-chiáⁿ chiū lí kiû in-tián,
Goá lâ-sâm chiū-kīn chuí-choâⁿ,
Kiù-chú sé goá , nā-bô goá chiū sí.
4.Goá iáu-oa̍h tī sè-kan ê sî,
Á-sī lîm-chiong khuì-tn̄g ê sî,
Á-sī sí-āu chiūⁿ koân ê kéng-kài,
Khoàⁿ-kìⁿ lí chē-uī sím-phoàⁿ,
Bān-sè-poâⁿ thè goá phah-khui,
Kiû lí ín goá bih tī hit tiong-kan.
Hiān chia lâng í-keng chiong chit-ê tō- lí chò-chiâⁿ si . Taⁿ lâi ín tī ē-té hō͘ lín khoàⁿ ; chhiáⁿ tāi-ke chim-chiok kàu- chiàⁿ , khoàⁿ tó-uī eng-kai tio̍h ké-oāⁿ.
1.Thè goá phah-phoà Chio̍h-poâⁿ sin,
Hō͘ goá bih tī lí lāi-bīn;
Lí siū chhiuⁿ-chha̍k hia̍p-ē khui,
Khang-chhuì lâu-chhut hoeh kap chuí;
Nn̄g-hāng kong-hāu goá lóng ài,
Sià-choē sé-sim tû pháiⁿ-tāi.
2.Goá sin chi̍t-sì chò hó lâng,
Thài-ē lóng kap lu̍t-hoat tâng?
Sui-sī in-khîn bô ià-lán,
Ba̍k-sái siông-lâu sim bē an,
Choē-tāng ka-tī bē-ē oân,
Kiù goá to̍k-to̍k lí ū koân.
3.Goá taⁿ khang-chhiú lâi chiū-kīn,
Si̍p-jī-kè-ē kiû khó-lîn;
Chhiah-thé bāng lí sù i-chiûⁿ,
Nn̄g-chiáⁿ bāng lí khéng poê-iúⁿ,
Lâ-sâm chìn-kàu oa̍h-choâⁿ piⁿ,
Kiû lí sé goá têng-thâu-siⁿ.
4.Kiám-chhái sè-chiūⁿ teh tō͘-oa̍h,
Kiám-chhái lîm-chiong ba̍k ha̍p-oá,
Kiám-chhái boa̍t-ji̍t lī tē-bīn,
Khoàⁿ lí chē-uī phoàⁿ bān-bîn,
Thè goá phah-phoà Chio̍h-poâⁿ-sin,
Hō͘ goá bih tī lí lāi-bīn.
漢羅（Ùi原文改寫）
補養心神詩
1894.02 106 koàn p.10
「養心神詩」1本是做咱教會ê大路用，從中ê詩濟濟真好thang 教示人，hō͘ 人較快bat 道理。總--是有1項thang 嫌，就是傷少，詩只有59首nā-tiāⁿ，bē-tit thang 齊備做教會逐項ê路用。扑算天下無1個教會親像咱ê hiah 大詩冊到hiah欠缺。也chiah-kú攏無加添新ê,差不多20年久猶原是hit 本。Hit 時ê中間雜錄參會報卻有新出幾若首；總--是揀選--起-來只有10外首會堪tit用。Chiah-ê 詩也攏是阮外國人做--ê。兄弟無做，káⁿ無的確是因為in bē會，kiám-chhái是tuì in無扑算，抑是bē 曉tit thang 用hit 個tú好ê道理。阮做過ê詩真濟，也真好，hō͘ 人吟了攏受感激。若將hiah-ê 詩翻譯這爿ê話，教會穩當得著利益。所以今揀出hit 爿大出名ê詩，將hit --ni̍h ê意義記tī 下底；請逐所在ê兄弟試看會tit thang 照這個意思來做詩。攏總有4 節，每節6 choā,每choā 7 字。題目號做萬世磐，是指救主耶穌。也因為詩做了thang 做公ê路用，請唐山列位ê先生來續贊成這個代誌。
1.萬世磐替我扑開，
求你引我bih tī hit 中間。
你ê 脅下 hō͘ 人chha̍k--破，
水參血攏流--出-來；
Hō͘ 我得著2項ê功效，
赦免我ê 罪，洗我ê 心。
2.我雖然盡力著磨，
iáu-kú bē-tit 齊趁你ê 律法，
雖然熱心攏無退，
目屎湧湧流無停，
到底攏bē 贖罪，
獨獨你會tit救我。
3.我手空空來就你，
Kan-ta khîⁿ著你ê 十字架；
我thǹg-theh 就你求衣裳，
我軟chiáⁿ就你求恩典，
我lâ-sâm就近水泉，
救主洗我，若無我就死。
4.我iáu 活tī 世間ê 時，
抑是臨終氣斷ê 時，
抑是死後上懸ê境界，
看見你坐位審判，
萬世磐替我扑開，
求你引我bih tī hit 中間。
現chia 人已經將這個道理做成詩。今來印tī 下底hō͘ lín 看；請大家斟酌校正，看tó位應該著改換。
1.替我扑破石磐身，
Hō͘ 我bih tī 你內面；
你受銃chha̍k 脅下開，
空嘴流出血kap水；
2項功效我攏ài,
赦罪洗心除歹代。
2.我身一世做好人。
Thài會攏kap律法tâng?
雖是慇懃無厭懶，
目屎常流心bē 安，
罪重家己bē會完，
救我獨獨你有權。
3.我今空嘴來就近，
十字架下求可憐；
赤體望你賜衣裳，
軟chiáⁿ望你肯培養，
Lâ-sâm進到活泉邊，
求你洗我重頭生。
4.Kiám-chhái世上teh 渡活，
Kiám-chhái臨終目合倚，
Kiám-chhái末日離地面，
看你坐位判萬民，
替我扑破石磐身，
Hō͘我bih tī 你內面。