譬喻仁愛
Phì-jū jîn-ài
文獻資訊
| 項目 | 資料 |
|---|---|
| 作者 | Chè-hān Chè-hān |
| 卷期 | 台南府城教會報 |
| 卷期 | 第101卷 |
| 日期 | 1893/8 |
| 頁數 | 92 |
白話字（原文數位化）
Phì-jū jîn-ài
1893 nî 8--goe̍h 101 koàn, p.92
(Hoē-iú Chè-hān e̍k--ê)
Tī Tāi-ngô͘-kok ū chi̍t-ê su-bûn lâng chin gâu tù chheh. I só͘ tù ū chi̍t pún chiông-tiong ū siat chi̍t-ê phì-jū, kóng-kiò, “Nā ū jîn-ài tī-teh, Siōng-tè iā chiū tī hia”. I só͘ ēng lâi piàu-bêng chit nn̄g kù ê ì-sù soà kì tī ē-té.
Tī bó͘ só͘-chāi ū chi̍t-ê lâng sī pó͘-ê-sai-hū, ū chi̍t ji̍t ngó͘-jiân khoàⁿ sèng-chheh, khoàⁿ kàu Lō͘-ka 7:37-50 hit chām, teh kóng Hoat-lī-sài lâng chhiáⁿ Kiù-chú, bô hó-lé khoán-thāi i. Chēng-chēng teh siūⁿ chit-ê ì-sù, chiām-chiām soà khùn-khì. Bîn-bāng-tiong giám-jiân thiaⁿ-kìⁿ ū siaⁿ teh kóng,” Má-teng-ah!Ma-teng-ah! Bîn-á-chài lí tio̍h khoàⁿ lō͘, goá teh beh lâi. “Chi̍t-ē thiaⁿ-kìⁿ chiū chhéⁿ, phah-sǹg Kiù-chú káⁿ ū-iáⁿ beh lâi.
Tuì hit ji̍t ti̍t-ti̍t liâu-bāng, tāi-seng tú-ū chi̍t-ê iau-koâⁿ ê lâng lâi, i chiū hō͘ i chia̍h. Koh tiap-á-kú, iū ū chi̍t-ê kan-khó͘ ê hū-jîn-lâng chhoā chi̍t-ê gín-ná lâi, i chiū hiahN i-chiûⁿ hō͘ in chhēng. Jiân-āu koh-chài khoàⁿ-kìⁿ ū chi̍t-ê bé-bē ê hū-jîn-lâng kap gín-ná teh oan-ke, i chiū soà kā in chhú-hô. án-ni chò chit kuí chân sū, kèng-jiân thèng-hāu kàu ji̍t àm, m̄-kú Kiù-chú pún-sin lóng bô lâi. Kàu hit ê-hng, chiū koh hian-khui sèng-chheh, liâm-piⁿ chhiok-tio̍h i-ê sim tú-tú siūⁿ-tio̍h cha-hng só͘ khoàⁿ ê īⁿ-siōng soà hóng-hut thiaⁿ-kìⁿ ū kha-pō͘-siaⁿ tī poè-āu teh kiâⁿ-lâi kiâⁿ-khì. oa̍t-thâu chi̍t-ē khoàⁿ, chhin-chhiūⁿ tī hit chhù-kak ū lâng-hêng, hī-khang-lāi chiū thiaⁿ-kìⁿ sè-á-siaⁿ teh kóng, “Má-teng-ah!Má-teng-ah!lí kiám bē jīn-tit goá?”Má-teng kóng, “Lí sī sím-mi̍h lâng?”Liâm-piⁿ hit-ê i chêng só͘ hō͘ i chia̍h--ê chhut-lâi, kā i kóng, “Sī goá lah”!Kóng-liáu chò in khì. Koh i kā lâng chhú-hô hit nn̄g-ê, kha chiap kha iā lâi teh kóng, “Sī goá lah”! Hit-sî Má-teng sim chin hoaⁿ-hí, soà ia̍h sèng-chheh khí-lâi khoàⁿ, tha̍k Má-thài 25:40, teh kóng: “Í-keng kiâⁿ án-ni khoán-thāi goá-ê hiaⁿ-tī tē-it-sè-ê chi̍t-ê, chiū-sī kiâⁿ i khoán-thāi goá”. Tha̍k-liáu liâm-piⁿ ê hiáu-tit só͘ bāng ê īⁿ-siōng sî-chāi bô phiàn i; chiū chai Kiù-chú hit ji̍t kó-jiân lâi, i ia̍h kó-jiân chiap-la̍p i.
漢羅（Ùi原文改寫）
譬喻仁愛
1893年8--月101卷，p.92
(會友Chè-hān譯--ê)
佇 Tāi-ngô͘國有一個斯文人真gâu著冊。伊所著有一本從中有設一个譬喻，講叫，「若有仁愛佇teh，上帝也就佇遐」。伊所用來表明這兩句ê意思紲記佇下底。
佇某所在有一个人是補鞋師傅，有一日偶然看聖冊，看到路加7:37-50 hit chām，teh講法利賽人請救主，無好禮款待伊。靜靜teh想chit-ê意思，漸漸紲睏去。眠夢中儼然聽見有聲teh講：「Má-teng-ah！Ma-teng-ah！明仔載你著看路，我teh beh來。」一下聽見就醒，拍算救主敢有影beh來。
對hit日直直瞭望，事先拄有一个枵寒ê人來，伊就予伊食。擱tiap仔久，又有一个艱苦ê婦jîn人chhoā一个囡仔來，伊就hiahN衣裳予in穿。然後擱再看見有一个買賣ê婦jîn人佮 囡仔 teh冤家，伊就紲共in取和。安呢做chit幾層事，竟然聽候到日暗，毋過救主本身攏無來。到hit ê昏，就擱掀開聖冊，連鞭觸著伊ê心拄拄想著昨昏所看ê異象紲彷彿聽見有腳步聲佇背後teh行來行去。越頭一下看，親像佇hit厝角有人形，耳孔內就聽見細仔聲teh講：「Má-teng-ah！Má-teng-ah！你kiám袂認得我？」Má-teng講：”你是甚乜人？”連鞭彼个伊前所予伊食--ê出來，共伊講，「是我lah」！講了做in去。擱伊共人取和 hit兩个，跤接跤也來teh講：「是我lah」！Hit時Má-teng心真歡喜，紲亦聖冊起來看，讀馬太25:40，teh講：「已經行按呢款待我ê兄弟第一細ê一个，就是行伊款待我」。讀了連鞭ē曉得所夢ê異象實在無騙伊；就知救主hit日果然來，伊亦果然接納伊。