新年的詩

Sin-nî ê Si

文獻資訊

項目	資料
作者	無lo̍h名
卷期	台南府城教會報
卷期	第94卷
日期	1893/2
頁數	11

白話字（原文數位化）

Sin-nî ê Si

1893.02  tē 94 koàn  p.11

（簡譜略）

“Siōng-tè, goán ê Siōng-tè, ji̍t goe̍h ku8-tn̂g, tek-khak chiàu-kò͘ goán, kàu sí bô soah”－Si-phian 48:14.

1.Chú ū in-tián toā chû-pi,

Hō͘ goán an-jiân koè chi̍t-nî.

Goán taⁿ kám-siā ēng sêng-sim,

Chhiáⁿ Chú Iâ-so͘ thiaⁿ goán gîm.

2.Choē-koà chē-chē kau-tāi lí,

Sī li tiâu-lâi thè goán sí.

Koè-sin tāi-chì pàng chi̍t pêng,

n̄g-bāng êng-kng ti̍t chin8-chêng.

3.Boē lâi tāi-chì chin o͘-àm,

Goān Chú chhoā goán kàu lō͘-chām;

Tú-tio̍h tuì-te̍k hiông-ok lâi,

Chú lí chān goán kap i thâi.

4.Ū-sî loán-jio̍k kap iu-būn,

Kiû Chú kian-kò͘ goán sîn-hûn;

Kiâⁿ kàu khòng-iá toā soa-po͘,

Jīn Chú éng-oa̍h chin ê lō͘.

5.Sí-sit ê lō͘ thang kiaⁿ-hiâⁿ,

Kin-nî chī-chuī tio̍h seng kiâⁿ ?

Thiⁿ-pē goān lí toā kàng-lîm,

Lîm-chiong an-uì i-ê sim.

6.Hō͘ goán chheng-sim kap sìn-si̍t,

Hō͘ goán kap Chú ná chhin-bi̍t.

Chān goán khuì-la̍t gâu un-jiû,

Kham tì èng-ún ê bián-liû.

7.Thang siū in tī bêng-kiong-lāi,

Toā chheng-chàn im-ūn hô-hâi,

O-ló Chú-cháiⁿ tiàm thian-tông,

Bān-chú ê Chú, ông ê Ông.

漢羅（Ùi原文改寫）

新年的詩

1983.02  第94卷  p.11

（簡譜略）

「上帝，阮的上帝，日月久長，的確照顧阮，到死無煞」詩篇48：14。

1.主有恩典大慈悲，

予阮安然過1年。

阮今感謝用誠心，

請主耶穌聽阮吟。

2.罪過濟濟交代你，

是你tiâu來替阮死。

過身代誌放1爿，

向望榮光直進前。

3.未來代誌真烏暗，

願主chhoā阮到路站；

拄著對敵凶惡來，

主你贊阮佮伊刣。

4.有時軟弱佮憂悶，

求主堅固阮神魂；

行到曠野大沙埔，

認主永活真的路。

5.死失的路通驚惶，

今年是誰著先行？

天父願你大降臨，

臨終安慰伊的心。

6.予阮清心佮信實，

予阮佮主那親密。

贊阮氣力gâu溫柔，

堪戴應允的冕旒。

7.通受恩佇明宮內，

大稱讚音韻和諧，

呵咾主宰踮天堂，

萬主的主，王的王。