應該著謹慎

ENG-KAI TIO̍H KÍN-SĪN

文獻資訊

項目	資料
作者	無lo̍h名
卷期	台南府城教會報
卷期	第94卷
日期	1893/2
頁數	6

白話字（原文數位化）

ENG-KAI TIO̍H KÍN-SĪN

1893.02 94 koàn p.6

CHHIÁN TĀI-KE KHOÀN TUÌ-BĪN Ê ANG-Á-TÔ͘

Ū chi̍t-ê hū-jîn-lâng, miâ-chò Khîn-ài-chím, bô-tâ-oâ tio̍h khì hn̂g--ni̍h pê chháu. I ū chi̍t-ê kiáⁿ kiò-chò Khûn-á. In-uī hit-ê gín-ná sī sè-hàn bē-tit kā i pàng tī chhù--ni̍h, só͘-í tio̍h toà i chò-hoé khì. Tng-teh chò kang ê sî tú-tio̍h Khûn-á ià-siān ài khùn, chiū kā i hē tī chháu--ni̍h, koh chiong hō͘-soàⁿ khoà-teh kā i jia. Khîn-ài-chím teh khîn-khîn chò kang, iáu-kú it-tio̍h kiáⁿ, só͘-í chia̍p-chia̍p oa̍t-thâu teh khoàⁿ i ū ún-tàng á-bô.

Chit-ê hū-jîn-lâng ū chi̍t-chiah káu, hō-chò Hoe-á, sī put-chí ū lō͘-ēng ê cheng-seⁿ. Hoe-á chiàu-kò͘ i. Tī Khûn-á sin-piⁿ ū chi̍t-pau kan- niû. Hoe-á iā chiàu-kò͘, lóng bô tham-sim beh oá-khì chia̍h.

Hit-sî sī hó-thiⁿ, só͘-í chiáu-á kap boé-ia̍h tī poàⁿ-khong-tiong poe-lâi poe-khì.

Hn̂g--ni̍h ê āu-bīn ū chi̍t-keng lé-pài-tn̂g chiū-sī hū-jîn-lâng kap gín-ná tú-tio̍h Lé-pài-ji̍t ū ji̍p-khì siú lé-pài.

Lán tāi-ke tio̍h o̍h Khîn-ài-chím ê khoán-sit; ia̍h tio̍h chiàu Hoe-á ê bô͘-iūⁿ lâi gâu kín-sīn.

To̍k-to̍k lí ta̍k-hāng ê tāi-chì tio̍h tî-hông. II Thê-mô͘-thài 4:5.

漢羅（Ùi原文改寫）

應該著謹慎

1893.02 94卷 p.6

請大家看對面Ê尪仔圖

有一個婦人人，名做勤愛嬸，無tâ-oâ著去園--裡耙草。伊有一個囝叫做勤仔。因為hit-ê囡仔是細漢bē得kā伊放tī厝--裡，所以著帶伊作伙去。當teh做工ê時tú著勤仔厭 siān ài睏，就kā伊下tī草--裡，koh將雨傘掛teh kā伊遮。勤愛嬸teh勤勤做工，iáu-kú益著囝，所以捷捷oa̍t頭teh看伊有穩當抑無。

這個婦人人有一隻狗，號做花仔，是不止有路用ê精牲。花仔照顧伊。Tī勤仔身邊有一包乾糧。花仔也照顧，攏無貪心beh倚去食。

Hit時是好天，所以鳥仔kap尾蝶tī半空中飛來飛去。

園--裡ê後面有一間禮拜堂就是婦人人kap囡仔tú著禮拜日有入去守禮拜。

咱大家著學勤愛嬸ê款式；亦著照花仔ê模樣來gâu謹慎。

獨獨你逐項ê代誌著持防。 II提摩太 4:5。