人ná飛鳥
Lâng ná poe-chiáu
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 台南府教會報 |
| 卷期 | 第86卷 |
| 日期 | 1892/6 |
| 頁數 | 42 |
白話字（原文數位化）
Lâng ná poe-chiáu
1892.06 86 koàn p.42
Lio̍k-tiâu ê sî, ū Kàu-su khì Eng-kok, kā ông kóng, goá thoân Sèng-kàu tī chia, chhiáⁿ ông ín-chún. Ông liâm-piⁿ chiū tiàu chèng gī-sū, tī hit mê-hng saⁿ- kap chū-chi̍p, tāi-ke chham-gī chit chân sū; gī-lūn liáu chhin-chhiūⁿ m̄ ín-chún. Hut-jiân ū chi̍t-chiah chiáu tuì goā-bīn poe-ji̍p-lâi, koh suî-sî poe-chhut-khì, chi̍t-tiap-á-kú hut-jiân bô khoàⁿ-kìⁿ, Hit-sî teh chū-hoē ê tiong-kan, ū chi̍t- ê lāu-lâng khí--lâi kóng, goá ū chi̍t-kù oē beh kóng, chhiáⁿ ông bo̍k-tit chó͘-chí. Ông kóng, tio̍h, chiū chún i kóng.
Lāu-lâng chiū kóng, Taⁿ lán chiah-ê chhut-sì tī chit sè-kan, ia̍h chhin-chhiūⁿ chit-hō poe--lâi ê chiáu chi̍t-iūⁿ, m̄-chai tuì tah-lo̍h lâi, koh m̄-chai beh tuì tah- lo̍h khì. Chóng-sī chit lāi-tiong ê ò- biāu, liōng-pit chit-ê Kàu-su ē kà-sī--lán; nā-sī án-ni chhiáⁿ ông bo̍k-tit chó͘-tòng i. Hit-tia̍p tâng chū-hoē ê lâng thiaⁿ lāu-lâng só͘ kóng ê oē, ta̍k-ê kóng, chin tio̍h, chin ū tō-lí. Tuì hit chi̍t-sî Iâ-so͘ Sèng-kàu chiū piàn-piàn thoân tī Eng- kok ê Lûn-tun siâⁿ.
Hiān-kim thiⁿ-ē bān peh-sìⁿ ia̍h lóng chhin-chhiūⁿ chit-hō poe-chiáu, m̄ chai tuì tah-lo̍h lâi, iū m̄ chai tuì tah-lo̍h khì. Mn̄g sè-sio̍k lâng in tah-lo̍h lâi, i chiū ìn, sī pē-bú siⁿ--ê; mn̄g pē-bú kap sí-chó͘ sī tah-lo̍h lâi, i chiū kóng, in sī thiⁿ siⁿ--ê. M̄-kú lūn Siōng-tè khí-thâu cháiⁿ-iūⁿ chhòng-chō sè-kan lâng, i lóng m̄ chai. Koh mn̄g in, lâng sí liáu-āu chiū khì tah-lo̍h, i iû-goân bē-hiáu kóng. Só͘-í tio̍h thoân hok-im tī in tiong-kan, hō͘ in thang tit-tio̍h bêng-pe̍k chit-hō ò-biāu ê tō-lí, iā ē tit-tio̍h toā lī-ek. In-uī Iâ-hô- hoa ê lu̍t-hoat sī chiâu-chn̂g, thang lâi hō͘ khùn-khó͘ ê lâng khoàⁿ-oa̍h; I-ê hoat-tō͘ sī chin-si̍t, thang tû-khì lâng ê gû-chhún.
漢羅（Ùi原文改寫）
人ná飛鳥
1892.06 86卷 p.42
六朝 ê時，有教師去英國，kā 王講，我傳聖教tī chia，請王允准。王liâm-piⁿ就召眾議士，tī hit 暝昏相kap聚集，大家參議這層事；議論了親像 m̄ 允准。忽然有一隻鳥tuì外面飛入來，koh隨時飛出去，一tiap仔久忽然無看見。Hit時teh 聚會ê 中間，有一個老人起--來講，我有一句話beh講，請王莫tit阻止。王講，著，就准伊講。
老人就講，今咱chiah-ê出世tī 這世間，亦親像這號飛--來ê鳥一樣，m̄ 知tuì tah落來，koh m̄ 知beh tuì tah落去。總是這內中ê奧妙，量必這個教師會教示--咱；若是án-ni請王莫tit阻擋伊。Hit-tia̍p同聚會ê人聽老人所講ê話，逐個講，真著，真有道理。對hit一時耶穌聖教就遍遍傳tī 英國ê倫敦城。
現今天下萬百姓亦攏親像這號飛鳥，m̄ 知tuì tah落來，又 m̄ 知tuì tah落去。問世俗人in tah落來，伊就應，是父母生--ê；問父母kap始祖是tah落來，伊就講，in是天生--ê。M̄-kú論上帝起頭怎樣創造世間人，伊攏 m̄ 知。Koh問in，人死了後就去tah落，伊猶原bē 曉講。所以著傳福音tī in中間，hō͘ in thang得著明白這號奧妙ê道理，也會得著大利益。因為耶和華 ê律法是齊全，thang來hō͘困苦ê人快活；伊ê法度是真實，thang除去人ê 愚蠢。