毋信--ê

M̄-sìn--ê

文獻資訊

項目	資料
作者	無lo̍h名
卷期	台南府教會報
卷期	第81卷
日期	1892/1
頁數	2

白話字（原文數位化）

M̄-sìn--ê

1892.01 81 koàn p.2

Tī bó͘-kok ū chi̍t-ê hū-jîn-lâng ji̍p pài- tn̂g thiaⁿ Bo̍k-su tha̍k Má-thài 17:20. Thiaⁿ-liáu chiū iô-thâu, kóng,Che oē sī bô iáⁿ, beh thài-ē án-ni leh ! I chiū thèng-hāu lé-pài soah, āu--lâi khì kìⁿ Bo̍k-su iû-goân kā i kóng, Só͘ tha̍k ê sū bô iáⁿ liáu-liáu. Bo̍k-su chi̍t-ē khoàⁿ, chiū ìn i kóng, Siōng-tè kiám ē kóng pe̍h-chha̍t oē mah ? Tú-á só͘ tha̍k chiū- sī Iâ-so͘ pún-sin ê oē, I chin-chiàⁿ ū chhim-sìn I-ê Thiⁿ-pē.

Hū-jîn-lâng koh kóng, Lī goán tau āu-piah ū chi̍t-ê toā soaⁿ koân-koân-koân; tò--tńg-khì ê sî goá nā pek-chhiat kiû Siōng-tè hō͘ hit-ê soaⁿ ē-tit thang soá- khì pa̍t-uī; lí phah-sǹg án-choáⁿ-iūⁿ ? Bo̍k-su chiū kóng, Nā bô chi̍t-tiám-á ê giâu-gî, chóng tek-khak ē soá-khì. Hū- jîn-lâng chhiò-chhiò kap i saⁿ-sî, chiū tò--khì in chhù. Teh-beh àm phak--teh kiû Siōng-tè hō͘ āu-piah ê soaⁿ soá-khì pa̍t-uī, khí--lâi beh koaiⁿ-mn̂g kia̍h ba̍k chi̍t-ē khoàⁿ, kóng, Taⁿ chit-ê soaⁿ kàu bîn-á chá-khí m̄ chai án-choáⁿ-iūⁿ; sim- lāi ū teh siūⁿ káⁿ bē-tit thang soá-khì.

Bîn-á-ji̍t chá-chá khí--lâi koh khui- mn̂g chi̍t-ē khoàⁿ, soaⁿ iû-goân tī--teh, chiū kóng, Kó-jiân chiàu goá ê sim-lāi teh phah-sǹg to bô soá-khì.

Chiàu chit-ê hū-jîn-lâng só͘ kiû Siōng- tè bêng-bêng ē ín i , khiok sī in-uī i sim- ì iáu teh giâu-gî, che sū chiah bē tit chiâⁿ.

漢羅（Ùi原文改寫）

毋信--ê

1892.01 81卷 p.2

Tī某國有一個婦人人入拜堂聽牧師讀馬太 17: 20。聽了就搖頭，伊講，Che話是無影，beh thài會án-ni leh ! 伊就聽候禮拜煞，後--來去見牧師猶原kā伊講，所讀ê事無影了了。牧師一下看，就應伊講，上帝kiám會講白賊話mah？Tú仔所讀就是耶穌本身ê話，伊真正有深信伊ê天父。

婦人人koh講，離阮兜後壁有一個大山懸懸懸；倒--轉去ê時我若迫切求上帝hō͘ hit 個山會tit thang徙去別位；你扑算án-choáⁿ 樣？牧師就講，若無一點仔ê giâu疑，總的確會徙去。婦人人笑笑kap伊相辭，就倒--去in 厝。Teh-beh暗仆--teh求上帝hō͘ 後壁ê山徙去別位，起--來beh關門kia̍h目一下看，講，今這個山到明仔早起 m̄ 知án-choáⁿ樣；心內有teh想káⁿ bē-tit thang徙--去。

明仔日早早起--來koh開門一下看，山猶原tī--teh，就講，果然照我ê心內teh扑算to無徙--去。

照這個婦人人所求上帝明明會允伊，卻是因為伊心意iáu teh giâu疑，che事才bē得成。