盡忠到死
Chīn-tiong kàu sí
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 臺灣府城教會報 |
| 卷期 | 第66卷 |
| 日期 | 1890/11 |
| 頁數 | 84 |
白話字（原文數位化）
Chīn-tiong kàu sí
1890.11 TĒ LA̍K-CHA̍P-LA̍K TIUN p.84
Chiông-chêng tī A-bí-lī-ka hit chiu ê peh-sèⁿ put-chí pháiⁿ hong-sio̍k, chiū-sī in bat bé lâng chò lô͘-châi. Chiah-ê lô͘- châi ū-ê chin kan-khó͘, in-uī in chú-lâng ok-sim pháiⁿ khoán-thāi in.
Taⁿ tī bó͘-só͘-chāi ū chi̍t-ê cha-po͘ gín- ná hō͘ lâng chò lô͘-châi. Ū chi̍t ji̍t i ū thiaⁿ-kìⁿ chi̍t-uī Bo̍k-su teh kóng khí Iâ-so͘ ê tō-lí; sim liâm-piⁿ siū kám-kek, him-soān ì-ài chit-ê Iâ-so͘ chò i-ê Kiù- chú. I bô sím-mi̍h bêng-pe̍k tō-lí ê ì-sù; put-kò ū siū Bo̍k-su ê khó͘-khǹg, chiū- sī kóng tio̍h thiàⁿ Iâ-so͘, ta̍uh-ta̍uh kî- tó Siōng-tè, kiû i pang-chān. Thiaⁿ-liáu hit-ê gín-ná sim-lāi teh siūⁿ beh chiàu án-ni kiâⁿ, sim chiū tit-tio̍h an-uì, in-uī chai tī Thiⁿ--ni̍h ū chi̍t uī pêng-iú ē thé- thiap i-ê kan-khó͘.
Tuì hit-tia̍p í-āu hit-ê gín-ná gâu kî- tó, ná-kú ná thiàⁿ Iâ-so͘, siông-siông siàu-liām i, kap i kau-poê. Chóng-sī i-ê chú-lâng put-chí m̄ hoaⁿ-hí, m̄-chún i lâi thàn tō-lí, pàng-tiau pàng-tńg kóng, “Lí nā khì kî-tó, goá chiū beh phah lí.”
Tuì án-ni-siⁿ gín-ná sui-jiân sī loé-chì, m̄-kú m̄-káⁿ pàng-sak kî-tó; hoán-tńg sī ná jia̍t-sim thiàⁿ Iâ-so͘. Ta̍k ji̍t chia̍h ē-tàu liáu, i chiū khì phian-phiah só͘- chāi àm-chēⁿ khì kî-tó, kiû Siōng-tè pang-chān i.
Ū chi̍t ji̍t teh kî-tó ê tiong-kan i-ê chú-lâng tuì hit tah koè, ū thiaⁿ-kìⁿ hit- ê gín-ná koh-chài teh kî-tó, chiū chin siū-khì, kīn-oá lâi hoah i, lâi mē, soà kóng,” Lí m̄-thang kî-tó, goá kiám bô kìm lí ? Lí nā koh kî-tó , goá beh phah kàu hō͘ lí sí. “
Hit-ê gín-ná thiaⁿ-kìⁿ,sim iû-goân sī chip-koat,tek-khak beh thiàⁿ Iâ-so͘, beh chò i ê ha̍k-seng, ka-tī siūⁿ nā phoe sèⁿ- miā ia̍h káⁿ, chóng-sī bô beh pàng-sak Iâ-so͘.
Só͘-í ta̍k ji̍t chiàu kū ê khoán-sit khì hit só͘-chāi kî-tó; iū-koh hō͘ chú-lâng thiaⁿ-kìⁿ, hō͘ i phah kàu put-chí siong- tiōng. Hit-ê lâng soà ki-chhì i kóng, “ Iâ-so͘ thài-ē bô lâi pang-chān lí, m̄- thang hō͘ goá phah? Che sī àn-cháiⁿ-iūⁿ leh? “
Gín-ná ìn kóng, “ Thâu-ke ah ! goá thang chhut-chāi lí phah. Goá chiū hō͘ lí phah kàu sí; kah goá m̄-thang toè Iâ-so͘, goá ia̍h sī bē-chò-tit; goá si̍t-chāi beh thiàⁿ Iâ-so͘, si̍t-chāi beh thiàⁿ Iâ-so͘.” Hit kù liân-liân kóng nn̄g koè.
Chú-lâng thiaⁿ-kìⁿ che oē koh khah toā siū-khì, phah khah siong-tiōng; koh lâu-hoeh, gín-ná poa̍h-tó tī thô͘-kha chhin-chhiūⁿ teh-beh sí ê khoán-sit. Chú-lâng koh ki-chhì kóng, “ Iâ-so͘ thài ē bô lâi pang-chān lí, m̄-thang hō͘ goá phah, che sī àn-cháiⁿ-iūⁿah?”
Hit-tia̍p gín-ná hūn--khì, liân-chún bē kóng-oē, kan-ta ēng sè-á-siaⁿ ìn kóng, “ Thâu-ke ah ! goá iáu-kú beh thiàⁿ Iâ- so͘, iáu-kú beh thiàⁿ Iâ-so͘. “ Kóng-liáu, tuì hit-tia̍p chiū sí--khì.
Taⁿ mn̄g-khoàⁿ tī kàu-hoē-lāi ū sím- mi̍h gín-ná, á-sī toā-lâng thiàⁿ Iâ-so͘ kàu án-ni mah ?
Lán ê Chú Iâ-so͘ ū bat kóng, “ Hoān- nā ài kiù sèⁿ-miā--ê, chiū tek-khak ē sit-lo̍h; in-uī goá, lâi sit-lo̍h sèⁿ-miā--ê, tek-khak ē kiù i. “ Lō͘-ka 9:24. iū-koh kóng, “Nā-sī lín sui-bóng siū kan-khó͘, bo̍h-tit kiaⁿ-hiâⁿ, tio̍h chīn-tiong phoe- sí; goá tek-khak beh hō͘ lí éng-oa̍h ê pò-siúⁿ, chhin-chhiūⁿ tì bián-liû. “ Be̍k- sī-lio̍k 2:10
Chiàu án-ni khoàⁿ, chit-ê chò lô͘-châi ê gín-ná, i uī-tio̍h Iâ-so͘ sit-lo̍h i-ê sèⁿ- miā, só͘-í ún-tàng tit-tio̍h pò-siúⁿ, chhin- chhiūⁿ tì bián-liû ê khoán-sit. Bāng Siōng-tè pang-chān lán tāi-ke chò chīn- tiong chhin-chhiūⁿ án-ni-siⁿ.
漢羅（Ùi原文改寫）
盡忠到死
1890.11 第六十六張 p.84
從前tī 亞美利加hit 州ê百姓不止歹風俗，就是in bat買人做奴才。Chiah-ê 奴才有ê 真艱苦，因為in 主人惡心歹款待in。
今tī 某所在有一個查甫囡仔hō͘ 人做奴才。有一日伊有聽見一位牧師teh 講起耶穌ê 道理；心liâm-piⁿ 受感激，欣羨意愛這個耶穌做伊ê救主。伊無甚物明白道理ê 意思；不過有受牧師ê 苦勸，就是講著疼耶穌，ta̍uh-ta̍uh 祈禱上帝，求伊幫贊。聽了hit 個囡仔心內teh 想beh照án-ni 行，心就得著安慰，因為知tī 天--裡有一位朋友會體貼伊ê 艱苦。
Tuì hit-tia̍p以後hit個囡仔gâu祈禱，那久那疼耶穌，常常數念伊，kap伊交陪。總是伊ê 主人不止m̄ 歡喜，m̄ 准伊來趁道理，放刁放轉講，「你若去祈禱，我就beh扑你。」
Tuì án-ni-siⁿ 囡仔雖然是餒志，m̄-kú m̄ 敢放sak 祈禱；反轉是那熱心疼耶穌。逐日食下晝了，伊就去偏僻所在暗靜去祈禱，求上帝幫贊伊。
有一日teh 祈禱ê 中間伊ê主人對hit tah過，有聽見hit個囡仔koh再teh 祈禱，就真受氣，近倚來喝伊，來罵，續講，「你m̄-thang祈禱，我敢無禁你？你若koh祈禱，我beh扑到hō͘ 你死。」
Hit 個囡仔聽見，心猶原是執訣，的確beh疼耶穌，beh做伊ê學生，家己想若phoe性命亦敢，總是無beh 放sak 耶穌。
所以逐日照舊ê 款式去hit 所在祈禱；又koh hō͘ 主人聽見，hō͘ 伊扑到不止傷重。Hit個人續譏刺伊講，「耶穌thài會無來幫贊你，m̄-thang hō͘ 我扑？Che是àn-cháiⁿ-iūⁿ leh？」
囡仔應講，「頭家ah！ 我thang出在你扑。我就hō͘你扑到死，教我 m̄-thang toè耶穌，我亦是bē做tit；我實在beh 疼耶穌，實在beh疼耶穌。」Hit句連連講兩過 。
主人聽見che話koh較大受氣，扑較傷重；koh流血，囡仔跋倒tī 塗腳親像teh-beh死ê款式。主人koh譏刺講，「耶穌thài會無來幫贊你，m̄-thang hō͘ 我扑，che是àn-cháiⁿ-iūⁿ ah？」
Hit-tia̍p 囡仔暈--去，liân-chún bē講話，kan-ta用細仔聲應講，「頭家ah ！ 我iáu-kú beh 疼耶穌，iáu-kú beh疼耶穌。」講了，對hit-tia̍p 就死--去。
今問看tī 教會內有甚物囡仔，抑是大人疼耶穌到án-ni mah？
咱ê主耶穌有bat講，「凡若ài 救性命--ê，就的確會失落；因為我，來失落性命--ê，的確會救伊。」路加 9： 24。又koh講，「若是lín雖罔受艱苦，莫tit驚惶，著盡忠批死；我的確beh hō͘ 你永活ê報賞，親像戴冕旒。」默示錄2： 10。
照án-ni看這個做奴才ê囡仔，伊為著耶穌失落伊ê性命，所以穩當得著報賞，親像戴冕旒ê款式。望上帝幫贊咱逐家做盡忠親像án-ni-siⁿ。