辯神主論

Piān Sîn-chú Lūn

文獻資訊

項目	資料
作者	Lí Chhah-lâi Lí Chhah-lâi
卷期	臺灣府城教會報
卷期	第39卷
日期	1888/9
頁數	61

白話字（原文數位化）

Piān Sîn-chú Lūn

1888.09 TĒ SAN-CHA̍P-KÁU TIUN p.61-63

(Sī Lí Chhah-lâi chò--ê.)

(Chiap chêng-tiuⁿ tē 53 bīn.)

Goá chiū ìn i kóng, Nā lâu teh, āu-lâi tek-khak ū siong-hāi, lí pún-sin nā bô koh khì pài--i, chiū lí ê kiáⁿ-sun ia̍h oē khì pài--i. In-uī kàu kiáⁿ-sun ê sî, khoàⁿ-kìⁿ pa̍t lâng teh pài, koh khoàⁿ-kìⁿ ka-kī toh-téng ū bo̍k-chú, tek-khak ū-sî oē siū bê-he̍k, siūⁿ tio̍h chhin-chhiūⁿ pa̍t lâng lâi pài. ia̍h oē siūⁿ, nā pài káⁿ bô siong-hāi; nā oē siong-hāi, pē-kong sī ji̍p-kàu ê lâng, tek-khak bô lâu chit-ê mi̍h tī toh-téng. Sim chiū oē phah-sǹg tio̍h pài khah tio̍h; koh in-uī piān-piān tī toh-téng, m̄-sái ló͘-la̍t, chiū oē suî-sî khì pài--i. Chhin-chhiūⁿ án-ni āu-lâi ê poē-poān koh-khah siong-tiōng; só͘-í goá phah-sǹg tek-khak m̄-thang lâu teh; lâu teh,éng ū ē-kun. Chhin-chhiūⁿ chêng tī Ē-mn̂g ū chi̍t lâng ài lâi thàn tō-lí ji̍p kàu-hoē, iáu-kú thiaⁿ kàu-hoē kóng m̄-thang chhāi bo̍k-chú; i-ê sim bô bêng-pe̍k chit ê bo̍k-chú ê tō-lí, phah-sǹg bo̍k-chú í-keng hàu chiah kú, tek-khak ū sîn tī-teh, m̄-sī chhin-chhiūⁿ pêng-siông ê chhâ, só͘-í chiong kui-kham ê bo̍k-chú it-chīn koāⁿ-khì soaⁿ-téng tâi tī bōng-ni̍h. Che sī hián-bêng ū gî-ngái khiàn-sńg ê sim. Só͘-í koh bô joā-kú tú-tio̍h chhì-liān, chiū sī-soā cháu khì soaⁿ-téng, ku̍t hiah-ê bo̍k-chú koh tò-lâi pài, lâi ho̍k-sāi. āu-lâi lóng bô thang ǹg-bāng i koh lâi hoán-hoé; in-uī “Kng hut-jiân àm, hit ê àm sī toā.” Chhin-chhiūⁿ án-ni thang chai ē-kun tek-khak tio̍h tû hō͘ i lī, chiah boē koh hoat. Tio̍h siūⁿ kó͘-chá ê lâng siat bo̍k-chú, sī beh hō͘ lâng kì-liām, m̄-sī beh hō͘ lâng pài; iáu-kú āu-lâi lóng khì pài, khì ho̍k-sāi--i. Hô-hòng chit-sî ê bo̍k-chú, sè-sio̍k í-keng pún teh ho̍k-sāi kèng-pài; kiám m̄-sī koh khah khoài bê-he̍k āu-lâi ê lâng, lóng khì pài khì ho̍k-sāi i mah? Só͘-í tek-khak m̄-thang chhiáⁿ lâu teh. Cha hiān-sî ū chit hō bo̍k-chú ê miâ, sī tuì Chiu-tiâu Bú-ông tong-cheng hoa̍t Tiū-ông ê sî lâi--ê; khoàⁿ Kó͘-bûn Pek-î lia̍t-toān, hit chi̍t phiⁿ chiū oē chai. In-uī Siong-tiâu ê Tiū-ông bû-tō, Bú-ông ê pē Bûn-ông, pún ū ì-sù beh khì cheng--i; put-hēng Bûn-ông sí; Bú-ông soà chiap Bûn-ông ê sim-chì, ài-beh hoa̍t Tiū-ông. iáu-kú kiaⁿ lâng hiâm i put-jîn, só͘-í ēng chhâ-pâi, siá Bûn-ông ê miâ chhāi tī chhia tiong, hō choè Bûn-ông; hō͘ lâng chai i-ê cheng-hoa̍t Tiū-ông m̄-sī chiàu i ka-kī sai-khia ê ì-sù, sī hōng thian-bēng, kap soà-chiap pē Bûn-ông ê sim-chì; só͘-í put-tek-put tio̍h cheng-hoa̍t Tiū-ông. I siat bo̍k-chú ê ì-sù, chiū sī in-uī án-ni; m̄-sī beh hō͘ lâng pài--i, ho̍k-sāi--i. Khó-sioh chit-sî sè-sio̍k saⁿ-thàn saⁿ-hán, lóng bô káng-kiù kàu hit-ê bo̍k-chú ê kun-goân, sī tuì tá-lo̍h lâi--ê; koh chho͘-siat ê sî ū sím-mi̍h ì-sù, lóng bô siūⁿ khoàⁿ; suî-piān chiông-sio̍k, ài hō͘ lâng hoaⁿ-hí. Só͘-í nā khoàⁿ lâng pài, i ia̍h pài, khoàⁿ lâng hàu, i ia̍h hàu. Só͘-í goá phah-sǹg bo̍k-chú m̄-nā m̄ thang ho̍k-sāi, ia̍h m̄ thang chhiáⁿ lâu tī toh-téng; in-uī kiaⁿ-liáu āu-lâi tek-khak ū ē-kun.

In chiū koh kóng, Nā-sī án-ni, bo̍k-chú chiū lóng hoè-bô mah? Bo̍k-chú nā lóng hoè-bô, siat-sú beh hàu tio̍h cháiⁿ-iūⁿ chiah oē hàu ah? Goá chiū ìn i kóng, Hàu tio̍h ēng chin hàu, m̄-thang ēng ké hàu. ài kiâⁿ chin hàu, tio̍h o̍h Sùn-tè kap Cheng-chú ê khoán-sit, chiū-sī chin hàu. Hoān-sū chiàu tō-lí, an-hūn siú-kí, sū lông kong siong jīn-chin khì choè; tì-kàu oē “iông-bêng-seng, hián-hū-bó”; che lóng sī chin hàu. Khó-sioh lâng khah choē bô chit-hō ê chin hàu, lóng-sī ài thàn hit-hō ké hàu ê hong-sio̍k; si̍t-chāi bô lī-ek, hoán-tńg ū sún-hāi nā-tiāⁿ.

In chiū koh kóng, M̄-kú bô hàu, chó͘-kong oē iau.

Goá chiū koh ìn i kóng, Chó͘-kong ê sîn-hûn kui im-kan, bô koh lâi iông-kan; thái-thó oē chia̍h ah? Chiū siat-sú oē koh lâi sī sîn-hûn; sîn-hûn tek-khak boē chia̍h mi̍h. Nā beh lūn kàu chó͘-kong ê sin-khu, sī í-keng sí kui-thô͘, bah kap kut siau-hoà, bô chhuì bô pak-tó͘, ia̍h sī boē chia̍h lí só͘ hàu ê mi̍h. Tio̍h siūⁿ, pīⁿ tîm-tāng ê sî, siōng-chhiáⁿ boē chia̍h; hô-hòng í-keng sí, sin-khu chhàu-noā, thái-oē koh lâi ê lí ah? Chiū siat-sú oē lâi chia̍h, chi̍t nî hàu nn̄g saⁿ pái, thái-thó ū kàu-gia̍h ah? Lán chi̍t-ji̍t chia̍h saⁿ-tǹg; chó͘-kong chi̍t nî chia̍h saⁿ-tǹg, thái ū kàu-gia̍h ah? Chiok-kiàn sè-sio̍k hàu chè ê hong-sio̍k lóng-sī ké, m̄-sī chin--ê. Chhin-chhiūⁿ Chu-bûn-kong kóng, “Seng put hōng-ióng, sú chè bû-ek.” Koh chhin-chhiūⁿ sio̍k-gú kóng, “Siⁿ bô thang kàu nâ-âu, sí chiah beh chè koaⁿ-chhâ-thâu,” chiū-sī sè-sio̍k chèng-lâng ê ì-sù.

In nn̄g ê choè chi̍t-ē chhiò kóng, Kóng-liáu ta̍k kù chin thong, chin ū iáⁿ; in-uī pīⁿ siong-tiōng ê sî, chin-chiàⁿ liân tê-thng to boē lim; khoàⁿ sí-liáu khì hàu thái-thó oē lâi chia̍h ni̍h? Chin-thong chin-thong. Chóng-sī kóng chi̍t-kù khah tek-choē cheh; chiū-sī goā-kháu ê lâng bô thiaⁿ-kìⁿ sian-siⁿ khai-káng, m̄-chai ché tō-lí chiah thong; lóng-sī kóng, Hoan-á-kàu teh kóng hoan-á-kó͘ nā-tiāⁿ; m̄-chai kóng-liáu to lóng-sī chêng-lí liáu- liáu. Chiū hioh-khùn chia̍h hun.

In chi̍t ê siūⁿ-siūⁿ cheh, chiū koh kóng, Lūn kàu hàu chin-chiàⁿ boē chia̍h mi̍h; in-uī hàu liáu, ta̍k hāng ê mi̍h lóng iáu tī-teh. Chóng-sī chiàu goá teh siūⁿ, káⁿ ū lâi kàm-la̍p hit ê khì-bī; chhin-chhiūⁿ sio-hiuⁿ ū lâi kàm-la̍p hit ê hiuⁿ-ian chi̍t-iūⁿ.

Goá chiū kóng, Che lóng bô pîn-kù, put-kò sī lâng ka-kī phah-sǹg nā-tiāⁿ. Siat-sú ū lâi kàm-la̍p hit ê khì-bī, chiū chiú oē pìⁿ choè chuí, hî-bah koe-ah oē pìⁿ choè tāu-che chháu-phoh chi̍t-iūⁿ. Nā oē án-ni, chiū-sī ū pîn-kù. iáu-kú bē-bat khoàⁿ-kìⁿ ū lâng hàu-liáu, lóng- chóng ê mi̍h oē pìⁿ chhin-chhiūⁿ án-ni; chiok-kiàn lóng sī bô-iáⁿ liáu-liáu.

In chi̍t-ê chiū koh kóng, Che put-kò sī kè lán chi̍t-tiám sim nā-tiāⁿ.

Goá chiū kóng, Í-keng chai bô lâi chia̍h, thái-oē jím-tit pâi kàu moá toā toh ê mi̍h, lâi moâ lán ê chó͘-kong ah? Chó͘-kong chi̍t tiám chiú boē lim, lán kiò pêng-iú lâi lim kàu chuì; chó͘-kong chi̍t tè bah boē chia̍h, lán kap thong-ke ê lâng, chia̍h kàu pá-tiùⁿ boē iau. Chhin-chhiūⁿ án-ni, thái-thó oē kóng-tit sī kè lán chi̍t-tiám-sim ni̍h? Chiàu-khí-kang, chó͘-kong kī-sîn nā kàu, hit-ji̍t tio̍h chia̍h khah chió, ia̍h tio̍h chia̍h khah bái ê mi̍h. Siat-sú bô án-ni, ia̍h m̄-thang tī hit-ji̍t tiâu-tî lâi lāu-jia̍t, chia̍h siuⁿ hó, chiah boē hoān-tio̍h put-hàu ê choē. In-uī hit ji̍t chin-chiàⁿ sī iu-būn ê sî, m̄- sī hoaⁿ-hí ê sî; thái-oē kò͘-tit ím-iàn khoài-lo̍k ah?

In chi̍t ê chiū kóng, Lūn lí khiok chin-chiàⁿ m̄-thang án-ni lāu-jia̍t ím-iàn; in-uī hit ê khī-sîn, sī chá chó͘-kong kui- sian ê sî-ji̍t, chiàu-gia̍h tio̍h iu-būn boē chia̍h chiah ha̍p-lí. Chóng-sī hiān-sî sè- sio̍k ê lâng bô chi̍t-ê ū siūⁿ kàu chit chat; put-kò sī saⁿ-thàn saⁿ-hán nā-tiāⁿ, éng-bô siūⁿ kàu hit-ê kun-goân cháiⁿ-iūⁿ. Chhin-chhiūⁿ goá nā bô thiaⁿ-kìⁿ sian-siⁿ lí khai-káng, ia̍h bô siūⁿ kàu chit chat ê lí, éng-sî chiông-sio̍k bī-sī, bô koán i liáu-liáu.

In koh chi̍t ê kóng, Thiaⁿ kàu sian-siⁿ khai-káng chiah-ê oē, chhāi bo̍k-chú chin-chiàⁿ bô lī-ek; hàu bo̍k-chú si̍t-chāi bô chhái-kang; phah-sǹg ia̍h tio̍h lâi ji̍p-kàu khah hó; ji̍p-kàu ia̍h khah séng só͘-huì. Chi̍t nî chheng-chheng chiah-ê gûn-choá hiuⁿ-chek, ia̍h séng-tit joā- choē, chiū sî-nî poeh-choeh, kong-pô sî- kī nā kàu, ia̍h bián-tit peh-pak hoân-ló; lūn chin, chiū tio̍h lâi ji̍p-kàu pài Siōng-tè khah hó. Hit-ê pa̍t-ê ê ia̍h kóng, Thèng-hāu goá chiah-ê sū-lō͘ phah khah tiâu-ti̍t cheh, goá ia̍h beh lâi kap lín pài Siōng-tè lah. Tāi-ke saⁿ-sî, chiū chhut-khì kóng, Lēng-ji̍t ū êng chiah koh lâi.

漢羅（Ùi原文改寫）

辯神主論

1888.09 第三十九張 p.61-63

(是Lí Chhah-lâi做--ê.)

(接前張第53面。)

我就應伊講，若留teh，後來的確有傷害，你本身若無koh去拜--伊，就你ê子孫也會去拜--伊。因為到子孫ê時，看見別人teh拜，koh看見家己桌頂有木主，的確有時會受迷惑，想著親像別人來拜。也會想，若拜敢無傷害；若會傷害，父公 是入教ê人，的確無留這個物tī桌頂。心就會扑算著拜較著；koh因為便便tī桌頂，m̄使勞力，就會隨時去拜--伊。親像án-ni後來ê背叛koh較傷重；所以我扑算的確m̄-thang留teh；留teh，永有厄根。親像前tī廈門有一人ài來趁道理入教會，iáu-kú聽教會講m̄-thang chhāi木主；伊ê心無明白這ê木主ê道理，扑算木主已經孝chiah久，的確有神tī-teh，m̄是親像平常ê柴，所以將歸龕ê木主一盡koāⁿ去山頂埋tī墓ni̍h。Che是顯明有疑ngái譴損ê心。所以koh無偌久抵著試煉，就sī-soā 走去山頂，掘hiah-ê木主koh 倒來拜，來服事。後來攏無thang 向望伊koh來反悔；因為「光忽然暗，hit個暗是大。」 親像án-ni thang知厄根的確著除hō͘伊離，chiah boē koh發。著想古早ê人設木主，是beh hō͘人紀念，m̄是beh hō͘人拜；iáu-kú後來攏去拜，去服事--伊。何況這時ê木主，世俗已經本teh服事敬拜；敢 m̄是koh較快迷惑後來ê人，攏去拜去服事伊嗎？ 所以的確m̄-thang請留teh。查現時有這號木主ê名，是tuì周朝武王東征伐紂王ê時來--ê；看古文百夷列傳，hit 一篇就會知。因為商朝ê紂王無道，武王ê父文王，本有意思beh去征--伊；不幸文王死；武王續接文王ê心志，愛beh伐紂王。iáu-kú驚人嫌伊不仁，所以用柴牌，寫文王ê名chhāi tī車中，號做文王；hō͘人知伊ê征伐紂王m̄是照伊家己私khia ê意思，是奉天命，kap續接父文王ê心志；所以不得不著征伐紂王。伊設木主ê意思，就是因為án-ni；m̄是beh hō͘人拜--伊，服事--伊。可惜這時世俗相嘆相喊，攏無講究到hit個木主ê根源，是tuì 佗落來--ê；koh初設ê時有甚物意思，攏無想看；隨便從俗，ài hō͘人歡喜。所以若看人拜，伊也拜，看人孝，伊也孝。所以我扑算木主m̄ 但m̄ thang服事，亦m̄ thang請留tī桌頂；因為驚了後來的確有厄根。

In就koh講，若是án-ni，木主就攏廢無嗎？ 木主若攏廢無，設使beh孝著怎樣chiah會孝抑？我就應伊講，孝著用真孝，m̄-thang用假孝。ài行真孝，著學舜帝kap曾子ê款式，就是真孝。凡事照道理，安份守己，士農工商認真去做；致到會「揚名聲，顯父母」；che 攏是真孝。可惜人較濟無這號ê真孝，攏是ài趁hit號假孝ê風俗；實在無利益，反轉有損害nā-tiāⁿ。

In就koh講，M̄-kú無孝，祖公會枵。

我就koh應伊講，祖公ê神魂歸陰間，無koh來陽間；thái-thó 會食ah？就設使會koh來是神魂；神魂的確boē食物。若beh論到祖公ê身軀，是已經死歸土，肉kap骨消化，無嘴無腹肚，也是boē食你所孝ê物。著想，病沈重ê時，尚且boē食；何況已經死，身軀臭爛，thái會koh來ê你抑？ 就設使會來食，一年孝兩三擺，thái-thó有夠額抑？咱一日食3頓；祖公一年食3頓，thái有夠額抑？足見世俗孝祭ê風俗攏是假，m̄是真--ê。親像朱文公講，「生不奉養，死祭無益。」 koh親像俗語講，「生無thang到嚨喉，死才 beh祭棺柴頭，」就是世俗眾人ê意思。

In兩個做一下笑講，講了逐句真通，真有影；因為病傷重ê時，真正連茶湯都boē lim；看死了去孝thái-thó會來食ni̍h？真通真通。總是講一句較得罪cheh；就是外口ê人無聽見先生開講，m̄知ché道理才通；攏是講：番仔教teh講番仔古nā-tiāⁿ；m̄知講了都攏是情理了了。就歇睏食薰。

In一個想想cheh，就koh講，論到孝真正boē食物；因為孝了，逐項ê物攏iáu tī-teh。總是照我teh想，敢有來鑑納 hit 個氣味；親像燒香有來鑑納hit 個香煙一樣。

我就講：Che攏無憑據，不過是人家己扑算nā-tiāⁿ。設使有來鑑納hit 個氣味，就酒會變做水，魚肉雞鴨會變做豆渣草粕一樣。若會án-ni，就是有憑據。iáu-kú bē-bat看見有人孝了，攏總ê物會變親像án-ni；足見攏是無影了了。

In一個就koh講：Che不過是過咱一點心nā-tiāⁿ。

我就講：已經知無來食，thái會忍得排到滿大桌ê物，來瞞咱ê祖公ah？祖公一點酒boē lim，咱叫朋友來lim到醉；祖公一塊肉boē食，咱kap通家ê人，食到飽脹boē枵。親像án-ni，thái-thó會講得是過咱一點心ni̍h？照起工，祖公忌辰若到，hit日著食較少，也著食較bái ê物。設使無án-ni，也m̄-thang tī hit日刁持來鬧熱，食傷好，chiah boē犯著不孝ê罪。因為hit日真正是憂悶ê時，m̄是歡喜ê時；thái會顧得飲宴快樂抑？

In一個就講，論理卻真正m̄-thang án-ni鬧熱飲宴；因為hit 個忌辰，是早祖公歸仙ê時日，照額著憂悶boē食才合理。總是現時世俗ê人無一個有想到這節；不過是相嘆相喊nā-tiāⁿ，永無想到hit個根源怎樣。親像我若無聽見先生你開講，也無想到這節ê理，永時從俗未是，無管伊了了。

In koh一個講，聽到先生開講chiah-ê話，chhāi木主真正無利益；孝木主實在無采工；扑算也著來入教較好；入教也較省所費。一年千千chiah-ê銀紙香燭，也省得偌濟，就時年八節，公婆時忌若到，亦免得擘腹 煩惱；論真，就著來入教拜上帝較好。hit-ê別ê ê也講，聽候我chiah-ê事路扑較tiâu-ti̍t cheh，我亦beh來kap lín拜上帝lah。大家相辭，就出去講，另日有閒才 koh來。