辯神主論

Piān Sîn-chú Lūn

文獻資訊

項目	資料
作者	Lí Chhah-lâi Lí Chhah-lâi
卷期	臺灣府城教會報
卷期	第37卷
日期	1888/7
頁數	42

白話字（原文數位化）

Piān Sîn-chú Lūn

1888.07 TĒ SAN-CHA̍P-CHHIT TIUN p.42-44

(Sī Lí Chhah-lâi chò--ê.)

(Chiap chêng-tiuⁿ tē 40 bīn.)

In chi̍t-ê chiū kóng, Thiaⁿ-kàu Sian-siⁿ só͘ khai-káng--ê, Sèng-kàu ê tō-lí chin-chiàⁿ sī hó, in-uī ia̍h sī kà lâng tio̍h iú-hàu; put-kò sī kóng m̄-thang pài bo̍k-chú nā-tiāⁿ.

Hit ê tē jī--ê kóng, Thâu-tú-á Sian-siⁿ kóng chit-ê bo̍k-chú sī chi̍t tè sí chhâ-thâu chhin-chhiūⁿ mn̂g-chhoàⁿ, m̄-sī lán ê pē-bú kong-má, chit-hō-oē khiok ia̍h ū-iáⁿ, chi̍t-ē kóng-phoà, si̍t-chāi m̄-ta̍t poàⁿ-ê-chîⁿ, só͘ ū kóng--ê, chin-chiàⁿ chêng-lí; m̄-kú sè-sio̍k thong-thong sī ēng chit-hō bo̍k-chú lâi choè kì-liām, bô chè bo̍k-chú thài-oē kì-liām pē-bú chó͘-kong ah? Só͘-í pē-bú chó͘-kong kī-sîn nā kàu, chiū-sī kóng choè-kī, kî-si̍t sī choè-kì, ài lâng kì-tit nā-tiāⁿ.

Goá chiū kóng, ài kì-tit pē-bú chó͘-kong ê kī-sîn, bián ēng bo̍k-chú, tio̍h ēng toā pún ê pe̍h-choá phō͘ lâi kì, sī koh-khah hó, koh-khah siông-sè; in-uī bo̍k-chú lâi kì ia̍h bô joā-choē, toā-pún ê pe̍h-choá phō͘, khoàⁿ ài beh kì káng-chheng-bān-jī, káng-cha̍p-pah-tāi ia̍h oē; chiū beh siu-si̍p ia̍h khah sok-kiat. Chit hō phō͘, kong--ê, sī-tī chong-cho̍k ê tiong-ng, kiò-choè cho̍k-phó͘; su--ê, sī tī ke-lāi, kiò-choè ka-phó͘. Goá phah-sǹg ta̍k-lâng ke-lāi tio̍h ū chi̍t pún ka-phó͘ khah hó, chiah oē chai lán tuì tá-lo̍h lâi, tuì sím-mi̍h chó͘-kong chhut--ê, cháiⁿ-iūⁿ hun-ki; koh chó͘-kong ê siⁿ-ji̍t kī-sîn, lóng oē ta̍k-hāng kì bêng-bêng; khoàⁿ lán ài-beh cháiⁿ-iūⁿ kì-liām lóng oē, pí ēng bo̍k-chú pah pē hó-sè. Chhin-chhiūⁿ goá ka-kī ū chi̍t pún ka-phó͘, só͘-í oē chai kàu kuí-cha̍p-tāi ê chó͘-kong; chhiáⁿ the̍h-lâi hō͘ lín khoàⁿ.

In chiū kóng, Hó, the̍h-lâi khoàⁿ. Goá suî-sî the̍h hō͘ in khoàⁿ; in khoàⁿ liáu, chi̍t-ê chiū kóng, ēng ché hoat-tō͘, chin thong chin hó-sè; goán khiok ia̍h ū kong-ê cho̍k-phó͘, put-kò sī bô su-ê ka-phó͘ nā-tiāⁿ; goá phah-sǹg āu-lâi ia̍h tio̍h chhin-chhiūⁿ Sian-siⁿ lí ê hoat-tō͘, lâi chhau chi̍t pún choè ka-phó͘; nā ài khoàⁿ chiū thang khoàⁿ, khah oē chai lán ê kun-goân; si̍t-chāi chin-chiàⁿ ū-iáⁿ khah thò-tòng.

Hit-ê tē-jī--ê chiū kóng, Khó-sioh goán lóng bô, in-uī goán ê chó͘-chiūⁿ sī chhut-goā-lâng, kàu goán ê sī-toā-lâng chhiú--ni̍h, soà m̄-chai tuì tá-lo̍h khui--lâi-ê, put-kò ū thiaⁿ-kìⁿ sī-toā-lâng kóng sī Choân-chiu chó͘, iáu-kú m̄-chai Choân-chiu tī sím-mi̍h koāiⁿ-hūn, tī sím-mi̍h hiuⁿ-siā.

Goá chiū kóng, Thiaⁿ siùⁿ-kang án-ni kóng, si̍t-chāi chīn khó-sioh, in-uī bô ka-phó͘, ia̍h bô cho̍k-phó͘, soà m̄-chai kun-goân--liáu; nā kàu chhin-chhiūⁿ án-ni, sui-jiân ū bo̍k-chú, ia̍h bô sím-mi̍h lō͘-ēng lah, tàu-tì ka-phó͘ pí bo̍k-chú pah pē hó-sè.

In hit-ê tē-jī--ê chiū koh kóng, Goá phah-sǹg āu-lâi ia̍h tio̍h chiàu goá só͘ chai--ê, lâi kì chi̍t pún, thang hō͘ āu-lâi ê kiáⁿ-sun oē bat; nā bô án-ni, kiaⁿ-liáu āu-lâi ná-kú ná m̄-chai.

Goá chiū kóng, Siùⁿ-kang oē-hiáu án-ni siūⁿ, khiok tio̍h; in-uī ēng ka-phó͘, siat-sú beh poaⁿ-soá-uī, ia̍h hó siu-si̍p, boē chhin-chhiūⁿ bo̍k-chú hiah huì-khì, koh boē tek-choē Siōng-tè; in-uī ka-phó͘ bô lâng khì kuī-pài ho̍k-sāi--i, put-kò sī choè kì-liām nā-tiāⁿ.

I siūⁿ-siūⁿ-cheh, chiū koh kóng, Phah-sǹg ka-phó͘ tio̍h ēng, bo̍k-chú ia̍h tio̍h koh ēng, in-uī bô bo̍k-chú kiaⁿ-liáu oē hō͘ lâng kóng sī put-hàu. Chá Teng-lân khek-bo̍k uī tia-niû, chiū oē chiūⁿ jī-cha̍p-sì-hàu ê soaⁿ; che sǹg-sī sian-jîn só͘ siat--ê, phah-sǹg m̄-thang hoè-bô.

Goá chiū koh kā i kóng, Lūn Teng-lân chiūⁿ jī-cha̍p-sì-hàu ê soaⁿ, chit hō ê oē, sǹg-sī hong-tông bô-iáⁿ-chiah-sòng, lóng boē sìn--tit; put-kò sī āu-lâi ê lâng tō͘-choān chhut--lâi, kì-chài tī cha̍p-chheh--ni̍h; ia̍h sǹg sī khoàn-siān ê chheh. I-ê ì-sù sī beh khǹg lâng hêng-hàu; kî-si̍t bô hit hō iáⁿ-chiah, lóng m̄-sī sèng-jîn hiân-jîn ê tō-lí, sù-su ngó͘-keng ia̍h bô kì-chài chit-hō ê sū, lóng m̄-thang sìn--i; chóng-sī nā ài gī-lūn chit chat Teng-lân khek-bo̍k uī tia-niû, chiū chheng choè jī-cha̍p-sì-hàu ê tāi-chì, goá kóng khah siông-sè hō͘ lín thiaⁿ.

Taⁿ lūn Teng-lân ê tāi-chì, chiū-sī kì-chài tī Ji̍t-kì-kò͘-sū jī-cha̍p-sì-hàu ê chheh ni̍h. Chiàu hit pún só͘-kì--ê, sī kóng, Hàn-tiâu ū chi̍t-ê Teng-lân, tuì soè-hàn pē-bú chiū kè-óng; só͘-í kàu toā-hàn siūⁿ beh iú-hàu pē-bú, khó-sioh hàu boē tio̍h. Nā-sī Teng-lân siūⁿ pē-bú khu-lô hoâi-phāu ê un; chiū khek chhâ-siōng lâi ho̍k-sāi--i, chhin-chhiūⁿ ho̍k-sāi oa̍h--ê chi̍t iūⁿ; i-ê bó͘ chi̍t-ê kàu kú, chiū bô kèng ê sim; ēng chiam lâi ui chhâ-siōng ê chńg-thâu-á, chiū ū huih lâu chhut, chhin-chhiūⁿ oa̍h lâng chi̍t-poaⁿ-iūⁿ. Teng-lân m̄-chai chit-ê tāi-chì, put-kò khoàⁿ-kìⁿ chhâ-siōng ba̍k-chiu tiong teh lâu ba̍k-sái; chiū khì mn̄g i-ê bó͘ khoàⁿ sī in-uī sím-mi̍h iân-kò͘, chiah oē chai sī in-uī i-ê bó͘ ēng chiam lâi ui--i. Teng-lân siū-khì, suî-sî chiong i-ê bó͘ pàng-sak lî--khì. Taⁿ chiū hit pún chheh só͘ kì-chài ê kò͘-sū lâi lūn, ia̍h oē bêng-bêng chai sī bô-iáⁿ. In-uī kóng hit-kù, Teng-lân ê bó͘ ēng chiam lâi ui--i, án-ni thang chai bô iân-kò͘ lâi ui--i, tek-khak bô chit hō chêng-lí; che sī chi̍t hāng.

Koh kóng hit kù, ui-liáu oē lâu-huih, chhin-chhiūⁿ oa̍h lâng chi̍t-poaⁿ-iūⁿ; án-ni thang chai oē lâu-huih, chiū ū huih-kun; ū huih-kun, chiū ū ngó͘-chōng, lio̍k-hú; ia̍h ū chiâu-chn̂g ê bah-thé, chiâⁿ-choè oa̍h lâng. Nā ū-iáⁿ sī án-ni, mih-sái tiāⁿ-tiāⁿ chē tī toh-téng, boē tín-tāng boē choè-siaⁿ, tì-kàu hō͘ Teng-lân ê bó͘ ēng chiam lâi ui--i ? Tek-khak bô ché lí; che sī nn̄g-hāng.

Koh kóng kàu hit kù, Teng-lân m̄-chai, sī khoàⁿ-kìⁿ chhâ-siōng ba̍k-chiu lâu ba̍k-sái, mn̄g i-ê bó͘ chiah chai. án-ni lán thang siūⁿ chhâ-siōng nā oē lâu-huih, ia̍h oē lâu ba̍k-sái; chiū tek-khak oē kóng-oē thang tâu Teng-lân, mih-sái thèng-hāu kàu Teng-lân mn̄g i-ê bó͘ chiah chai ? Chiok-kiàn bô ché lí-khì; che sī saⁿ-hāng. Taⁿ m̄-sái kóng siuⁿ-choē, chiū chí saⁿ-hāng lâi chhui-lí lâi siūⁿ; chiū thang chai bêng-bêng sī bô-iáⁿ bô-chiah ê kò͘-sū. In-uī siat-sú bo̍k-chú kèng liáu oē pìⁿ-choè oa̍h lâng, chiū thiⁿ-ē ê lâng, sí pē-bú m̄-sái khó͘, in-uī sí-chhâ oē pìⁿ oa̍h lâng; nā-sī tuì kó͘-chá Giâu Sùn kàu taⁿ, bē-bat thiaⁿ-kìⁿ chit hō ê lí, chiū sù-su ngó͘-keng ia̍h bô chit hō ê oē.

(āu-tiuⁿ beh koh ìn.)

漢羅（Ùi原文改寫）

辯神主論

1888.07 第三十七張 p.42-44

(是Lí Chhah-lâi做--ê.)

(接前張第40面。)

In一個就講，聽教先生所開講--ê，聖教ê道理真正是好，因為也是教人著有孝；不過是講m̄-thang拜木主nā-tiāⁿ。

Hit 個第2個講，頭tú仔 先生講這個木主是一塊死柴頭親像門閂，m̄是咱ê父母公媽，這號話卻也有影，一下講破，實在m̄值半個錢，所有講--ê，真正情理；m̄-kú世俗通通是用這號木主來做記念，無祭木主thài會記念父母祖公ah？所以父母祖公忌辰若到，就是講做忌，其實是做記，ài人記得nā-tiāⁿ。

我就講，ài記得父母祖公ê忌辰，免用木主，著用大本ê白紙簿來記，是koh較好，koh較詳細；因為木主來記也無偌濟，大本ê白紙簿，看ài beh記講千萬字，講十百代也會；就beh收拾也較束結。這號簿，公--ê，是tī宗族ê中央，叫做族譜；私--ê，是tī家內，叫做家譜。我扑算逐人家內著有一本家譜較好，才會知咱tuì 佗落來，tuì甚物祖公出--ê，怎樣分支；koh祖公ê生日忌辰，攏會逐項記明明；看咱愛beh怎樣紀念攏會，比用木主百倍好勢。親像我家己有一本家譜，所以會知到幾十代ê祖公；請提來hō͘ lín看。

In就講，好，提來看。我隨時提hō͘ in看；in看了，一個就講，用ché 法度，真通真好勢；阮卻也有公ê族譜，不過是無私ê家譜nā-tiāⁿ；我扑算後來也著親像先生你ê法度，來抄一本做家譜；若ài看就thang看，較會知咱ê根源；實在真正有影較妥當。

Hit個第2個就講，可惜阮攏無，因為阮ê祖上是出外人，到阮ê序大人手--ni̍h，煞m̄知tuì 佗落開--來-ê，不過有聽見序大人講是泉州祖，iáu-kú m̄知泉州tī甚物縣份，tī甚物鄉社。

我就講，聽相公 án-ni講，實在盡可惜，因為無家譜，也無族譜，續m̄知根源--了；若到親像án-ni，雖然有木主，也無甚物路用lah，到底家譜比木主百倍好勢。

In hit個第2個就koh講：我扑算後來也著照我所知--ê，來記一本，thang hō͘後來ê子孫會bat；若無án-ni，驚了後來那久那m̄知。

我就講，相公會曉án-ni想，卻著；因為用家譜，設使beh搬徙位，亦好收拾，boē親像木主hiah費氣，koh boē得罪上帝；因為家譜無人去跪拜服事--伊，不過是做紀念nā-tiāⁿ。

伊想想cheh，就koh講，扑算家譜著用，木主也著koh用，因為無木主驚了會hō͘人講是不孝。早丁蘭刻木為爹娘，就會上二十四孝ê山；che算是先人所設--ê，扑算m̄-thang廢無。

我就koh kā伊講，論丁蘭上二十四孝ê山，這號ê話，算是荒唐無影跡送，攏boē信--tit；不過是後來ê人杜撰出--來，記載tī雜冊--ni̍h；也算是勸善ê冊。伊ê意思是beh勸人行孝；其實無hit號影跡，攏m̄是聖人賢人ê道理，四書五經亦無記載這號ê事，攏m̄通信--伊；總是若ài議論這節丁蘭刻木為爹娘，就稱做二十四孝ê代誌，我講較詳細hō͘ lín聽。

今論丁蘭ê代誌，就是記載tī日記故事二十四孝ê冊ni̍h。照hit本所記--ê，是講，漢朝有一個丁蘭，tuì細漢父母就過往；所以到大漢想beh有孝父母，可惜孝boē著。但是丁蘭想父母劬勞懷抱ê恩；就刻柴像來服事--伊，親像服事活--ê一樣；伊ê某一個夠久，就無敬ê心；用chiam來ui柴像ê指頭仔，就有血流出，親像活人一般樣。丁蘭m̄知這個代誌，不過看見柴像目珠中teh流目屎；就去問伊ê某看是因為甚物緣故，才會知是因為伊ê某用針來ui--伊。丁蘭受氣，隨時將伊ê某放sak離--去。今就hit本冊所記載ê故事來論，也會明明知是無影。因為講hit句，丁蘭ê某用針來ui--伊，án-ni thang知無緣故來ui--伊，的確無這號情理；che是一項。

Koh講hit句，ui了會流血，親像活人一般樣；án-ni thang知會流血，就有血根；有血根，就有五臟、六腑；亦有齊全 ê肉體，成做活人。若有影是án-ni，mih使定定坐tī桌頂，boē振動boē做聲，致到hō͘丁蘭ê某用chiam來ui- -伊？ 的確無ché 理；che是兩項。

Koh講到hit句，丁蘭m̄知，是看見柴像目珠流目屎，問伊ê某才知。án-ni咱thang想柴像若會流血，也會流目屎；就的確會講話thang投丁蘭，mih使聽候到丁蘭問伊ê某chiah知？足見無ché理氣；che是三項。今m̄使講傷濟，就這3項來推理來想；就thang知明明是無影無跡ê故事。因為設使木主敬了會變做活人，就天下ê人，死父母m̄使苦，因為死柴會變活人；若是tuì古早堯舜到今，bē-bat聽見這號ê理，就四書五經亦無這號ê話。

(後張beh koh印。)