Lūn kiù chia̍h A-phiàn ê lângPermalink

文獻資訊Permalink

白話字（原文數位化）Permalink

Lūn kiù chia̍h A-phiàn ê lâng

1888.01 TĒ SAN-CHA̍P-IT TIUN p.100

(Chit phiⁿ sī San sian-siⁿ tuì sin-bûn hoan-e̍k--ê.)

Lāi-séng Kong-hoē ê Kam-tok, ū kàu Soaⁿ- sai séng, kóng tú-tio̍h pún-toē ê hiaⁿ-tī ka-kī liáu chîⁿ, siat koé a-phiàn ke̍k. I kàu bó͘ siâⁿ, khoàⁿ -kìⁿ ū poeh- káu-cha̍p lâng pài Siōng-tè , lóng sī tuì chit-ê koé a-phiàn ke̍k tit-tio̍h kiù .

Ū chi̍t-ê pún-toē Bo̍k-su ka-kī chhut chîⁿ, chóng-tng koé a-phiàn ke̍k ê chek-sêng. Chit-ê Bo̍k-su ê sim chin hó, í-keng siat chi̍t-ê ke̍k tī bó͘ só͘-chāi , koh ài kè-bô͘ siat chi̍t só͘-chāi; ta̍k chá-khí lé -pài ê sî, chi̍t ji̍t kè chi̍t ji̍t , siông-siông chiong chit- ê tāi-chì kî-tó. Kàu-bé i-ê hū-jîn-lâng kā i kóng, Lí siáⁿ-sū siông-siông in-uī chit só͘-chāi kî-tó, siáⁿ-sū m̄-khì siat , chhin-chhiūⁿ pa̍t só͘-chāi chi̍t-iūⁿ ? ìn kóng, Goá ê chîⁿ lóng liáu, bô pa̍t-hāng chîⁿ thang choè chit-ê lō͘-ēng, tio̍h thèng-hāu Siōng-tè siúⁿ-sù. Hū-jîn-lâng kóng, Ho͘N7 ! tio̍h ēng joā-choē chiah oē siat? Kóng, Hāiⁿ ! nā beh siat tio̍h ū jī-saⁿ-cha̍p chheng chîⁿ chiah oē. Hū-jîn-lâng thiaⁿ-kìⁿ chiū khì, bô koh kóng sím-mi̍h. Tē jī chá-khí, chit-ê Bo̍k-su iû-goân in-uī chit-ê tāi-chì kî-tó bêng-pe̍k, i-ê hū-jîn-lâng chiū-kūn i , koāⁿ chi̍t- ê chhiú-kun toé mi̍h , kā i kóng, Chit lāi-bīn ū goá ê chhiú-khoân, hī-kau, chiam-á,chhiú-sek, khì boē, só͘ tit-tio̍h ê gûn pí lí só͘ khiàm--ê iáu khah choē ; án-ni thang khui chit- ê koé a-phiàn ke̍k , goá bián ēng chiah-ê mi̍h .

Hit-ê Bo̍k-su kā Kam-tok kóng, Goá bô oē thang kā lí kóng chit ê tāi-chì , m̄ tsai thang khui chit keng koé a-phiàn ke̍k choè tē-it hoaⁿ-hí, á -sī tit-tio̍h hū-jîn-lâng oē khek-kí thāi-jîn choè koh khah hoaⁿ-hí .

Kam-tok kóng, Goá lé -pài-ji̍t khì i-ê chhù , put-chí ū pêng-an, chū-jiân ū kap i kóng-oē . Goá chiū kā i kóng, Lí pàng-sak chiah ê chhiú-sek, kiám bô khó͘ mah? In-uī goá tsai Tiong-kok ê hū-jîn-lâng, chhin-chhiūⁿ Tang-sì chiah-ê kok ê hū-jîn-lâng, iā lóng sī tiōng chit -hō mi̍h, lia̍h chng-thāⁿ choè iàu-kín. Taⁿ chit-ê sian-siⁿ-niû chīn pêng-an, chiū khoàⁿ i-ê bīn, sui-jiân bē kóng-oē, goá í-keng chai i beh kóng sím-mi̍h oē.

I ìn kóng, Bô goá chin hoaⁿ-hí; goá í-keng tit-tio̍h Chú Iâ-so͘ choè hó-gia̍h, goá kiám bô hō͘ lâng ti-chiok.

Kam-tok kóng, Hāiⁿ ! Pêng-iú ah, goá oh-tit thang kā lín kóng, goá hoaⁿ-hí kàu lâu ba̍k-sái. Í-keng 20 nî kú, ū thoè Soaⁿ-sai kap keh-piah séng kî-tó, nā-sī sui-bóng bē bat kàu hia, taⁿ thâu-chi̍t-pái kàu chit tè, goá tú-tio̍h lâng uī-tio̍h Chú ê miâ siū toā kan-khó͘, ū-ê sit-lo̍h i-ê miâ, ū-ê hō͘ koaⁿ-hú hián-bêng lêng-jio̍k i , ū-ê sit-lo̍h ke-gia̍p , ū chi̍t lâng hō͘ i-ê bó͘ lī-khui i, in-uī m̄-ài kap pài Siōng-tè ê lâng saⁿ-kap khiā-khí. Goá kàu pa̍t-séng tú-tio̍h pa̍t lâng siū tāng chhì -liān, ū chi̍t lâng hō͘ lâng koah i-ê hī-á , chha-put-to hiám sí , siū chân-jím ê phah, koh ū lēng-goā ê lêng-jio̍k , chit-hō lâng iáu-kú hoaⁿ-hí sio̍k Chú. In ū an-sim chìn-pō͘ tō-tek , pò-iông Ki-tok ê hok-im . Hāiⁿ ! Goá ê sim kám-un, chin ài pêng-iú lín oē tit -thang thiaⁿ--kìⁿ goá só͘ thiaⁿ-kìⁿ, cha̍p hūn chi̍t hūn ê kan-chèng. Koh khoàⁿ-kìⁿ hiah-ê lâng ê bīn kng-kng hoaⁿ -hí , nā oē khoàⁿ-kìⁿ in, tek-khak ke-thiⁿ lín ê hó-táⁿ, heng-khí toā ǹg-bāng , Tiong-kok bô kú oē tit-tio̍h toā un.

漢羅（Ùi原文改寫）Permalink

論救食阿片ê人

1888.01 第三十一張 p.100

(Chit篇是San先生對新聞翻譯--ê。)

內省公會ê監督，有到山西省，講tú著本地ê兄弟家己了錢，設改鴉片局。伊到某城，看見有八九十人拜上帝，攏是對這個改鴉片局得著救。

有一個本地牧師家己出錢，總當改鴉片局ê責成。這個牧師ê心真好，已經設一個局tī某所在，koh愛計謀設一所在；逐早起禮拜ê時，一日過一日，常常將這個代誌祈禱。到尾伊ê婦人人kā伊講，你啥事常常因為這所在祈禱，啥事m̄去設，親像別所在一樣？應講，我ê錢攏了，無別項錢thang 做這個路用，著聽候上帝賞賜。婦人人講，Ho͘N7！著用偌濟才會設？講，Hāiⁿ！若beh設著有二三十千錢才會。婦人人聽見就去，無koh講甚物。第2早起，這個牧師猶原因為這個代誌祈禱明白，伊ê婦人人就近伊，koāⁿ一個手巾toé物，kā伊講，這內面有我ê手環、耳鉤、簪仔、手飾，去賣，所得著ê銀比你所欠--ê iáu較濟，án-ni thang 開這個改鴉片局，我免用chiah-ê物。

Hit個牧師kā監督講，我無話thang kā lí講這個代誌，m̄知thang 開這間改鴉片局做第一歡喜，抑是得著婦人人會克己待人做koh較歡喜。

監督講，我禮拜日去伊ê厝，不止有平安，自然有kap伊講話。我就kā伊講，你放sak chiah ê手飾，kiám無苦mah？因為我知中國ê婦人人，親像東勢 chiah-ê國 ê婦人人，也攏是重這號物，掠妝飾做要緊。今這個先生娘盡平安，就看伊ê面，雖然bē講話，我已經知伊beh講甚物話。

伊應講，無我真歡喜，我已經得著主耶穌做好額，我kiám無hō͘人知足。

監督講，Hāiⁿ！朋友ah，我oh-tit thang kā lín講，我歡喜到流目屎。已經20年久，有替山西及隔壁省祈禱，若是雖罔bē bat到hia，今頭一擺到這tè，我tú著人為著主ê名受大艱苦，有ê失落伊ê名，有ê hō͘官府顯明凌辱伊，有ê失落家業，有一人hō͘伊ê某離開伊，因為m̄-ài kap拜上帝ê人相kap企起。我到別省tú著別人受重試煉，有一人hō͘人割伊ê耳仔，差不多險死，受殘忍ê扑，koh有另外ê凌辱，這號人iáu-kú歡喜屬主。in有安心進步道德，播揚基督ê福音。Hāiⁿ！我ê心感恩，真愛朋友lín會tit-thang 聽--見我所聽見，十份一份ê干證。koh看見hiah-ê人 ê面光光歡喜，若會看見in，的確加添lín ê好膽，興起大向望，中國無久會得著大恩。