佇恆春縣行遊傳道
Tī Hêng-chhun-koān kiâⁿ-iû thoân-tō
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 臺灣府城教會報 |
| 卷期 | 第20卷 |
| 日期 | 1887/2 |
| 頁數 | 15 |
白話字（原文數位化）
Tī Hêng-chhun-koān kiâⁿ-iû thoân-tō
1887.02 TĒ JĪ-CHA̍P TIUN p.15-16
(Sī Pa Sian-siⁿ kì--ê.)
Kū-nî 12 goe̍h 17, chiū-sī pài-it, hit-mê goá tuì An-pêng lo̍h-chûn khì Tang- káng, tī-hia chham Tong Sian-siⁿ, Âng I-seng, keng Sian-siⁿ chhú-chê. (Keng Sian-siⁿ chiū-sī Chó͘-ke Sèng-chheh Kong-hoē chhe--ê, lâi Tiong-kok liāu-lí bē Sèng-chheh ê sū; hit-tia̍p chham Keng Sian-siⁿ-niû ū lâi Hú-siâⁿ sio- thàm.) Kàu pài-saⁿ mê-hng, goán sì-ê koh-chài tah chi̍t-chiah siong-chûn beh khì lâm-lō͘-boé, khoàⁿ hia hit-ê Teng- lâu, iā beh chhoē hit só͘-chāi ê Ka-lé. Pài-gō͘ chá-khí kàu-tè; tāi-seng khì khoàⁿ Teng-lâu, iā ū lâng kiò-chò Teng- tâi. Chit keng lâu sī khí tī Gō-loân-phīⁿ, chiū-sī Tâi-oân hái-sū ke̍k-lâm ê só͘-chāi, saⁿ-bīn ǹg-hái, chi̍t-bīn khò-soaⁿ. Lâu sī îⁿ-îⁿ, chha-put-to 8 tn̄g koân, tn̄g-goā khoah; bô lâng teh toà; tiâu-kang khí teh tiám-teng chò kiâⁿ-chûn ê lō͘-ēng. Hit-ki teng chin-kng, lī gō͘ la̍k phò͘ lō͘, iā khoàⁿ ē bêng. Teng--ni̍h ū la̍k tiâu sim, sim sī îⁿ-khoân--ê, lāi-goā hun-chò la̍k- têng; nā lóng-chóng tiám, chi̍t-mî tio̍h ēng chi̍t-siuⁿ, chiū-sī nn̄g tháng ê thô͘- thoàⁿ-iû. Ū mî tú-tio̍h bô bông-bū, tiám saⁿ-tiâu-sim iā ē chiok-kng. Teng ê chhang-kńg chin toā ki, muí-ki bé tio̍h gō͘ kho͘ gîn. Ta̍k-mî tuì ji̍t-lo̍h tiám kàu ji̍t-chhut, kui-mê tiāⁿ-tio̍h ū lâng sio-lûn-liû teh kò͘. Tī-hia ū saⁿ-ê Goā-kok lâng teh chò hit-keng lâu ê chú-sū, iā ū chhiàⁿ kuí-nā ê Tn̂g-lâng teh tàu-kha- chhiú; in-ê chhù khí oá tī hit-ê Lâu- kha. Kàu-taⁿ khí ū sì-nî goā ê kú; hit- sî in-uī kiaⁿ Ka-lé, só͘-í khí kàu put-chí kian-kò͘ chām-gâm, chhin-chhiūⁿ phàu- tâi ê khoán-sit. Lâu sī ēng thih-pán chò--ê, lāi-goā toā-sè kok-uī ê chhèng chin-chē; phah-sǹg thong Tâi-oân ê chheⁿ-hoan khì phah, iā bô iàu-kín. Khí hit-keng ê só͘-huì lóng-chóng khai ū saⁿ sì cha̍p-bān gîn, sī tuì Hái-koan chhut--ê.
Goán tī-hia pài-gō͘ hioh chi̍t-ji̍t, hō͘ Chú-sū ê lâng hó-lé khoán-thāi. Pài-la̍k koè--lâi Hêng-chhun-koān. Koān- siâⁿ khí í-keng chhit peh nî kú, kàu-taⁿ boē ū loā-chē lâng toà tī-hia. Tī-hia koè lé-pài. Pài-it chá-khí, khì Ka-lé-chng. Hia-ê Ka-lé í-keng kui-hoà kuí- nā nî, chiông-tiong chē-chē-ê ē hiáu-tit kóng pe̍h-oē, iā chiàu-lē thì-thâu, iā ū chhù-the̍h, lāi-bīn bîn-chhn̂g, í-toh, oáⁿ-ti̍h-tū lóng piān; chóng-sī iáu-boē ū lâng bat-jī. In hit-cho̍k, lâng kiò-chò Pâi-oân, khiok bô loā-chē lâng. Chiàu in kóng, in chham āu-soaⁿ Ti-pún ê Ka- lé sī siāng-cho̍k, hiàng-sî ū pun-thiah; tī-hia ê lâng-gia̍h khah-chē. iáu ū chi̍t-cho̍k hō-chò A-mî-á, sī teh hō͘ in chhe- ēng; nā beh kiò i chò-kang, m̄-bián chhut-chîⁿ hō͘ i. I ka-tī lóng bô chèng- choh, kan-ta tuì Tn̂g-lâng lâi siu-cho͘, khì chia̍h-ēng.
Goán khì, tāi-seng tuì Siau-má-lî kàu Chi-la-soh; hia-ê thâu-lâng hō-chò Bûn- kiat. Goán tī-hia hō͘ i chhiáⁿ, iā tām- po̍h mi̍h sàng i. I put-chí hó khoán- thāi goán, chí-ū bô hoaⁿ-hí goán m̄ chham in chò-hoé chia̍h-chiú; in-uī goán chai chit-ê chiú chin lī-hāi, koat- toàn m̄-hō͘ i chhiáⁿ. Kàu hit mê koè-- lâi Káng-kháu; hia-ê thâu-lâng hō-chò Kap-teng, kóng sī Bûn-kiat ê bó-kū. Hit-mê ū chhoā cha̍p-goā-ê lâi tī-hia, chhiùⁿ-khek thiàu-bú, chiū-sī hoaⁿ-hí goán khì ê ì-sù. Goán iā ū gîm-si hō͘ in thiaⁿ, āu-lâi goá sūn ki-hoē kóng tō-lí. In tāi-ke tiām-tiām teh thiaⁿ; chit-ê Bûn-kiat ū chiong goá ê oē hoan-e̍k hō͘ in chai. In kóng tō-lí sī hó, in ài thàn; in-uī Tn̂g-lâng pek i tio̍h ho̍k-sāi kong- má-pu̍t, in put-chí m̄-ài, kóng sī hiàng; mn̄g goán khoàⁿ ho̍k-sāi Siōng-tè tio̍h cháiⁿ-iūⁿ. Goán chiū kóng hō͘ in thiaⁿ; koè bîn-á-chá-khí iáu-boē khí-sin, Tong Sian-siⁿ iā sūn ki-hoē koh kā in kóng. Hit-sî kóng bô loā-chē oē, in-uī bô ki- hoē thang toà khah-kú; siūⁿ beh chheh sàng in, in to m̄-bat-jī, sī bô lō͘-ēng. Kan-ta khó͘-khǹg in m̄-thang pài-pu̍t; iā ū chhiáⁿ in lâi Hú-siâⁿ. In kóng ǹg- bāng jī-goe̍h-kan ài-beh lâi; hit-tia̍p nā kàu, goán chiū thang khah siông-sè kà- sī in. Goán teh siūⁿ, beh chhe lâng tiàm tī in tiong-kan thoân tō-lí, khó-sioh put-chí khiàm-kang, in-uī sin-siat ê só͘-chāi í-keng chē uī; nā bô chhe lâng khì, iū kiaⁿ-liáu in chiām-chiām hō͘ lâng ín-iú khì thàn khiàn-sńg pháiⁿ hong-sio̍k, kiám m̄ sī sit-liáu ki-hoē? Chhiáⁿ ta̍k- uī ê hiaⁿ-tī in-uī chit-ê tāi-chì kiû Siōng- tè khui-lō͘; lán m̄-thang kan-ta siūⁿ ka- tī tit-tio̍h kiù chiū hó, tek-khak tio̍h ài chèng-lâng tit-tio̍h kiù.
Goán pài-jī e-hng kàu Chhia-siâⁿ; pài-saⁿ kàu Pang-liâu; pài-sì kàu Tang- káng, lóng pêng-an.
漢羅（Ùi原文改寫）
佇恆春縣行遊傳道
1887.02 第二十張 p.15-16
(是巴先生記--ê。)
舊年12月17，就是拜一，hit暝我對安平落船去東港，tī-hia chham Tong先生，洪醫生，Keng先生取齊。（宮先生就是祖家聖冊公會差--ê，來中國料理賣聖冊ê事；hit-tia̍p chham Keng先生娘有來府城相探。）到拜三暝昏，阮4個koh再搭一隻商船beh 去南路尾，看hia hit個燈樓，也beh chhoē hit所在ê傀儡。拜五早起到tè，代先去看燈樓，也有人叫做燈臺。這間樓是起tī鵝鸞鼻，就是台灣海嶼極南ê所在，三面向海，一面靠山。樓是圓圓，差不多8丈懸，丈外闊，無人teh toà，刁工起teh點燈做行船ê路用。hit支燈真光，離五六舖路，也看會明。燈--裡有6條心，心是圓環--ê，內外分做6重，若攏總點，一暝著用一箱，就是兩桶ê土炭油。有暝tú著無茫霧，點3條心也會足光。燈ê chhang-kńg 真大支，每支買著5箍銀。逐暝對日落點到日出，歸暝定著有人相輪流 teh顧。Tī-hia有3個外國人 teh做 hit間樓ê主事，也有倩幾若個唐人 teh鬥腳手，in-ê厝起倚tī hit個樓腳。到今起有4年外ê久，hit時因為驚傀儡，所以起到不止堅固chām-gâm，親像砲臺ê款式。樓是用鐵板做--ê，內外大細各位ê銃真濟，扑算通台灣ê生番去扑，也無要緊。起 hit間 ê所費攏總開有三四十萬銀，是對海關出--ê。
阮tī-hia拜五歇一日，hō͘主事 ê人好禮款待。拜六過--來恒春縣，縣城起已經七八年久，到今boē有偌濟人toà tī-hia。Tī-hia過禮拜，拜一早起，去傀儡庄。Hia-ê傀儡已經歸化幾若年，從中濟濟個會曉tit講白話，也照例剃頭，也有厝宅，內面眠床、椅桌、碗碟箸攏便，總是iáu-boē有人bat字。In hit 族，人叫做排灣，卻無偌濟人。照in講，in chham 後山知本ê傀儡是像族，向時有分拆，tī-hia ê人額較濟。iáu 有一族號做A-mî-á，是teh hō͘ in差用，若beh叫伊做工，m̄免出錢hō͘伊。伊家己攏無種作，kan-ta對唐人來收租，去食用。
阮去，代先對Siau-má-lî 到Chi-la-soh，hia-ê頭人號做文傑。阮tī-hia hō͘伊請，也淡薄物送伊。伊不止好款待阮，只有無歡喜阮m̄ chham in做伙食酒，因為阮知chit個酒真厲害，決斷m̄-hō͘伊請。到hit暝過--來港口，hia-ê頭人號做Kap-teng，講是文傑ê母舅。Hit暝有chhoā 十外個來tī-hia，唱曲跳舞，就是歡喜阮去ê意思。阮也有吟詩hō͘ in聽，後來我順機會講道理。In大家恬恬teh聽，這個文傑有將我ê話翻譯hō͘ in知。In講道理是好，in愛thàn；因為唐人逼伊著服事公媽佛，in不止m̄愛，講是hiàng，問阮看服事上帝著怎樣。阮就講hō͘ in聽，過明仔早起iáu-boē起身，Tong先生也順機會koh kā in講。Hit時講無偌濟話，因為無機會thang toà 較久，想beh冊送in，in 都m̄-bat字，是無路用。Kan-ta 苦勸in m̄-thang 拜佛，也有請in來府城。In講向望二月間愛beh來，hit-tia̍p 若到，阮就thang 較詳細教示in。阮teh想，beh差人tiàm tī in中間傳道理，可惜不止欠工，因為新設ê所在已經濟位；若無差人去，又驚了in漸漸 hō͘人引誘去趁khiàn-sńg 歹風俗，kiám m̄ 是失了機會？請逐位ê兄弟因為這個代誌求上帝開路；咱m̄- thang kan-ta想家己得著救就好，的確著愛眾人得著救。
阮拜二e昏到車城；拜三到枋寮；拜四到東港，攏平安。