取善ê喻言
Chhú-siān ê Jū-giân
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 臺灣府城教會報 |
| 卷期 | 第19卷 |
| 日期 | 1887/1 |
| 頁數 | 7 |
白話字（原文數位化）
Chhú-siān ê Jū-giân
1887.01 tē 19 tiuⁿ p.7
(Chiap 17 tiuⁿ 127 bīn)
Bi̍t-phang siū tiám-hoà liáu-āu, sim-sîn oa̍h-tāng chai ū ì-goā ê sîn-seng, chiū khì chhì-khoàⁿ, koh ē pàng-bi̍t iā ē chò-la̍h. Chiū tuì Sîn-sian kóng, Ke ū chia̍h chiū ho͘ kûn, lâng ū hó chiū tio̍h sio-khǹg, chiàⁿ sī ū-gī; goá ū nn̄g-ê pêng-iú, kiû Sîn-sian iā kā i tiám-hoà. Sîn-sian kóng, Hó--leh, to̍k-to̍k lâng tio̍h ū khang-hi sim, chiàⁿ ū hok-khì; chóng-sī lí nn̄g-ê pêng-iú chi̍t-ê oá-khò ka-kī chò-hó, chi̍t-ê oá-khò khuì-la̍t ióng-béng, sī oh--tit khó͘-khǹg; sui-jiân ēng chē-chē oē khó͘-khǹg i iā m̄ lâi thiaⁿ, che sī i-ê chhò-gō͘. Lí khì kā i kóng, sī chīn pêng-iú ê gī, chhut-chāi i beh lâi m̄-lâi, eng-kai tio̍h khì kā i kóng, sī chīn pêng-iú ê chêng. Só͘-í Bi̍t-phang chiū khí kā N̂g-phang kóng-khí chiū-kīn Sîn-sian tiám-hoà ê tāi-chì; tú-á khoàⁿ-kìⁿ N̂g-phang teh chò-siū, pâi-lia̍t tuī-ngó͘. N̂g-phang chiū tuì Bi̍t-phang khoa-kháu i khí ê phang-siū, kóng, Goá ê kim-siâⁿ kian-kò͘, kun-peng, chē-chē, hoaⁿ-hí kàu-ke̍k; siáⁿ-sū tio̍h thiaⁿ lí-ê oē, khì hō͘ Sîn-sian tiám-hoà chò sím-mi̍h lō͘-ēng? Bi̍t-phang khó͘-khǹg i, N̂g-phang lóng m̄-khéng thiaⁿ i-ê-oē. Bi̍t-phang hit-sî teh siūⁿ, Phah-sǹg Chhân-iⁿ sī hoaⁿ-hí chò-hó, goá lâi khì kā i kóng, i tek-khak sìn; chiū tò-khì kā Chhân-iⁿ kóng, bô-phah-sǹg Chhân-iⁿ oá-khò ka-kī ê kiâⁿ-hó, chiū kā Bi̍t-phang kóng, Tî-hui nā m̄-sī ka-ki kiân-hó, í-goā bô pa̍t-mi̍h ê tō-lí ē hō͘ lâng tit-tio̍h kiù; chiū-sī oá-khò Sîn-sian ê tiám-hoà, lâi piàn-hoà ē hiáu pàng bi̍t hō͘ chú-lâng hoaⁿ-hí, tàu-tí iā sī īⁿ-toan siâ-su̍t tiāⁿ-tiāⁿ, bô sím-mi̍h tiông-kî. Bi̍t-phang khoàⁿ nn̄g-ê pêng-iú lóng m̄-thàn, chiū tò-lâi to-siā Sîn-sian, ka-kī kiàn-siàu khang-khang ê tio̍h-boâ, nn̄g-ê pêng-iú lóng m̄-sìn. Sîn-sian kóng, Goá chá í-keng chai; suî-sî hoà chi̍t-tīn chheng-hong chò I khì.
Bi̍t-phang bô kap i ê tâng-phoāⁿ chò-hoé, ka-tī lēng-goā chò-siū tī lō͘-piⁿ toā-chhiū téng; ū koè-lō͘ ê lâng-kheh, hioh tī chhiū-kha teh-khùn, phang-siū ê bi̍t moá-moá lâu chhut-lâi, hō͘ hong chi̍t-ē chhoe, bi̍t tih lo̍h-lâi, tú-á tī lâng-kheh ê chhuì. Lâng-kheh chia̍h-tio̍h tiⁿ-tiⁿ, phah-sǹg sī kam-lō͘, chiū kia̍h thâu chi̍t-ē khoàⁿ, chai sī phang-bi̍t, chiū the̍h lâi chia̍h, hoaⁿ-hí kàu bē kò͘-tit. Chiū tó-khì in chhù siu-lí só͘-chāi, chiū lâi poaⁿ-chhú Bi̍t-phang khì in-chhù chhī. Bi̍t-phang iû-goân khì soaⁿ--ni̍h chhái-hò, tī-hia tú-tio̍h N̂g-phang. N̂g-phang, ki-chhì i kóng, Pêng-iú-ah, lí tit-tio̍h Sîn-sian ê tiám-hoà, koh tit-tio̍h chú-lâng hoan-hí chhiáⁿ lí khì, eng-kai an-jiân lim-chia̍h, siáⁿ-sū lâi chia chhái-hoe? Bi̍t-phang-á-kiáⁿ bô oē thang ìn i, ū tām-po̍h kiàn-siàu, só͘-í tò-khì mn̄g i ê phang-ông. Phang-ông chiū ìn i kóng, Lán chia ē pêng-an khiā-khí tī sè-kan, m̄-sī hō͘ sin-thé êng-êng; nā-sī hō͘ sin-thé êng bô só͘-chò, chiū siōng, bô pò chú-lâng ê in, hā, bô lâu hō͘-tāi ê gia̍p. Koh lán ê só͘-chò, si̍t-chāi hoaⁿ-hí, m̄-thang pîn-toāⁿ, ū sím-mi̍h kiàn-siàu ê sū? Só͘-í Bi̍t-phang thàu-chá koh khì chhái hoe, chhut-chāi N̂g-phang thí-chhiò, bô lia̍h-chò iàu-kín. （1887.01 P.7）（āu-tiuⁿ beh koh ìn.）
漢羅（Ùi原文改寫）
取善ê喻言
1887.01 第 19 張 p.7
（接17張127面。）
蜜蜂受點化了後，心神活動知有意外ê sîn-seng，就去試看，koh ē放蜜也ē做蠟。就對神仙講，加有食就呼群，人有好就著相勸，正是有義；我有兩個朋友，求神仙也 kā 伊點化。神仙講，好--leh，獨獨人著有空虛心，正有福氣；總是你兩個朋友一个倚靠家己做好，一个倚靠氣力勇猛，是oh--得苦勸；雖然用濟濟話苦勸伊也毋來聽，這是伊ê 錯誤。你去kā 伊講，是真朋友ê義，出在伊beh 來毋來，應該著去kā 伊講，是盡朋友ê情。所以蜜蜂就去kā黃蜂講起就近神仙點化ê代誌；拄仔看見黃蜂teh 做巢，排列對偶。黃蜂就對蜜蜂誇口伊起ê蜂巢，講，我ê 金城堅固，軍兵濟濟，歡喜到極；啥事著聽你ê話，去予神仙點化做甚乜路用？蜜蜂苦勸伊，黃蜂攏毋肯聽伊ê話。蜜蜂彼時teh想，拍算田嬰是歡喜做好，我來去kā伊講，伊的確信；就倒去kā田嬰講，無拍算田嬰倚靠家己ê行好，就kā蜜蜂講，除非若毋是ka-ki行好，以外無別物ê道理ē予人得著救；就是倚靠神仙ê點化，來變化ē曉放蜜予主人歡喜，到底也是異端邪術，無甚乜長奇。蜜蜂看兩个朋友攏毋趁，就倒來多謝神仙，家己見笑空空ê著磨，兩個朋友攏毋信。神仙講，我早已經知；隨時化一陣清風做伊去。
蜜蜂無佮伊 ê 同伴做伙，家己另外做巢佇路邊大樹頂；有過路ê人客，歇佇樹腳teh睏，蜂巢ê蜜滿滿流出來，予風一下吹，蜜滴落來，拄仔佇人客ê嘴。人客食著甜甜，拍算是甘露，就舉頭一下看，知是蜂蜜，就提來食，歡喜到袂顧得。就倒去in厝修理所在，就來搬取蜜蜂去in厝飼。蜜蜂猶原去山--ni̍h 採花，佇遐拄著黃蜂。黃蜂譏刺伊講，朋友--啊，你得著神仙ê點化，閣得著主人歡喜請你去，應該安然啉食，啥事來遮採花？蜜蜂仔囝無話通應伊，有淡薄見笑，所以倒去問伊ê蜂王。蜂王就應伊講，咱遮ē平安徛起佇世間，毋是予身體閒閒；若是予身體閒無所做，就上，無報主人ê恩，下，無留後代ê業。閣咱 ê 所做，實在歡喜，毋通貧惰，有甚乜見笑ê事？所以蜜蜂透早閣去採花，出在黃蜂恥笑，無掠做要緊。（後張beh閣印。）