恩義兩全
IN Gī Lióng-choân.
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 臺灣府城教會報 |
| 卷期 | 第17卷 |
| 日期 | 1886/11 |
| 頁數 | 125 |
白話字（原文數位化）
IN Gī Lióng-choân.
1886.11 TĒ CHA̍P-CHHIT TIUN p.125-126
Sio̍k tī Hi-lia̍p kok ū chi̍t-ê sió pang-kok, miâ-chò Lô-kiat; só͘-chāi khah- phiah, kīn-oá soaⁿ-kha. Kok-lāi îm-loān ê hong-sio̍k chin sēng, Kok-ông put-chí thòng-hīn--in; chiū siat giâm-kín ê kìm-lēng, lâi thong-ti hiah-ê peh-sèⁿ kóng, nā-ū lâng hoān-tio̍h îm-loān ê choē beh phah in nn̄g-luí ba̍k-chiu, bô beh sià--i. Kok-ông ū chi̍t-ê Thài-chú, bīn-māu sì-pan, hō͘-tiōng, seng-sêng put- sio̍k; lâng lóng ǹg-bāng i ē sêng tāi-khì lâi chiap-uī. Tī chi̍t-ji̍t Thài-chú hut-jiân hoān-tio̍h chit ê kìm-lēng. hō͘ lâng kā i chhut-phoà; chhâ-khó hit-ê-sū kó-chin ū-iáⁿ. Kok-ông chek-sî beh chiàu kok-hoat pān--i; choán-siūⁿ kóng, Goá chí-ū chit-chi̍t-tiâu ê hiat-me̍h, toàn-toàn m̄-thang choa̍t-liáu chó͘-chong ê hō͘-sû; m̄-kú kok-hoat iū bē-sái--tit tô-cháu. Nā in-uī su-sū lâi hoè- bô kong-gī, beh án-choáⁿ siat-li̍p hoat-tō͘ ? In-uī le̍k-ài lâi phian-thán, beh án- choáⁿ kà-sī peh-sèⁿ? Chá-àm chhau-sim peh-pak; ài-tit lióng-choân-kî-bí, iū bô hit-ê kè. Siūⁿ-kàu bē-chia̍h bē-khùn--tit; hut-jiân-kan ū chi̍t-ji̍t siūⁿ-chhut thè- sio̍k ê kè-tì; chiū tng chèng-lâng ê bīn-chêng, kah i-ê Thài-chú lâi kuī--teh, chhiat-chhiat chek-pī--i, kóng, Goá chham lí lūn in, sī pē-kiáⁿ, lūn gī, sī kun-sîn; hoat-lu̍t si̍t-chāi bē tô-pī--tit, chóng-sī in-chêng iā oh-tit koah iā; lí nā kó-jiân ē kái-kò oāⁿ sin-ho͘h, goá goān chham lí tàu-siū-choē. Chek-sî ka- tī phah chi̍t-luí ba̍k-chiu khí--lâi, kah Hêng-tiōng iā phah in Thài-chú chi̍t-ba̍k. Thài-chú siong-sim kàu-ke̍k chhám-chheh hoán-hoé chiông-chiân ê sit-chhò, toā-siaⁿ kóng, Goá ê pē chō-uī, chiah-nī chun, nî-hoè, chiah-nī lāu, lâi thè-goá siū-khó͘, goá sim m̄-sī chhâ--ê chio̍h--ê, goá beh-thài-ē jím--tit--leh? Chū hit-sî chheng-sim koáⁿ-io̍k, sé-thoā tek-hēng, kái-kò oāⁿ-sin; kàu-boé kó-jiân chò hó jîn-kun. Thong-kok ê peh-sèⁿ chiong chit-khí-sū kā i liû-thoân o-ló; iū-koh chi̍t-ê chi̍t-chhuì siàu-liām kok-ông ê tek-hēng, chheng-ho͘ Thài-chú ê hiân; hit-ê îm-loān ê hong-sio̍k, iā in-uī án-ne ū khah léng--khì.
Khì-chin-chú teh phoe-phêng kóng, Thiⁿ-ē bô hit-hō m̄-thiàⁿ-kiáⁿ ê pē; hām- lo̍h-choē, pē kap i siū hêng-hoa̍t, kàu āu-lâi kiáⁿ ē-hiáu-tit hoán-hoé kái-kò, hō͘ pē lâi tit-tio̍h hiân ê kiáⁿ. lâng chai hit ê kiáⁿ ē ké-pìⁿ chiông-chiân ê chhò-gō͘, kiám iā soà chai sī tuì hit-ê pē ê ēng- sim kàu-hiah-nī khó͘ lâi--ê mah? Taⁿ Thiⁿ-pē chhòng-chō lâng-luī, khoàⁿ-chò ì-ài ê kiáⁿ; lâng kì-jiân hoān choē, i nā chiàu kong-gī ēng thiⁿ-lí lâi chek-hoa̍t--lán, m̄-kú hāi-tio̍h in-chêng, nā in-uī su- chêng it-bī lâi sià-bián--lán, m̄-kú hāi- tio̍h kong-gī. Só͘-í chiah hoà-sin kàng- lo̍h sè-kan, miâ-chò Iâ-so͘, lâi thè-lâng siū-khó͘, kiù chiah-ê bān-peh-sèⁿ; lūn jîn-ài iā kàu, lūn kong-gī iā chin; si̍t-chāi sī chin bô-tā-oâ ê khó͘-sim. Khoàⁿ Lô-má 3:26. Lâng siat-sú ē hiáu-tit sé- tû oāⁿ-sin, í-keng pò i-ê toā-in, bān-hūn iā pò bô chi̍t-hūn. Hit-hō kiān-koai put- siū kàu-hoà--ê chóng bē-bián--tit tio̍h hō͘ I khiàn-chek. Che m̄-sī Thiⁿ-pē khì- choa̍t lâng, si̍t-chāi sī lâng ka-tī khì- choa̍t lah!
漢羅（Ùi原文改寫）
恩義兩全
1886.11 第十七張 p.125-126
屬tī希臘國有一個小邦國，名做羅傑，所在較僻，近倚山腳。國內淫亂ê風俗真盛，國王不止痛恨--in，就設嚴謹ê禁令，來通知hiah-ê百姓講，若有人犯著淫亂ê罪beh扑in兩蕊目珠，無beh赦--伊。國王有一個太子，面貌四pang厚重，生成不俗，人攏向望伊會成大器來接位。Tī一日太子忽然犯著這個禁令，hō͘人kā伊出破，查考hit個事果真有影。國王即時beh照國法辦--伊；轉想講，我只有這一條ê血脈，斷斷m̄-thang 絕了祖宗ê後嗣；m̄-kú 國法又bē使--tit逃走，若因為私事來廢無公義，beh án-choáⁿ設立法度？因為溺愛來偏袒，beh án-choáⁿ教示百姓？早暗操心擘腹，ài-tit 兩全其美，又無hit個計。想到bē食bē睏--tit；忽然間有一日想出替贖ê計智，就當眾人ê面前，kah伊ê太子來跪--teh，切切責備--伊，講，我chham你論恩，是父子；論義，是君臣；法律實在bē逃避--tit，總是恩情也oh-tit割也；你若果然會改過換新ho͘h，我願chham你鬥受罪。即時家己扑一蕊目珠起--來，kah Hêng-tiōng也扑in太子一目。太子傷心到極慘慼反悔從前ê失錯，大聲講，我ê父坐位，chiah-nī尊，年歲，chiah-nī老，來替我受苦，我心m̄是柴--ê石--ê，我beh-thài會忍tit--leh？自hit時清心寡欲，洗thoā德行，改過換新，到尾果然做好人君，通國ê百姓將這起事kā伊流傳o-ló，又koh一個一嘴數念國王ê德行，稱呼太子ê賢，hit個淫亂ê風俗，也因為án-ne有較冷--去。
Khì -chin-chú teh批評講，天下無hit號m̄疼子ê父；陷落罪，父kap伊受刑罰，到後來子會曉tit反悔改過，hō͘父來得著賢ê子。人知hit個子會改變從前ê錯誤，kiám 也續知是對hit個父ê用心到hiah-nī苦來--ê mah？今天父創造人類，看做意愛ê子，人既然犯罪，伊若照公義用天理來責罰--咱，m̄-kú害著恩情，若因為私情一味來赦免--咱，m̄-kú害著公義。所以才化身降落世間，名做耶穌，來替人受苦，救chiah-ê萬百姓，論仁愛也夠，論公義也真，實在是真無tā-oâ ê苦心。看羅馬3：26。人設使會曉tit洗除換新，已經報伊ê大恩，萬分也報無一分。Hit號kiān-koai不受教化--ê 總bē免--tit著hō͘伊譴責，這m̄是天父棄絕人，實在是人家己棄絕lah！