皇帝登極
Hông-tè teng-ke̍k.
文獻資訊
| 項目 | 資料 |
|---|---|
| 作者 | 無lo̍h名 |
| 卷期 | 臺灣府城教會報 |
| 卷期 | 第14卷 |
| 日期 | 1886/8 |
| 頁數 | 101 |
白話字（原文數位化）
Hông-tè teng-ke̍k.
1886.08 TĒ CHA̍P-SÌ TIUN p.101-102
La̍k goe̍h chhe 10 Tiong-kok Hông-thài-hō͘ chhut-chiàu thong-ti, kóng, “In-uī Hông-tè chē-uī ê sî khah chió- hoè, chāi-tiâu tek-khak tio̍h ū lâng kam-tok, hoān-nā gū-tio̍h chàu-chiuⁿ khim-tiám sù-hong chiah ê chèng-sū, chiū thang liāu-lí, só͘-í goá put-tek-put tio̍h suî-liâm thèng-chèng. Chêng ū chhut-chiàu tēng-kui chún Hông-tè ha̍k-si̍p kàu kok-chèng chiâu bat, chiah thang pún-sin tī-kok. Kàu-taⁿ cha̍p-sò͘ nî kú, Sèng-siōng í-keng ji̍t-ji̍t khîn- khó͘ nî-nî chìn-tek, ē hiáu-tit chú-chhâi chàu-chiuⁿ ê sī-hui, phoe-phêng kó͘-kim ê gī-lí, phoàⁿ-toàn chèng-sū. Só͘-í kin-á-ji̍t Thài-hō͘ soan-tiàu Hông-chhin lâi jū-chí kóng kin-nî tang-cheh Hông-tè teh-beh pún-sin chè-kò thiⁿ-tē, iā koh jū Khim-thian-kàm te̍k-soán mê-nî ê kiat-ji̍t, thang hō͘ Sèng-siōng teng-ke̍k. Taⁿ goá só͘ jū ê chí-ì lín kok-séⁿ bûn-bú koaⁿ-oân tio̍h chun-thàn hōng-hêng.”
āu-lâi Hông-thài-hō͘ koh chhut-chiàu kóng Khim-thian-kàm hok-chàu teng- ke̍k ê kiat-ji̍t í-keng te̍k-soán, chiū-sī mê-nî chiaⁿ-goe̍h 15 ji̍t.
Taⁿ-ū thiaⁿ-kìⁿ chit-ê tāi-chì, sio̍k-chāi Tiong-kok ê Hok-im-hô-hoē tiâu-tî kià chi̍t-tiuⁿ phoe, chhiáⁿ chóng kàu-hoē hiān-sî tio̍h tì-ì thè Hông-tè kî-tó. I-ê phoe kóng: “Chiàu Sèng-chheh kà-sī lán, tio̍h thè chiah-ê ông kap toā-koaⁿ kî-tó. Hiān-sî ū khah iàu-kín ê toā-sū teh-beh khí-in, lán tio̍h it-hoat pek-chhiat khún-kiû. Thàn Sèng-siōng la̍k-goe̍h 28 ji̍t chiâⁿ 16 hoè, chit-sî i-ê sim-su sèng-chêng koan-hē chiong-lâi kok- ka ê pêng-tī. iū-kiam Thài-hō͘ tú-á chhut chiàu tiāⁿ-tio̍h mê-nî chiaⁿ-goe̍h beh hō͘ i teng-ke̍k. iā bô loā-kú beh soán chiàⁿ-keng, só͘-í lán tio̍h pek-chhiat kî-tó Siōng-tè, hō͘ Hông-tè ū tì-huī thang tī-kok, hō͘ i-ê peh-sèⁿ ē hióng thài-pêng ê hok-khì, hō͘ i pún-sin tn̂g hoè-siū, hō͘ i teng-ke̍k liáu-āu Ki-tok ê hok-im ē ná khui-khoah tī kok-lāi, hoān-nā koaⁿ-oân peh-sèⁿ ná ài chhin-kīn tō-lí.”
漢羅（Ùi原文改寫）
皇帝登極
1886.08 第十四張 p.101-102
六月初10中國皇太后出詔通知，講，「因為皇帝坐位ê時較少歲，在朝的確著有人監督，凡若遇著奏章欽點賜封chiah-ê政事，就thang 料理，所以我不得不著垂簾聽政。前有出詔定規準皇帝學習到國政chiâu bat，才thang 本身治國。到今十數年久，聖上已經日日勤苦年年進德，會曉 tit主裁奏章ê是非，批評古今ê義理，判斷政事。所以今仔日太后宣召皇親來諭旨講今年冬節皇帝teh-beh本身祭告天地，也koh諭欽天監擇選明年ê吉日，thang hō͘聖上登極。今我所諭ê旨意lín各省文武官員著遵趁奉行。」
後來皇太后koh出詔講欽天監復奏登極ê吉日已經擇選，就是明年正月15日。
今有聽見這個代誌，屬在中國個福音和會刁持寄一張批，請總教會現時著致意替皇帝祈禱。伊ê批講，「照聖冊教示咱，著替chiah-ê王kap大官祈禱。現時有較要緊ê大事teh-beh起因，咱著一法迫切懇求。趁聖上六月28日成16歲，這時伊ê心思性情關係將來國家ê平治。又兼太后tú仔出詔定著明年正月beh hō͘伊登極。也無偌久beh選正宮，所以咱著迫切祈禱上帝，hō͘皇帝有智慧thang 治國，hō͘伊ê百姓會享太平ê福氣，hō͘伊本身長歲壽，hō͘伊登極了後基督ê福音會愈開闊tī國內，凡若官員百姓愈愛親近道理。」